MATHAYO 13
13
Mfwano ghwa muwi mbeu
(Mk. 4.1-9; Lk. 8.4-8)
1Ituku ijo jeni Jesu ukafuma iyo nyumba ukaghenda mbai na mbai ya ndiwa, ukasea kidombo. 2Na izungu ibaa ja wandu jikamkwanyikia hata ukajoka ishuonyi ukasea kidombo; na wandu wose wikakaia kimusi mbai-mbai ya ndiwa.#Lk. 5.1-3 3Nao Jesu ukawifundisha malagho mengi kwa mfwano ukighamba, “Muwi mbeu orefumieghe kuwa mbeu. 4Hata iji orekoghe ukiwa, rimu rikapotoka chienyi; na nyonyi rikacha rikarija. 5Rimu rikapotoka maghonyi andu kuserekoghe na ndoe nyingi. Rikabuka kwa wundu ghwa rija ndoe ndini rerekoghe. 6Ela iji iruwa jajoka jikarikora, na angu miri yake iserengirieghe ndenyi rikaoma. 7Rimu rikapotoka midinyi ya minjwa; na iyo midi ikazoghua ikaribwagha. 8Ela rimu rikapotoka ndoe iwurue, rikabuka na kuva; imu ighana, na imu mirongo irandadu, na imu mirongo idadu. 9Uo uko na madu ghesikira ndesikire.”
Makusudi gha Mifwano
(Mk. 4.10-12; Lk. 8.9-10)
10Niko wanughi wikamchea Jesu wikamzera, “Kwaki kughoragha nawo kwa mifwano?” 11Jesu ukawitumbulia, “Inyo mwanekelo kurimanya ngasu ra wuzuri ghwa mlungunyi, ela awo ndewinekelo anduangi. 12Angu uo uko na kindo chimu uchanekwa sena uchachurilwa, ela uo usewadie kindo chingi uchasokwa hata icho uko nacho.#Mat. 25.29; Mk. 4.25; Lk. 8.18; 19.26 13Kwa wundu ughu, niko naghora nawo kwa mifwano: angu kuzighana hoku wawuyazighana, ela ndewiwonagha; na kusikira hoku wawuyasikira, ela ndewisikiragha hata ndewitambukilwagha anduangi. 14Kwa huwu wulodi ghwa Isaya ghwakatia aighu kwawo ugho ghughambie:
‘Kusikira mchasikira, ela ndemchaatambukilwa;
Kuzighana mchazighana, ela ndemchaawona.#Isa. 6.9-10
15Angu wandu awa wafue vongo,
na madu ghawo ndeghisikiragha,
na meso ghawo ndeghiwonagha.
Ngera si huwo kumangu meso ghawo ghawona,
na madu ghawo kumangu ghasikira,
kumangu kwa akili rawo watambukilwa,
wikanighalukia ini,
nani kumangu nawikira.’
16“Ela inyo mwarasimilwa angu meso ghenyu ghawona na madu ghenyu ghasikira.#Lk. 10.23-24 17Namghoria loli, walodi wengi na wandu wa hachi werekoghe na bea eghiwona agha mughiwonagha ela ndewereghiwonieghe; na kusikira agha mughisikiragha, ela ndewereghisikireghe anduangi.
Jesu kuwitambushira mfwano ghwa muwi mbeu
(Mk. 4.13-20; Lk. 8.11-15)
18“Idana sikirenyi kutambua kwaro mfwano ghwa muwi mbeu. 19Iji mndungi wasikira ilagho ja wuzuri ela ndejimtambukie, uja mmbiwi wadaacha na kujiinja ngolonyi kwake, nao wafwanana na mbeu ipotokie chienyi. 20Na rija mbeu ripotokie maghonyi, ni sa mundu ujisikiragha ilagho nao wajiwusa ngolonyi kwake kwa kuboilwa, 21ela ndewadie miri ingi; wadakaia najo kwa ngelo vui, hata ghikacha matiriro angu kusumbulwa kwa wundu ghwa ilagho ijo, shwa wori wadajisigha. 22Na ija mbeu ipotokie midinyi ya minjwa, ni sa mundu ujisikiragha ijo ilagho, ela masumbuko gha irangi iji na bea ra mali rajibwagha ijo ilagho, najo ndejivagha matunda ghangi anduangi. 23Na ija mbeu iwalo ndoe iwurue, ni sa mundu usikiragha ijo ilagho, najo jamtambukia, nao wadava matunda kwa ighana, na kwa mirongo irandadu, na kwa mirongo idadu.”
Mfwano ghwa ngano na isaka jifwanane na ngano
24Jesu ukawighoria wandu mfwano mzima, “Wuzuri ghwa mlungunyi ghwafanana na mundu orewaeghe mbeu ndicha mbuwenyi kwake. 25Hata iji wandu walala ukacha m'maiza wake ukawa isaka jifwanane na ngano. 26Nao iji mbeu rabuka na kuzoghua kuvikia kufunya vanga, niko ijo isaka jikazoya kuwoneka. 27Wadumiki wa uja mundu wa mbuwa wikaghenda na kumghoria, ‘Wele bwana, nechi kodeewa mebu ndicha mbuwenyi kwako, isaka jafumie hao?’ 28Ukawizera, ‘M'maiza nuo ubonyere huwo.’ Wadumiki wake wikamzera, ‘Kwakunde dighende dijikuo?’ 29Ukawitumbulia, ‘Hata, sighenyi; isechekaia ngelo mujikuagha, mchekua na ngano wori. 30Sighenyi rizoghuanye chiaimweri hata ngelo ekuwida. Ngelo iyo nichawizera awo wikuwidagha, zoenyi muinje isaka, mujifunge mafungu mafungu, eri jichekorwa. Ela ngano ikwanyenyi muingire nganyenyi kwapo.’”
Mfwano ghwa mbeu ya haradali
(Mk. 4.30-32; Lk. 13.18-19)
31Nao Jesu ukawighoria wandu mfwano ghumu, “Wuzuri ghwa mlungunyi ghoofwanana na ndembe ya haradali mndumu oreiwaeghe mbuwenyi kwake. 32Iyo cheni ni mbeu ndini kuchumba rose, ela ikabuka na kuzoghua, mudi ghwaro ghwawuya m'baa kuchumba miwalwa yose, hata nyonyi racha na kubonya vijungu vawo mbashunyi kwaro.”
Mfwano ghwa chachu
(Lk. 13.20-21)
33Jesu ukawighoria wandu mfwano mzima sena, “Wuzuri ghwa mlungunyi ghoofwanana na chachu ereranganyiroghe ni muka umu andenyi ya vipimo vidadu va mufu, nagho ghose ghukawurushwa.”
Jesu kutumia mifwano
(Mk. 4.33-34)
34Jesu orewighorieghe wandu malagho ghose kwa mifwano, hata kuseko na mfwano ndereghorieghe ilagho jingi anduangi; 35eri agho ghereghoreloghe ni mlodi ghipate kukatia:
“Nichaghora nawo kwa mifwano,
nichawighoria malagho ghivisikie,
kufuma kuumbwa kwa wurumwengu.”#Zab. 78.2
Jesu kutambushira mfwano ghwa isaka jifwanane na ngano
36Nao Jesu ukalaghana na wandu, ukangia nyumbenyi; na wanughi wake wikamchea wikimzera, “Kuditambushire ugho mfwano ghwa isaka jifwanane na ngano mbuwenyi.” 37Jesu ukatumbulia, “Uo uwagha iro mbeu ndicha ni Mwana wa Mdamu, 38mbuwa ni wurumwengu. Mbeu ndicha ni wana wa ugho wuzuri. Isaka jifwanane na ngano ni wana wa uo Mmbiwi; 39na m'maiza uo orewaeghe ijo isaka ni Ibilisi. Makuwido ni kutua kwa ngelo, na awo wikuwidagha ni weke malaika. 40Sa iji koni ijo isaka jifungwagha na kukorwa modonyi, niko koni ichaakaia kutua kwa ngelo; 41uja Mwana wa Mdamu, uchawiduma weke malaika wake wiwikwanye na kuwiinja na mbai ya wuzuri ghwake, awo wose wiredagha kaung'a na wose wibonyagha wuwiwi; 42wiwikumbe kwa iwiwi ja modo ghubirie, na aho wichalila na kuja maghegho. 43Niko wahachi wichang'ala-ng'ala sa iruwa kwa wuzuri ghwa Ndee wawo. Uo uko na madu ghesikira ndesikire.
Mfwano ghwa mali rivisiro
44“Wuzuri ghwa mlungunyi ghwafwanana na mali ivisiro mbuwenyi. Mndumu uendaiwona, ukaivisa sena; ukaghenda kwa kuboilwa, ukauza vilambo vake vose orekoghe navo, ukaighua ija mbuwa.
Mfwano ghwa lulu
45“Sena Wuzuri ghwa mlungunyi ghwafwanana na m'bonyi biashara ulolagha lulu ndicha. 46Hata iji waiwona lulu imu ya zoghori mbaa, ukaghenda ukauza vilambo vake vose orekoghe navo, ukaighua ija lulu.
Mfwano ghwa nyavu na samaki
47“Sena wuzuri ghwa mlungunyi ghwafwanana na nyavu erekumbiloghe baharinyi, ikawada mbari rose ra samaki. 48Hata iji yameria kuchua, wandu wikairuda pwani, wikasea kidombo kusaghua; samaki riboie wikarikumba vikapunyi kwawo, na iro rizamie wikaridagha. 49Niko koni ichaakaia kutua kwa ngelo; malaika wichacha kuwiinja wandu wawiwi wifume kwa wandu wa hachi, 50wiwikumbe awo wawiwi kwa iwiwi ja modo ghubirie. Aho wichalila na kuja maghegho.”
Mafundisho mawishi na gha kala
51Niko Jesu ukawikotia, “Welee, agha ghose ghamtambukia?” Wikamtumbulia, “Ee.” 52Nao ukawizera, “Niko huwu, kula mwalimu wa Sharia uwuyagha mnughi wa wuzuri ghwa mlungunyi, oofwanana na mundu wa nyumba, ufunyagha kwa mali rake vilambo viwishi na va kala.”
Jesu kuleghwa aja Nazareti
(Mk. 6.1-6; Lk. 4.16-30)
53Nao iji Jesu wameria kughora iyo mifwano yose ukafuma aja, 54ukaghenda mzinyi kwawo. Ukakaia ukiwifundisha wandu andenyi ya sunagogi yawo, hata wikashinika wikighamba, “Mundu uhu wapatire hao hikima ihi na awa weke mwakilimbiti? 55Welee, uhu suo uja mwana wa msaramala? Mae ndewangwagha Maria, na waruna si weke Jakobo, Josefu, Simoni, na Juda? 56Na waruna wa waka wose ndewiko aha andwamweri nesi? Agha malagho waghipatire hao?” 57Nao wikaleghana nao. Ela Jesu ukawizera, “Mlodi ndesowagha ishima anduangi, isaakaia ni kwa isanga jake na kwa wandu wa nyumbenyi kwake!”#Joh. 4.44 58Aho nderedimieghe kubonya weke mwakilimbiti wengi, kwa wundu ghwa kulegha kurumiria kwawo.
ទើបបានជ្រើសរើសហើយ៖
MATHAYO 13: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
