MATHAYO 24
24
Jesu kughora aighu ya kunoneka kwa Hekalu
(Mk. 13.1-2; Lk. 21.5-6)
1Jesu ukafuma Hekalunyi, nao ukighenda chia yake, wanughi wake wikamchea kummbonyera maaghi gha Hekalu. 2Ela uo ukawitumbulia, “Mwaghiwona agha ghose? Namghoria loli, ndekuwadie igho jingi jichaasigharika aighu ya mmbao jiseghushiro andoenyi anduangi.”
Wasi na matiriro
(Mk. 13.3-13; Lk. 21.7-19)
3Hata iji Jesu wasea kidombo aighu ya Mghondi ghwa Mizeituni, wanughi wake wikamghendia njamenyi wikamkotia, “Kudighorie, maza iri richakaia lii? Na alama ya kucha kwako ni iao, na ya kuja kukatia kwa ngelo?” 4Jesu ukawitumbulia, “Manyenyi mndungi usakemlaghasha. 5Angu wengi wichacha kwa irina japo wikighamba, ‘Ini nuo Kristo,’ nawo wichawilaghasha wengi. 6Mchasikira gha wuda na wuvoro ghwa wuda; ela msakeobua; angu suti maza iro riche, ela kuja kutua ndekulighisire. 7Angu mbari ichabonya wuda aighu ya mbari na wuzuri aighu ya wuzuri, kuchakaia na njala na misughusiko andu kuzima kuzima. 8Ela maza iri rose ni sa kuzoya kulumwa kwa kuva.
9“Wichamfunya mtiriro na kubwaghwa, nenyo mchamenywa ni mbari rose kwa wundu ghwa irina japo.#Mat. 10.22 10Aho wengi wichawuya nyuma, wikifunyana na kuzamiana weni na weni. 11Wichawuka walodi wa tee wengi, nawo wichawilaghasha wandu wengi. 12Na kwa wundu ghwa agho mawiwi kuchurikia, lukundo lwa wengi luchahora modo. 13Ela uo urumaghiagha hata kutua nuo moni uchaakia.#Mat. 10.22 14Na iji Ilagho Jiboie ja Wuzuri jichachilwa wurumwengunyi kose kukaia wushuhuda kwa wandu wose; aho niko kutua kuchacha.
Matiriro mabaa
(Mk. 13.14-23; Lk. 21.20-24)
15“Ela kasikira mwammbona uja ‘Mmbiwi Mnoni’, uo oreghoreloghe ni mlodi Danieli, ukikaia kimusi andu kwa wueli, (uo ushomagha ndetambuo)#Dan. 9.27; 11.31; 12.11 16awo wiko Judea ndewikimbirie mghondinyi; 17na uo uko aighu nyumbenyi usakesea kuwusa ivo vilambo viko nyumbenyi kwake;#Lk. 17.31 18na uo uko mbuwenyi usakewuya kuwusa nguwo yake. 19Si wasi ugho kwa waka wiko na vifu, na awo wiongoshagha wana watini matuku agho! 20Lombenyi angu kukimbia konyu kusakekaia ngelo ya kwari angu ituku ja Sabato. 21Angu kuchakaia na wasi m'baa na ndighi, jingi ghusewonekie kufuma kuzolwa kwa wurumwengu hata idana; nagho ndeghuchaawoneka jingi sena anduangi.#Dan. 12.1; Wuf. 7.14 22Na ngera agho matuku ghiserepunguziroghe, kumangu mndungi ndekiagha anduangi; elaima kwa wundu ghwa awo wasaghulwa, Mlungu uchaghipunguza matuku agho.
23“Matuku agho mndungi ukamzera, ‘Olenyi Kristo hoyu!’ angu ‘Hoja aja!’ msakerumiria. 24Angu wichawuka weke Kristo wa tee na walodi wa tee; wichawonyera weke mwakilimbiti wengi na mashiniko; wipate kuwilaghasha ngera idimika hata awo wasaghulwa. 25Olenyi namghoria kiimbiri. 26Hata iji wamzera, ‘Hoja oko kireti,’ msakefuma; iji wamzera, ‘Hoyu oko vumbenyi va ndenyi,’ msakerumiria.#Lk. 17.23-24 27Angu sa iji koni luhehia lukabagha kufuma mashariki hata magharibi, niko koni kuchaakaia kucha kwake Mwana wa Mdamu. 28Angu andu koni gharia iko, niko koni nderi rikwanyikiagha.#Lk. 17.37
Kucha kwake Mwana wa Mdamu
(Mk. 13.24-27; Lk. 21.25-28)
29“Nyuma ya wasi ghwa matuku ghaja, iruwa jichawuya kira, na mori ndeghuchaafunya miengere yaro anduangi; nyerinyeri richakaia rikipotoka kufuma mlungunyi, nandighi ra mlungunyi richasukwa-sukwa.#Isa. 13.10; 34.4; Eze. 32.7; Joe. 2.10; 3.4; 3.15; Wuf. 6.12-13 30Niko aho ichawoneka alama ya Mwana wa Mdamu aighu mawingunyi, na mbari rose ra ndoenyi richakema na kulila, nawo wichammbona Mwana wa Mdamu ukicha aighu ya mawingu gha mlungunyi uko nandighi na wubaa mungi;#Dan. 7.13; Zek. 12.10-14; Wuf. 1.7 31nao uchawiduma weke malaika wake na lwaka lubaa lwa tarumbeta, kuwikwanya wasaghulwa wake kufuma mbembe inya ra wurumwengu, kufuma kutua uku hata kutua kuja kwa mlungunyi.
Ifundisho kwa mtini
(Mk. 13.28-31; Lk. 21.29-33)
32“Kufundishenyi mmbeni kwa mfwano ghwa mtini; iji longe lwaro lwakafunya malemba makoo, mwadamanya angu sumesu yalighisa. 33Wokoni nenyo iji mwawona maza iri rikikaia, manyenyi angu oko kaavui kucha. 34Namghoria loli, kivalwa ichi ndechichaaida anduangi, maza iri rose risekaie. 35Mlungunyi na ndoenyi kuchaida, ela madedo ghapo ndeghichaaida anduangi.
Mndungi ndemanyire ituku hata saa
(Mk. 13.32-37; Lk. 17.26-30, 34-36)
36“Ela ituku na saa ija, mndungi ndeimanyagha; hata weke malaika wiko mlungunyi, hata Mwana, ela Aba moni. 37Sa iji erekoghe matuku gha Nuhu, niko koni ichaakaia ituku ja kucha kwake Mwana wa Mdamu.#Kuz. 6.5-8 38Angu matuku agho imbiri ya gharika, werekoghe wikija na kunywa, wikilowua na kulowolwa; hata ituku jija Nuhu orengirieghe safinenyi, 39ndeweremanyireghe anduangi, hata gharika ikacha na kuwitotesha wose; niko koni kuchaakaia kucha kwake Mwana wa Mdamu.#Kuz. 7.6-24 40Ngelo iyo, wandu wawi wichakaia mbuwenyi; umu uchadalwa na umu uchasighwa. 41Waka wawi wichakaia wikisha, umu uchadwalwa na umu uchasighwa. 42Kwa huwu chereshenyi, angu ndemmanyire ni ituku jiao Bwana onyu uchaacha anduangi. 43Ela manyenyi ilagho iji: angu ngera mundu wa nyumba odemanya ni ngelo iao ya nakio uchelwagha ni kitoi, kumangu orechereshagha; hata ndereisighagha nyumba yake ibaro ni vitoi anduangi.#Lk. 12.39-40 44Kwa huwu inyo wori, kaienyi nicha, angu Mwana wa Mdamu uchacha ngelo mseimanyagha anduangi.
Mdumiki Mloli angu useko mloli
(Lk. 12.41-48)
45“Nani uo mdumiki uko mloli na wa akili, uo bwana wake uchaammbika aighu ya wandu wake, uwineke vindo kwa kimu charo? 46Warasimilwa uja mdumiki bwana wake uchaamkua ukibonya wokoni. 47Namghoria loli uchammbika mdumiki uja aighu ya mali rake rose. 48Ela iji uja mdumiki mmbiwi waghamba ngolonyi kwake, ‘Bwana wapo wamuka luma kuwuya.’ 49Nao uzoye kuwikaba wadumiki wambao na kuja na kunywa andwamweri na wawongeri; 50niko bwana wake uchaacha ituku usejisuwirie na saa useimanyire anduangi. 51Uchamdumbua vipande vipande, na kummbika chiaimweri na waji-kuwi. Aho kuchakaia na kililo na kuja maghegho.
ទើបបានជ្រើសរើសហើយ៖
MATHAYO 24: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
