MATHAYO 14
14
Kifwa cha Johane M'baputizi
(Mk. 6.14-29; Lk. 9.7-9)
1Ngelo iyo mzuri Herode ukasikira malagho gha Jesu. 2Ukawizera wadumiki wake, “Uo ni Johane M'baputizi waruka kufuma kwa wafu; kwa wundu ughu ndighi iri rabonya kazi andenyi kwake.”
3Angu Herode nuo oremmbwadieghe Johane, ukamfunga, na kumngira kifungonyi kwa wundu ghwa Herodia nao ni mka-mruna Filipo.#Lk. 3.19-20 4Angu Johane oremzerieghe Herode, “Kwadarighidwa oho kukaia na uo muka.”#Wal. 18.16; 20.21 5Herode ukakunda kum'bwagha Johane, ela ukawiobua wandu angu weremrumirieghe Johane kukaia mlodi.
6Nao iji ituku ja kuvalwa kwake Herode javika, mwai wa Herodia ukavina imbiri ya wose, ukamrira Herode. Nao ukam'bonyera ilaghiro ja ighemi, 7kumneka icho chose uchaalomba. 8Nao moni ukifundishwa ni mae ukaghamba, “Nineke idakoni aha sahaninyi chongo cha Johane M'baputizi.” 9Nao mzuri ukawawa ni ngolo, ela kwa wundu ghwa ijo ighemi jake, na kwa wundu ghwa waja werekoghe kidombo mezenyi, ukafunya momu uneko. 10Niko Herode ukaduma mundu, Johane udumbulo chongo aho kifungonyi. 11Nao chija chongo chikaredwa na sahani na kunekwa uja mwai, na mwai ukamneka mae. 12Wanughi wa Johane wikacha wikaghuwusa mumbi ghwake wikaghurika. Nawo wikaghenda wikamghoria Jesu.
Jesu kuwineka vindo wandu elfu isanu na kuchumba
(Mk. 6.30-44; Lk. 9.10-17; Joh. 6.1-14)
13Nao iji Jesu wasikira malagho gha Johane, ukafuma aho kwa ishua ukaghenda andu kusewadie wandu. Ela wandu wikamanya wikamnugha kwa maghu kufuma mizinyi. 14Hata umeria kuvika pwani, ukawona izungu ibaa ja wandu ukawifuya wughoma, ukawiboisa wakongo wawo.
15Luma lwa kenyi luendavika, wanughi wake wikamghendia wikamzera, “Andu aha ni kireti na ndoe yaswa. Idana laghana na wandu wighende wikughuye vindo mizinyi.” 16Jesu ukawizera, “Ndeiko haja ya awo kughenda; winekenyi vindo inyo mmbeni.” 17Ela awo wikaghamba, “Isi deeka na mikate misanu tu na samaki iwi.” 18Jesu ukawizera, “Niredienyi aha.” 19Ukafunya momu wandu wisee kidombo anyasinyi; ukaiwusa ija mikate na samaki iwi; ukazighana aighu mlungunyi ukairasimia na kuichukanya, ukawineka wanughi wake, nawo wikaineka ijo izungu. 20Wikaja wose wikaghuda. Wikatumbanya masighariko gha mikate, wikachura vikapu ikumi na viwi. 21Awo werejieghe werekoghe wandu wa womi elfu isanu kuseko kutala waka na wana.
Jesu kughenda aighu ya machi
(Mk. 6.45-52; Joh. 6.15-21)
22Ahoeni Jesu ukawilaghira wanughi wake wingie ishuonyi wikirieghe, ingelo Jesu wawuyalaghana na wandu. 23Nyuma ya kulaghana nawo, ukajoka mghondinyi uekeri upate kulomba Mlungu. Hata iji luma lwa kenyi lwavika, orekoghe uekeri aho; 24ngelo iyo jija ishua jerekoghe javika ghadi na ghadi ya ndiwa, jikikumbwa-kumbwa ni mivo-mivo ya machi, angu jerekoghe jikitangalwa ni mbeo. 25Nao kaavui na ndoe kuelenyi, Jesu ukawichea ukighenda na maghu aighu ya machi. 26Iji wanughi wake wammbona ukighenda na maghu aighu ya machi, wikaobua wikighamba, “Ni kisuka!” wikakema kwa wowa. 27Ahoeni Jesu ukadedanya nawo ukighamba, “Kaienyi na ngolo ni ini moni msakeobua.” 28Petro ukamzera, “Bwana, ngera ni oho kumoni, nizere niche kwako aighu ya machi.” 29Jesu ukamzera, “Choo!” Nao Petro ukafuma ishuonyi, ukazoya kughenda kwa Jesu aighu ya machi. 30Ela iji wawona kuja kuweta kwa mbeo mbaa, ukaobua ukazoya kuvululia cha machinyi. Nao ukakema ukighamba, “Nikire Bwana!” 31Nao shwa wori Jesu ukaghughorua mkonu ghwake ukammbwada ukighamba, “Mundu wa irumirio itini oho, kwaki kwabonya kiture?” 32Nao iji wangia ishuonyi, kiremba chikasia. 33Na wose werekoghe ishuonyi wikamtasa wikighamba, “Loli oho ko Mwana wa Mlungu.”
Jesu kuboisa wakongo aja Genesareti
(Mk. 6.53-56)
34Hata iji wameria kuiruwuka ndiwa, wikavika Genesareti. 35Nao iji wandu wa aja wammanya, wikaeresha malagho andu kose. Niko wikamredia Jesu wakongo wose; 36wikamlomba wimuadade hata kidambi cha nguwo yake, na wose weremuadadireghe wikaboa.
ទើបបានជ្រើសរើសហើយ៖
MATHAYO 14: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
