Apostoro ikip oma kambi 5
5
5 Ik.
1Koroka, Ananias ari an reihei koro an guru anak ne koro machi Sappeira tura ukosanniyo wa, korope eiyok, 2aige, oro emko anire, koro machi ne yakka nei ambe eraman, awa, an emko koro wa ek hine Apostoro kotʼchikiri samta ande nisa ruwe ne. 3Koroka, Petros ene itak-hi :— Ananias, Ashkanne Ramat otta koshunge wa nei toi oro emkoho anire kuni ne nep gusu Satan anak ne e koro sambe shiktere nisa ruwe he an? nei ambe an ita anak ne eani yaikota korope shomo ne ya? 4Samata, aeiyok okaketa e koro kiroro ta an shomo ne ruwe he an? Hemanda gusu tap ambe e koro keutura ta e esanniyo ya? Ainu eun shomo e shunge koroka, Kamui otta e ko-shunge nisa ruwe ne. 5Orowa, Ananias anak ne nei itak nu chiki hachiri hine ramat arapare nisa: aine, obitta no okai nei orushpe nu utara shiri ishitoma nisa ruwe ne.
6Orowa, upen utara hopumba wa shinuma kokarakari hine ani wa iyurui otta omare nisa ruwe ne.
7Orowa, re ichi ji kan paki okaketa, koro machi anak ne nei orushpe erampeutek no ahun nisa ruwe ne. 8Awa, orota Petros ese wa ene itak-hi :— Nei oro gusu nei a toi echi eiyok nisa ruwe he an? Ruwe un, nei oro gusu eiyok nisa ruwe ne na, ari nei shiwentep itak. 9Koroka, orota Petros ene itak-hi :— Hemanda gusu echi utara anak ne Utarapa Ramat koramnukara kuni utura ukoramkon nisa ruwe he an? Ingarʼan, e koro hoku iyurui orota omare utara kotʼchikiri anak ne apa samaketa okai, aine, e ani wa soyumba kusu ne na, ari itak. 10Orowa, nani nei shiwentep anak ne shinuma kotʼchikiri samta hachiri wa ramat arapare nisa: aige, nei upen utara ahup wa shinuma rai shiri an sekoro nukara chiki, ani wa koro hoku samaketa iyurui otta omare nisa ruwe ne. 11Orowa, ramne karisia kata ne yakka, tap orushpe nu obitta no okai utara kata ne yakka, poro ishitoma-hi hetuku nisa ruwe ne na.
12Orowa, Apostoro koro teke ani inne no okai shiroshi newa iyokunnurep anak ne utara tumugeta aki nisa ruwe ne; aige, nei utara obitta shineatki no Soromon koro shem otta okai nisa ruwe ne. 13Koroka, moshima okai utara anak nei utara tura no okai kuni niukesh: yakka, 14utara anak ne nei utara pasere; orowa, naa naa eishokoro ki utara, inne no okai ainu ne yakka shiwentep ne yakka Utarapa otta ako-okaire nisa ruwe ne; 15utara anak ne machiya ruhu otta tashum ki utara sei wa shotki kata hene atarape kata hene hotkere pakno ne, tambe anak Petros shirikush chiki koro kuruhi poka nei utara tumuge un utara kashke-kamu kuni ne akarape ne ruwe ne. 16Samata shui, Yerusarem okari an machiya orowa no ne yakka inne utara anak ne tashum ki utara newa ichakkere ramat ashikatkare utara newa sei wa araki: awa, pishno aiwangere nisa ruwe ne na.
17Koroka, Kamui kora kenru iyotta esapane guru anak ne tura no okai utara obitta tura hopuni (nei 18utara anak ne Saddokai un utara ne), awa, ikoitupa aeshik koro, teke ani Apostoro utara kishima hine utara gusu an ipakashnu chisei ta ahupte nisa ruwe ne. 19Koroka, Utarapa uitekbe anchikara ta ipakashnu chisei koro apa maka wa nei utara soyumbare hine ene itak-hi :— 20Echi paye wa Kamui kora kenru ta roshki hine tan Inotu gusu an obitta no okai itak utara otta ye yan, ari itak. 21Orowa, nei utara tap ambe nu chiki, kunne-nisat pakita Kamui kora kenru ta ahup wa epakashnu nisa ruwe ne. Koroka, Kamui kora kenru iyotta pase esapane guru anak ne tura no okai utara tura ek, aige, ukoramkoro kuni utara newa Israeru un utara koro tono utara uwekarapare, awa, nei utara atak gusu ipakashnu chisei ta teshkara nisa ruwe ne. 22Koroka, auitek utara araki chiki, nei utara ipakashnu chisei ta isam shiri nukara; aige, hoshippa wa orushpe nure hene ene itak-hi :— 23Son no newa nei ipakashnu chisei aseshke wa an shiri chi nukara, samata, nei apa samta pungi utara okai an: koroka, apa maka ash chiki, nen ne yakka isam ruwe ne na, ari itak. 24Kamui kora kenru epungine tono newa nei kenru esapane iyotta pase utara tap orushpe nu chiki, hunak wa hetuku an orushpe ne ya? sekorʼokaibe gusu shi no utumotne nisa ruwe ne. 25Awa, shine ainu ek wa orota ene nure-hi :— Ingarʼan, ipakashnu chisei ta echi ahupte utara anak ne Kamui kora kenru ta roshki wa utara epakashnu shiri okai ruwe ne, sekoro itak. 26Tata otta Kamui kora kenru epungine pase nishpa anak ne tono utara tura arapa wa niwen shomoki no nei utara ani nisa; inambe gusu ne yakun, ikineipeka utara orowa no shuma ari apiyekara kuni aramu wa koishitoma wa okai ruwe ne gusu ne na. 27Orowa, atura wa okai yakun, nei ukoramkoro ki utara kotpokita roshkire nisa ruwe ne. Aige, Kamui kora kenru esapane iyotta pase guru anak ne nei utara otta uwepekennu wa ene itak-hi :— 28Tan reihei gusu iteki epakashnu kuni ne yupke no akashpaotte ash nisa: awa, ingarʼan, echi utara echi koro epakashi ani Yerusarem kotan shikte okere, aige, tan guru koro kem un kashi-omare kuni echi esanniyo koran ruwe ne, ari itak. 29Koroka, Petros newa Apostoro utara ese wa ene itak-hi :— Ainu utara orun koitaknu kuni ambe kasu no, Kamui orun koitaknu kunip chi ne ruwe ne. 30Chikoro ekashi koro Kamui anak ne chikuni otta echi eokte wa raige Yesu hetopo-shiknure nisa ruwe ne. 31Shinuma anak ne Sapane guru newa kashiobiukip ne kuni ne koro shimon tek sam un Kamui riknare nisa; nei ambe anak ne Israeru un utara ayaikokatpakte wa koro chikokatpak atusare kuni ne aki ruwe ne. Awa, chi 32utara anak ne tap orushpe gusu paweteshu ki utara chi ne, samata, otta koitaknu utara eun Kamui koropare Ashkanne Ramat ne yakka ene ani ne ruwe ne na, ari itak.
33Koroka, nei utara anak ne tambe nu chiki, sambe aotte gusu, ronnu kuni yainu nisa ruwe ne. 34Koroka, nei ukoramkor-i ta Gamarieru ari an reihei koro shine Parisee un guru, tuitak epakashnu guru, obitta no okai utara orowa no aainukoro guru ash wa nei utara irukai gusu asoyumbare kuni kashpaotte nisa ruwe ne. 35Aige, otta ene itak-hi :— Israeru un echi utara, nei utara gusu nekon a echi ikichi kuni orushpe yaikota yaikota yaitubare yan. 36Inambe gusu ne yakun, tap etokota Teudas hopuni wa yaikota nenka ne sekoro ye; aige, ine ashikne hotne utara shinuma otta kotuk: awa, nei guru araige; orowa, shinuma koitaknu utara obitta shitchari wa isam ruwe ne. 37Tan guru okake, auwatori an toho ta, Gariraya un Youdas hopuni wa okai utara shiren: shinuma ne yakka aisamka; orowa, shinuma koitaknu utara obitta shitchari nisa ruwe ne. 38Orowa, tane echi otta ku ye, tan okai utara iteki ekottanu yan, moshima no okai yan: inambe gusu ne yakun, tan esanniyo hene, tan iki ikip hene ainu utara orowa no an ambe ne chiki, aisamka kusu ne: 39koroka, Kamui orowa no an ap ne yakun, echi utara anak ne nei utara isamka eaikap ruwe ne; ikineipeka echi utara Kamui epeka ukoiki kuni anukara kusu ne na, sekoro itak. 40Orowa, orota nei utara ramuoshma nisa: aige, Apostoro utara shihekote hotuyekara chiki, shirikik wa Yesu reihei gusu iteki ye kuni ikashpaotte, aine, honnere nisa ruwe ne. 41Tambe gusu nei utara anak ne nei ukoramkoro ushi wano paye, aige, nei Reihei gusu akoatcha kuni aesanniyo utara ne sekoro aramepakari gusu yaikopuntek nisa ruwe ne. 42Orowa no kesto Kamui kora kenru ta hene koro uni ta hene, yomne shomoki no Yesu anak ne Kiristo ne sekoro epakashnu hene ki eupaskuma hene ki nisa ruwe ne na.
ទើបបានជ្រើសរើសហើយ៖
Apostoro ikip oma kambi 5: AINU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© British and Foreign Bible Society 1897, 2018
