Nangi̱n Fandubi̱m 20
20
M Bulus a ki̱la Makidoniya n ti Yellas
1A kuteng ki̱ku kusi̱ru a tiyangu, m Bulus a kum ni̱bu bunti̱ki̱mu mi̱n ni̱tu, yinu a du chi a yika Makidoniya. 2Yo n ki̱n a kana bi̱nti̱te, a kum chimi̱n ti̱n ni̱tti̱tu yinu a yika Yellas. 3N ki̱n a ma swarti ti̱ta we fiko. A kuteng ki̱ku n ki̱n a no ki̱baddu ka yika Suriya aya n ki̱n a be swaan ko ni̱bu Yafudamu a do ka chi̱u ki̱nu we kwa̱mbi̱re mwe. N ki̱n a to yiko, a sute ti̱kurantu a bunti̱ Makidoniya. 4N Sufata bwe Farus wu a Biriya n ti Aristakus n ti Sakundus, ni̱bu Tasalonika n ti Ka̱yus wu a Darbe, n ti Timoti a lanti̱ Tikiku n ti Tarofimu ni̱bu Asiyamu a ya yo ki̱ne.
5N chi a chakakku a yan ni̱n a Toruwa. 6Yo Yiye Yabake wu a ki̱danniye a suwe, ni̱n kun we filibi wu a Makidoniya ni̱n le kwa̱mbi̱re mwe ni̱n ya yayu diti yuunu yinu ni̱n ya chi a Toruwa. Ni̱n ma ditiyi yidibiin we Toruwa.
M Bulus a swan di̱siir ki̱nu a Toruwa
7We difi̱kare Yafudawayu, ni̱n muran ni̱n kera ki̱danniyu. Yinu m Bulus a fwa ni̱bu mi̱n ya̱mu di̱ne ki̱baddu ka yikadu ki̱ni si̱n. N ki̱n a fwa ya̱mu a lam ki̱tangti̱lang kuma̱ng. 8Fiti̱latiyu nabwen we kanu nang murami̱n a diinu. 9Wuka bwele we di̱n ki̱nu n Yutiku wu a swe a wunduwe, yo a yaki̱ nwe ya̱m Bulus a ribidati̱me, duum a da̱u ki̱n we fiko. N ki̱n a yare we wundu we kan di̱din di̱du a diinu ki̱ni ti̱kwa̱li swaniti ti̱tantu, a bwa ti̱n. 10Yo m Bulus a su ti̱me, a sung a da̱u ki̱n, a yi ni̱bu ko, “Ti̱kaiyu ni̱r we, n we ki̱ni ti̱kuritu.” 11Yo m Bulus a ki̱lati̱ kan diinu we, a kera ki̱danniyu ni̱n chau. A chakakku ki̱ni ya̱mu a lami̱nti̱ yo ti̱mu a kwiyane yinu a yikan. 12Ki̱ni yiko, n chi a yikani ki̱ni bwele li̱mang. Ni̱tu ni̱bitu a ribetuwe.
N chi a kun we Toruwas a yika militus
13N ni̱n ni̱n chakakku ki̱ni yayu we kwa̱mbi̱re mwe ni̱n yika Asus bwanu yana da̱u mi̱ne Buluse. N ki̱n a do yiko di̱ne n ki̱n a ke ka ya yayu ki̱ni nang. 14Yo n ki̱n a be ya ni̱n we Asus we, ni̱n da̱u ki̱n we kwa̱mbi̱re mwe ni̱n yika Miti̱lene. 15Yinu fal ni̱n chakakku ki̱ni yayu we kwa̱mbi̱re mwe. Bafi̱nenangeko, ni̱n lam Kiyos. Wuka di ti̱n ni̱n lam Samon. Wukane ti̱n ni̱n lam Miletus. 16M Bulus a no kebu ka si̱ki̱du we Afisa di̱ne a babu ka kai ki̱swi we Asiya, n ki̱n ki̱wa̱rtadu ki̱baddu ka le Wurchalima kuteng yiye fentikose.
M Bulus a fwa Seli̱bu ni̱bu bunti̱ki̱m mi̱n ya̱m
17We Miletus m Bulus a tum chitu we Afisa ko ni̱bu a yal ki̱mi̱ne seli̱bu ni̱bu bunti̱ki̱ bi̱duumu. 18Yo n chi a be, a yi chi ko, “N ti̱ni̱n ti̱fwan ti̱yim yinangu mang swe n ti chi̱nangu a mwetuwe di mang mwe mang le Asiya. 19Mi̱n si Tewuduwe ki̱ni bwanu we riye mi̱n nwede. M mu ni̱ru we swa̱ka̱ku ni̱bu Yafudamu a tau ki̱ma midangu. 20Ki̱ni yiko mang yung chi̱n chi ka maka chi̱ne, mi̱n ma chimi̱n di̱mwaru n ti miyaki̱ki kwa̱rikwa̱ri, mi̱n bunti̱ loni loni. 21N ngau ni̱bu Yafudamu n ti Yelena mi̱n ki̱kure mi a wo ki̱ti̱m a ke bi̱yili̱mu we Kwama Tewuduwe n Yesuwe.”
22Aya ki̱ka̱ngu mang ri ki̱ni fi̱ki̱me mi̱n yika Wurchalima, we bwako mang yimbu chi ka fweditu. 23Yinangu mi̱n kana bi̱nti̱tangu, Fi̱ki̱m Kwamamu ki̱yungiyu we ni̱ru ko riye n ti leku di̱bi̱nti̱lang ki̱yaiyu. 24Aya ti̱kuri mitu n ke chi ka no we mang wul banangu mang ri nangangu n Tewuduwe n Yesu a ni ko ke m ma di̱mwar ya̱m ki̱mu n ti li̱me Kwama.
25Di̱ne n tu n yim n ti̱ni kwang a ne ta kui ti̱nu ki̱da, di̱ne yiko m bwa̱l we tibe chi̱n mi̱n ma chimi̱n di̱mwar yaa Kwamane. 26Di̱ne yiko, mi̱n fwa chimi̱nu mi̱n n newe ki̱ni ki̱le we dur wuka niin. 27N tu n fwa chimi̱n chi Kwama ki̱bade kwang.
28Ti̱soo yichiyu, ti̱kur ki̱ni kwanti Kwamayu yiyu Fi̱ki̱m Kwamamu a du a fa̱li chi ko ti̱toyu. Ti̱chakakku ti̱nang to ni̱bu bunti̱ki̱ bi̱bu Kwama we ki̱tum ki̱mu a wuwe chi, n ki̱ni ki̱fwane. 29N yim a kutengu mang yikadangu, yikai bawuti ni̱bu ti̱kwanim ka le tibe chi̱n, ka swe ti̱nu we kwanti Kwamayu. 30Ko no nang bi̱kam chimu, ka kunnu ka ni̱n mwera ti̱kwanitu di̱ne ke chi butu ni̱bu bunti̱ki̱mu a ki̱la ba̱la̱ng chiyang.
31Di̱ne yiko, ti̱ma ki̱yolang, ti̱kur swa̱ti̱ti ti̱tta mang swe n ti chinitu. Yinangu mi̱n to chi̱nu mi̱n ngau chi̱n mi̱nti̱n ki̱kure kum n ti kukongu n ti riye mi̱n nwedu di̱ne chi̱ne. 32Ki̱ka̱ngu n du chi̱n a fa̱la̱ng Kwamangu, li̱me ko a swe n ti chi̱n, nang chi ka mu chi̱nu, ka yodu ta ya kula n ti bi̱bi wauwadi̱me.
33Mang kubebu ka̱mbi̱r ka kuli̱n niine. 34N ti̱n n ti̱fwan ti̱yim m ma nangangu ki̱ni fa̱li mi ke n ya chi mi̱n badditu, m ma bi̱kamu mi̱nti̱ chi ki̱badditu. 35We ti̱ti kwang mi̱n yung chi̱nu yinangu ta maka ti̱lusanitu ka ti̱ni bobu ti̱ma nangange. A dakan ta kur ya̱m Tewuduwe Yesu a fwa ko, “Ni ki̱ku a la yiki̱ku ki̱ni delaki̱ku.”
36A kutengu a ri ya̱ma̱ngu, a sung a twa̱ba̱ bunitu n ti chi. 37N Chi a ma furi ki̱linu nabwen. N kawure ki̱kwar Bulus ki̱sidu ko a ya li̱mang. 38Furi ki̱lin chi̱nu di̱ne ya̱mu a fwa chimi̱n ko ka ma bwar chi teka ti̱nuwemu. N chi a bunti̱ Bulus a yo we kwa̱mbi̱re mwe.
ទើបបានជ្រើសរើសហើយ៖
Nangi̱n Fandubi̱m 20: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
