MATHAYO 22
22
Mfwano ghwa karamu ya arusi
(Lk. 14.15-24)
1Jesu ukaghora nawo kwa mfwano sena ukighamba, 2“Wuzuri ghwa mlungunyi ghwafanana na mzuri umu orem'bonyereghe mwana wake karamu ya arusi; 3ukawiduma wadumiki wake wiwiwange awo werekaribishiroghe kwa iyo karamu ya arusi, ela wikalegha kucha. 4Ukaduma wadumiki wazima sena ukighamba, ‘Wizerenyi awo wandu werekaribishiroghe, Olenyi nawika vindo vapo tayari, njau na ngache ribandie rameria kubwaghwa, na kula kilambo cheko tayari; choonyi arusinyi.’ 5Ela awo wandu ndeweretalieghe, wikaghibonya malagho ghake ghiangue wikaghenda chia rawo, umu mbuwenyi kwake, na mzima kwa kazi rake. 6Na waja weresigharikieghe, wikawiwada wadumiki wake, wikawibonya kiwiwi wikawibwagha. 7Uja mzuri ukawawa ni ngolo, ukaduma masikari ghake, ukawitotesha waja wabwaghi, ukaghukora muzi ghwawo. 8Ukawizera wadumiki wake, ‘Karamu ya arusi eko tayari ela awa werekaribishiroghe ndewichefwana. 9Kwa huwu ghendenyi chia ra matano, na awo wose mchaawiwona, muwirede arusinyi.’ 10Nao waja wadumiki wikafuma chienyi kose wikawikwanya wose werewiwonieghe, wawiwi na wecha wori. Nyumba ya arusi ikachua waghenyi. 11Ela iji mzuri wangia kuwilawua waghenyi wake, ukammbona mndumu aho usewadie irwao ja arusi; 12ukamzera, ‘Mghenyi wapo, kwangirie wada aha kusewadie irwao ja arusi?’ Nao ukanyama kima. 13Nao mzuri ukawizera waja wadumiki, ‘Mfungenyi mikonu na maghu, mumkumbe kwa kira chiko shighadi; aho kuchakaia kulila na kuja maghegho.’#Mat. 8.12; 25.30; Lk. 13.28 14Angu awo wiwangwagha ni wengi, ela awa wisaghulwagha ni watini.”
Ikoto aighu ya kulipa kodi
(Mk. 12.13-17; Lk. 20.20-26)
15Nao Mafarisayo wikafuma wikaghenda kubonya njama seji widimagha kumdegha Jesu wimmbwade kwa madedo ghake. 16Wikamdumia wamu wa wanughi wawo chiaimweri na wanjama wa Herode wikighamba, “Mwalimu, dakumanya angu koko mloli, na chia ya Mlungu kwadaifundisha kwa loli, hata ndekutalagha mndungi, angu kusetalagha mawubaa gha wadamu anduangi. 17Idana dighorie seji kuwonagha. Ni hachi kumfunyira Kaisari kodi anguwada?” 18Ela Jesu ukighumanya wuwiwi ghwawo ukawizera, “Inyo waji-kuwi, kwaki munitimagha? 19Niwonyerenyi iyo pesa ilipwagha kodi.” Nao wikamredia. 20Jesu ukawizera, “Fwana na maandiko ghiko aha ni vani?” 21Wikaghamba, “Ni va Kaisari.” Nao ukawizera, “Kwa huwu mnekenyi Kaisari vindo va Kaisari na Mlungu vindo va Mlungu.” 22Nao iji weresikireghe agho wikashinika, wikamsigha wikaghenda chia rawo.
Ikoto aighu ya kuruka
(Mk. 12.18-27; Lk. 20.27-40)
23Ituku jija jeni Masadukayo wamu (awa wighambagha ndekuko kuruka kungi kwa wafu anduangi) wikamchea Jesu wikamkotia,#Mab. 23.8 24“Mwalimu, Musa oreghambieghe, ‘Ngera mundu wafwa nao wasigha muka usewadie mwana ungi, uo mundu mruna, suti ummbuse uja muka umvaie mruna wana.’#Wuk. 25.5 25Idana korekoghe na waruna mfungade mzedu; nao uja wa imbiri ukalowua, ukafwa usevae wana wangi, ukamsighia mruna uja muka. 26Huwo koni uja wa kawi na wa kadadu hata wose mfungade wikasia. 27Kutua kwa wose, uja muka moni ukafwa. 28Idana kwa uko kurukenyi uchakaia muka wa ani aghadi ya awo mfungade? Angu wose weremlowueghe.” 29Jesu ukawitumbulia, “Mwakosa kwa kulemwa ni kughimanya Maandiko na ndighi ra Mlungu. 30Angu iji wafu wichaaruka wichakaia sa weke malaika wiko mlungunyi, ndewichaalowua hata ndewichaalowolwa anduangi. 31Idana seji wafu wirukishwagha, ndemshomie seji mzerelo ni Mlungu? 32‘Ini ne Mlungu wa Abrahamu, Mlungu wa Isaaka, na Mlungu wa Jakobo.’ Uo ndekaiagha Mlungu wa wafu anduangi, ela wa awa wiko moyo.”#Kuf. 3.6 33Nao iji izungu wasikira agho, wikaghishinikia mafundisho ghake.
Momu ghuko m'baa
(Mk. 12.28-34; Lk. 10.25-28)
34Ela iji Mafarisayo wasikira angu wawinyamirisha Masadukayo, wikakwana chia imweri. 35Umu wa walimu wa Sharia ukamkotia Jesu kwa kumtima,#Lk. 10.25-28 36“Mwalimu, momu m'baa ghwa Sharia ni ghuao?” 37Jesu ukatumbulia, “Kumkunde Bwana Mlungu wako kwa ngolo yako yose, na kwa roho yako yose, na kwa akili rako rose.#Wuk. 6.5 38Ughu nigho momu m'baa na ghwa imbiri. 39Na ghwa kawi ghoofwanana na ugho: Kumkunde mmbenyu sa iji koni kukukunde kumoni.#Wal. 19.18 40Sharia yose ya Musa na mafundisho gha walodi ghategemia memu ihi iwi.”
Ikoto aighu ya Kristo
(Mk. 12.35-37; Lk. 20.41-44)
41Nao iji Mafarisayo wamu werekwanyikieghe chia imweri, Jesu ukawikotia 42“Mmbona wada aighu ya Kristo, uo ni mwana wani?” Wikamtumbulia, “Ni mwana wa Daudi.” 43Jesu ukawizera, “Yakaia wada sena Daudi kwa Roho Mweli ummbange Bwana ukighamba:
44‘Bwana oremzerieghe Bwana wapo;
sea kidombo kwa mkonu ghwapo ghwa kiwomi
hata niwiwike wamaiza wako aisi maghunyi kwako.’#Zab. 110.1
45Ikakaia Daudi moni wammbanga ‘Bwana,’ wele ukaia wada mwana wake sena?” 46Aho ndekorekoghe na mndungi oredimieghe kumtumbulia ilagho jingi. Na kufuma ituku ijo mndungi nderemkotereghe ilagho jingi sena anduangi.
ទើបបានជ្រើសរើសហើយ៖
MATHAYO 22: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
