Nangi̱n Fandubi̱m 19
19
M Bulus a yika Afisa
1Ki̱dangu n Afolos a Korintiyangu, m Bulus a kana fantiyu we bwako a fwadu a Afisa, bwanu a ya tekami̱n n ti bi̱kam miyari̱me. 2N ki̱n a bi̱u chi ko, “Ti̱yiu fi̱kumi wauwadi̱mu yoko ta ke bi̱yili̱ma?”
Yinu n chi a ke ki̱mi̱n ko, “Nang yimbu, nang nweenti̱bu ya̱m Fi̱ki̱m Kwamamu we.” 3Yinu m Bulus a bi̱u chi, “Yoye ti̱ma bi̱bi̱le ki̱dum batisma? N chi a ke ko, ‘Nang dumu n Yowana a mamu.’ ”
4M Bulus a yi ko, “Batisma Yowana di̱ne ke ni̱bu a wo ki̱ti̱m. N ki̱n kiyi ni̱bu ko a ke bi̱yili̱mu we nii wu ka bedu a kuteng kange, ka nang chikiye n Yesu.” 5Yinangu a nwe bi̱bangu, a ma chimi̱n batisma a di̱n Tewuduwe Yesu. 6Ki̱dangu m Bulus a yo fa̱lliyangu, Fi̱ki̱m Kwamamu a be chimi̱ne. N chi a fwa ya̱mu ki̱ni yikai yiini yinu a mati̱n fa̱kuitu. 7Ni̱bu we fikomu ki̱ni kwang, n chi kubu chiri burau.
8Yinu m Bulus a le Kan muraku ni̱bu Yafudamu a ma swarti ti̱ta ki̱fwa ya̱mu a ne tayi we. N ki̱n ki̱tukadu n ti chi ki̱funti̱ bwi ka yo chidu ka swan ya̱m yaa Kwamamu. 9Aya bi̱bi kuli̱ni̱mu a ko a kebi̱ bi̱yili̱mu, n chi ki̱fwa ya̱mu a li̱mbi̱li̱mem we ni̱bu ki̱bunti̱ wa̱re Tewuduwe mu. Di̱ne yiko, m Bulus a yikan n ti ni̱bu bunti̱ki̱mu a du chi. N ki̱n a ya a swe a fii miyake Tiranus ki̱miya chimi̱nuwe diti ki̱da̱ng. 10N ki̱n a chau kakki ki̱n we fiko swa̱ti̱ti turau, ti̱tu a yo ni̱bu Yafudam n ti Yelena a swe a ti̱m Asiyamu a nwe ya̱m Tewuduwe mu.
Bwesim Sikam
11N Kwama a ma chi ya̱r yiitu nabwen ti̱tu ni̱bu a kuunbuwetu a fa̱la̱ng Bulusang. 12Di̱ne kono nang di̱lukten di̱yili̱n ki̱nu ka luke wu a bwi kiye, ni̱bu ki̱ da̱du ki̱ni ni̱bu a bubuwemu ka a twaiye, buri̱n chitu ki̱bedu ki̱fi̱bti yibwilayu ki̱chiru. 13Bi̱kam ni̱bu Yafudam we ki̱bwa̱ladu we bi̱nti̱tu ki̱chaku fi̱ki̱m bi̱bwilamu. N chi a funti̱bwi ka ma nangangu ki̱ni di̱n Tewuduwe Yesunu we bi̱bu ki̱ni ki̱fi̱bti yibwilai. N chi ki̱fwadu ko, “Mi̱n ya̱nu we di̱n Yesunu, m Bulus ki̱mang di̱mwari̱nu, chirmi̱n!” 14Bwesi̱m Sikam wuduwe fansetiyeyu wu a ni̱bu Yafudiyame chi bi̱dibiin ki̱mati̱ ki̱chitu wu.
15Wuka di, ki̱fi̱bti yibwilayu a ke chi mi̱n ko, “N yim Yesu, n yimti̱ Bulus, aya ti̱n n bi̱wure?”
16Yinu nii wu ki̱ni ki̱fi̱bti yi̱bwilaye a da chimi̱ntuwe, a la dukan chi̱ni kwang. A ngau chi a nwe chimi̱n burang, a yo n chi a chiri twatwad we lo ki̱ni bwiti susur ka ki̱tum. 17Yinangu ni̱bu Yafudamu a swe a Afisa n ti Yelena a nwe ya̱m bi̱bangu, tayi a tau chi ki̱ni kwang, di̱n Yesu Tewuduwenu ka ya ri̱kaku. 18Ni̱bu nabwen bi̱bu a ke bi̱yili̱mu a chire ki̱fwa ti̱bwilaitu n chi a no ki̱maditu kwa̱rikwa̱ri. 19Ni̱bu nabwen bi̱bu a no ki̱ma buwamu a chake kuli̱ni buwangi chitu a be twi a fiwiine we nuyi ni̱biyu. Kangu n chi a ki ka̱mbi̱r kuli̱ni ti̱tangu, a da̱ng ka lam ka̱mbi̱r suren kuuni wan tunu. 20Nang tiyangu ya̱m Tewuduwe a ti̱ran a mati̱ dukanu yinangu.
Kulangkulange a kun we Afisa
21We kuteng ki̱ku ti̱chituwu a fwengu, m Bulus a nwe Fi̱ki̱mu a twai ni̱r ki̱nu a yi ko ka ya Wurchalima ka bunti̱n Akaya n ti Makidoniya yinu ka yika Roma. 22N ki̱n a tum ni̱bu nanganmu n chi burau, ka nang chikiye n Timoti n ti Yeratu ko a ya Makidoniya. N ki̱n a swe we ti̱m Asiyamu.
23We ki̱dang kangu, ya̱m bi̱duum a kun we Afisa yinang yinang di̱ne wa̱re Tewuduwe n Yesu. 24Di̱ne wuka nii we di̱n ki̱nu n Dimitiriyu, wu ki̱medu ki̱mu di̱yor Artemis ki̱ni asurfa. N ki̱n n ti ni̱bu nanga komu ki̱dii ka̱mbi̱r we nangang ki̱ku yinang. 25N ki̱n a yal ni̱bu ki̱ma nangang ki̱ki̱mu n ti bi̱bu nangang chiyangu a fi wiinemu a yi chi ko, “Kal mi̱n, ti̱yim kuli chi̱retu ni yadu a nangang ki̱ku. 26Yinu ti̱kudu ti̱nweti̱du n ke ka Asiya, we ti̱m Afisa ti̱nti̱n nii wu ni̱bu ki̱yalu ko m Buluse, wu a butu ni̱bu nabwene, a sute ni̱tu chitu di̱ne ki̱fwa chimi̱nu ko a siidu kwali̱n chi̱nu ni̱bu a mubbi fa̱linu we. 27Ki̱kumang yare we, n ke nangang chirengu yaka kaiyadu, kono nang se wuduwe wuwiye a Artemis, yaka kau ti̱kusi. Ki̱siyang wuwiye wu ni̱bu ki̱sii ki̱nu we ti̱m Asiyamu kwang a lanti̱ ti̱ti̱nitu ki̱siide, ka kwala dwiyen kitu.”
28Yo muraku chiyangu a nwe ya̱m Dimitiriyusi̱me, a kuni kulangkulang ki̱ni kemi ko, “Artemis wu a Afisa wuduwe!” 29Bi̱nu ki̱ni kwang a muten, ni̱bu a chir a yawe bwana murake, ki̱wuba Ka̱yus n ti Aristakus ni̱bu Makadoniyamu n chi fati̱bi̱ Bulus. 30M Bulus a no ke ka le muraki̱ ki̱ku, aya ni̱bu bunti̱ki̱mu a ko ki̱mi̱n. 31Ko no nang bi̱kamu bi̱duum mati̱m we Asiya bi̱bu ki̱ma fati̱n n ti Bulusi̱mu a ko ki̱mi̱n ko a ledu muraki̱ ki̱ku we.
32Ko no nang bi̱bu a ya muraki̱mu a muten, a yimbu chi a yo n chi a murane. Bi̱kamu ni̱bu ki̱kukku keru ki̱fwa ti̱tu, aya bi̱kamu ka kukku kerre ki̱fwa ti̱kan chi dang. 33Bi̱kam ni̱bu Yafudam a yo Aleksanda a kakku, n ki̱n a kuku fa̱la̱ngu ko ni̱bu a lemi̱n ke ki̱fwa chimi̱n. 34Aya yinangu n chi a swaan ko n ki̱n naba ni̱bu Yafudangu, n chi a su keme ko, “Artemis wu a Afisa wuduwe!” N chi a tau ki̱ma ti̱chituwu a lam awa yurau.
35Yinu naba mwalke bi̱ne a yo ni̱bu a lemi̱n, n ki̱n a yi chi ko. “Ni̱bu Afisa, n kawure a yimbu ko bi̱n Afisanu nang di̱du ki̱to se wuduwe wuwiye Artemis, n ti kale wu wauwade a swiye a diye. 36Yo ya̱m bi̱bu a ne nii ka kwilade we, a dakan tanodi wudidi, ti̱wa̱rtadu chi we. 37Ti̱da̱ng ni̱bu ta be ki̱n a fimu, a mabu kutu we se yinu a fwati̱bu bi̱kam ya̱m bi̱bu a swa̱ba ku we dur di̱yor wuwiyenu. 38Aya ka n Dimitiriyu n ti fati̱bu nangang kangi̱mu ki̱ni bi̱kam ya̱m n ti wuka niye, kan kabaki̱nu we ki̱ni wuti̱l, ni̱bu kabaki̱mu we, a ya mai keme. 39Aya ka ti̱kan chi we ti̱tu ti̱badu ta yindite, kwa̱l ni̱bu kabaki̱nu we ka do ti̱nu. 40Ki̱ka̱ngu tayi a tau ni̱n, di̱ne n chi̱ni ni newe ki̱ni kwari̱lle wu niin tiin kakku we chi a yo kusi̱r di̱de. Ki̱ka̱ngu ka bi̱duum Romamu a bi̱u ni ko ni ma kusi̱r di̱du a wureni̱ne, n chi̱ni ni ne di̱ki̱li̱n yiin we.”
41A kuteng ki̱ku a fwa ya̱m bi̱bangu, a yai ni̱bu ko a yikan.
ទើបបានជ្រើសរើសហើយ៖
Nangi̱n Fandubi̱m 19: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
