Nangi̱n Fandubi̱m 18
18
M Bulus a ma di̱mwar a Korinti
1A kuteng ki̱ku, m Bulus a chir we Atina a yika Korinti. 2We bwako n ki̱n a ngaban n ti wuka naba Yafuda di̱n ki̱nu n Akila, naba bi̱n Fontu. Aya n Akila n ti nayeko m Biriskila a mabu ke yinangu n chi a ki̱lawe Yitaliyangu. Di̱ne n Kalaudiyu a na yilang ko ni̱bu Yafudamu ki̱ni kwang a du ti̱m Romamu. Yinu m Bulus a ya bwana di̱chiye. 3Yade n chi ka ni̱bu ki̱ti ti̱kubime, n ki̱n a swe n ti chi ki̱ma nangangu ware. 4Kanang wuwule difi̱kare ni̱bu Yelenamu, n ki̱n ki̱le kan muraki̱nu ki̱funti̱bwi we tukaku ko ke ki̱wuba we ni̱bu Yafudamu n ti yikayu kuuti.
5Ki̱dangu n Silas n ti Timoti a be we Makidoniyangu, m Bulus a da̱u ki̱swi ko, ki̱ma di̱mwaru ki̱fwa ni̱bu Yafudamu mi̱nu we bi̱yili̱m Yesu nang Masiya. 6Aya ni̱bu Yafudamu a le swa̱ba Bulus ki̱tura ti̱nu, n ki̱n a ngau kuli̱n ki̱nu fi̱ti̱b ko, “Ni̱bu ka bau ki̱tuum chimu a dutu chi̱n!” Mi̱n n chir we bi̱bu. A mwetuwe diwu mang ki̱ladi bi̱bu n chi n ke kuu ni̱bu Yafudame.
7M Bulus a chir we kan muraki̱nu a yika lo Titus, Yustus naba kuu wu ki̱sii Kwama. Loko a kwatuwe kan muraki̱nu. 8N Kiribu wuduwe kan muraki̱ne a ke bi̱yili̱mu we Tewuduwe n ki̱n n ti di̱kur lon ki̱nu. Ni̱bu Korintiyam we fikomu a keti̱ bi̱yili̱mu yinangu a nwe ya̱m Bulusi̱mu, n chi a mati̱ batisma.
9Ki̱ni kum wuka di, n Tewuduwe a fwa Bulus mi̱n yam a dwakam bi̱yili̱m ko, “Nwedu tayuwe, nang fwa ya̱m Kwamamu dudu we. 10Di̱ne m mi̱n we n ti mun, a ne ni ka ma mi̱n ti̱kan chiye we, di̱ne mi̱ni ki̱ni ni̱bu nabwen we bi̱n di̱du.” 11M Bulus a ma swa̱r we bi̱n di̱du ki̱ni swarti turukuun, ki̱miya chimi̱n ya̱m Kwamamu.
12Yo n Ka̱liyo ki̱ma mati̱n a ti̱m Akayamu we diti yikiyu, ni̱bu Yafudam a ruki̱ yichiyu a bwila Bulus mi̱n, a yikan kwa̱l kabaki̱n. 13N chi a yi ko, “Nii wu ki̱funti̱ bwi ki̱yo ni̱bu ki̱sii Kwama a wa̱re wu yilang chirengu a konge.”
14Yo m Bulus ki̱funti̱bwi ka fwa ya̱me, n Ka̱liyo a yi ni̱bu Yafudam ko, “N Ki̱n nii wu a no ma wuwule ki̱le, ka ki̱le wuduwe mi̱n baddu mang yindu. 15Aya ka nang ya̱mi baskaku ti̱kwa̱liyitu n ti di̱nbitu n ti yili̱n Musante, n ti̱n n ti̱fwan, ti̱nang kusadi ki̱n a ne lwangang mang we, mi̱n mang kababu ki̱dum ya̱m bi̱bumu.” 16N ki̱n a kaka chi we kan kabaki̱nu. 17N chi a kun a tau Sostanus, wuduwe kan muraki̱ne, a ngau a tanti̱lange kan kabaki̱ne, aya a kubu Ka̱liyo ni̱r.
M Bulus a ki̱la Antakiya
18A kuteng ki̱ku m Bulus a ma yikai diti we Korinti, yinu kebu ni̱bu bunti̱ki̱mu a yi ki̱n ko a ya li̱ma. N ki̱n a le Kwa̱mbi̱re mwe n ti Biriskila n ti Akila a yika Suriya. Aya yo n chi yaka yikade, m Bulus a kwal dur ki̱nu kwale we Kanki̱riya. 19Yo n chi a lam Afisa, m Bulus a du Biriskila n ti Akila, n ki̱n a le kan muraki̱nu ki̱tukadu n ti ni̱bu Yafudamu. 20N chi a wana ki̱n ko a dati̱ yikai diti, aya n ki̱n a ko. 21Aya yo yaka du chide a yi ko, “Mang ki̱late bwa di̱ chi̱ne we ka n Kwama a ke miye.” Yinu a du Afisa, a le kwa̱mbi̱re mwe a yikan ti̱n. 22Yo n ki̱n a lam Kaisariya, a sub a si ni̱bu bunti̱ki̱mu yinu a suu a yika Antakiya.
23A kuteng ki̱ku n ki̱n a da ditiyu nabwen we Atakiyangu, a kun a yika Ka̱latiya n ti ti̱m Firichiya ki̱bunti̱ ka nang di̱di̱le bi̱ne, ki̱ru ni̱bu bunti̱ki̱mu we keku bi̱yili̱mang chiyangu.
24A kutengu niyang dami̱nangu, wuka naba Yafuda di̱n ki̱nu n Afolos a ya Afisa. N ki̱n naba Aleksandiriya, ni wu a me kasi fwaku ya̱ma̱ngu, a yim ya̱m Kwamamu ni̱bu a mwal yinang yinang. 25N ki̱n a ya yungku a wa̱re Tewuduwe. N ki̱n ki̱funti̱bwi we bale fwaku ya̱me, ki̱miya kasi bi̱yili̱mu we dur Yesunu. Aya n ki̱n a yim ka ya̱m batisma Yowana. 26N Ki̱n a mwe ki̱fwa ya̱mu ki̱ni dukan yinang we kan muraki̱nu. Yo n Biriskila n ti Akila a nwe ki̱ne, n chi a yal a ki̱swi yinu a su ki̱mi̱n furu ki̱ni ya̱m Kwamamu yinang.
27Yo Afolos ki̱baddu ka yabu bale ti̱m Akayame, ni̱bu bunti̱ki̱mu a maka ki̱n. N chi a mwal ni̱bu bunti̱ki̱mu a Akayamu mi̱n lwangi̱n ko ke a yiu ki̱n kaniyi yurau. Yo n ki̱n a lam bwako, a kabi ki̱ni makaku we bi̱bu a ke bi̱yili̱mu di̱ne li̱me Kwamamu. 28Di̱ne n ki̱n a la ni̱bu Yafudamu nabwen we tibe ni̱be, ki̱yung chidu a ne kamakuwe, we yinangu tatti̱ki̱daiyu a fwa ko n Yesu nang Masiyangu.
ទើបបានជ្រើសរើសហើយ៖
Nangi̱n Fandubi̱m 18: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
