Nangi̱n Fandubi̱m 15
15
Kwa̱l ki̱kati ni̱bu bunti̱ki̱m a Wurchalima
1Yo m Bulus n ti Barnaba we Antakiya, bi̱kam kebu a be a Yafudiya be ki̱miya ni̱bu mi̱nu ko, “Ka ta biibu laaru yinangu yilang Musangu a fwange, a ne ta ya yuki̱ku.” 2Ti̱tu a yo Bulus n ti Barnaba a le tukaku we ya̱m bi̱bu. A kuteng ki̱ku, n chi a tum Bulus n ti Barnaba n ti bi̱kam ni̱bu bunti̱ki̱m, ko a ya Wurchalima bwanu a fandubu n ti seli̱bu ya̱m Kwamame, a twaya we ya̱m bi̱bu n ti chi. 3A kuteng ki̱ku ni̱bu bunti̱ki̱mu a yomi̱ne chiyangu, n chi a tau Finikiya n ti Samariya ki̱fwa ni̱bumi̱mu yinangu yikayu kuuti a ke bi̱yili̱mangu. Ti̱tu a yo ni̱bu bunti̱ki̱mu a ma ti̱mi̱lan. 4Yo n chi a lam Wurchalima, ni̱bu bunti̱ki̱mu n ti fandubu n ti seli̱bu kani̱mu a yiu chi kani yurau. Yinu n chi a fwa chimi̱n yinangu Kwama a maka chi we nangi̱n chitangu.
5Yinu bi̱kam ni̱bu bunti̱ki̱m bi̱bu a ki̱swi kwa̱l ni̱bu Farisamu a kun a ti a fwa ko, “Ni̱bu bi̱bu a wo ki̱ti̱m, n chi n ke ni̱bu Yisrelamu, a mwintuwe ka bii laaru yinu ka bunti̱ yilang Musangu.”
6Fandubu n ti seli̱bu a muran ka ta̱l ya̱m bi̱bu. 7A kuteng ki̱ku n chi a da̱u ki̱swi ki̱tukadu we muraki̱ chiyangu. M Biti̱r a kun a yi chi ko, “Kebi̱mi̱m, ti̱yim n Kwama a suti feredi we tibe chi̱n ko ke ni̱bu a yikayu kuuti a nwe ya̱m bi̱li̱mu a ke bi̱yili̱mu. 8N Kwama wu a yim ni̱tu ni̱bite, a yung ki̱yiu bi̱bu n ke ni̱bu Yisrelamu yoko a ni chi Fi̱ki̱m bi̱bi wauwadi̱me, yinangu n ki̱n a ni chiniyangu. 9N ki̱n a yungbu lakaku we tibe chire n ti bi̱bu n ke ni̱bu Yisrelamu, di̱ne ni̱tu chitu a nuran we keku bi̱yili̱mang chiyangu. 10Di̱ne yiko, a mayire ti̱swe Kwama ti̱yo miyari̱mu mi̱n ki̱daddake, chi a ne dwal da̱kke, ka nang chikiye, yili̱n ti̱tu a bwa tukebi̱ chirem n ti chinitu. 11Aya ni̱n ke bi̱yili̱mu, n chi̱ni kwang ni swi a wa̱re wiin, wu nang wa̱re li̱me Tewuduwe n Yesuwe.”
12Ni̱bu a murani̱mu a le si̱ng ki̱nwe ya̱mu m Barnaba n ti Bulus ki̱fwa chimi̱ni̱mu we chi ka̱ta̱kitu n ti chi ya̱r yiitu n Kwama a ma chimi̱n we kuuti n ke ni̱bu Yisrelamu. 13Yo n chi a riye, n Yakubu a yi chi ko, “Kebu mi̱m ti̱ nwei. 14N Simun a fwa chimi̱n yinangu n Kwama a mwe ki̱yung yikayu kuuti mi̱n mi̱laku we yo a da̱u ni̱bu n ke ni̱bu Yisrelamu a kau bi̱ki̱me.” 15Bi̱bu fal a wuran bwi ki̱ni ya̱m fa̱ku a mwal ko,
16“A kuteng ki̱ku
mang ki̱lawedu be mang
muti̱ lon Dauda a yare we.
Kasi ki̱ku a wurenangu, mang muti̱nuwe
Mang kukuti̱nu we.
17N Tewuduwe a yi ko nang
wa̱re yikayu kuuti ka ban mi̱ne,
n chi ka kau bi̱suti̱ri̱m mi̱m.
18N Kwama a fwa ying, n ki̱n wu a yung
ni̱bu ya̱m bi̱bu ferediye.”
19“M mi̱n n ku a da yiko, a dakabu ni fuma bi̱bu n ke kuu ni̱bu Yafudamu bi̱bu ki̱ke bi̱yili̱mu a di̱Kwamamu. 20Chi mang ku ni maditu, ni tum chimi̱nu ko a chadu chabtu ti̱yobitu we n ti yaritu, n ti naiyu ni̱bu ki̱sakkwiru sabeyu n ti ki̱tuum. 21Nangki̱n we feredi ka nang di̱di̱le bi̱ne ni̱bu yungki̱mu we n ti yilang Musangu, ni̱bu ki̱kidu we kambi Kwamatu difi̱kare ni̱bu Yafudamu.”
Lwangi̱n di̱ne ni̱bu bunti̱ki̱mu a yikayu kuutimu
22Yinu fandubu n ti seli̱bu n ti ni̱bu bunti̱ki̱mi kwang, a sutu bi̱kam ni̱bu a tum a Antakiya, n chi n ti Bulus n ti Barnabas ke a be fwa chimi̱n chi we muretu. Seli̱bu ni̱bu bunti̱ki̱mu a swabi̱mu n Yafuda (wu ni̱bu ki̱yalu ko Barsaba) n ti Sila. 23N chi a tum fandubu n ti seli̱bu ki̱ni lwangi̱n ya̱m bi̱bi̱nu we Ki̱likiya n ti yikai kuuti:
N ni̱na kebu chim fandubu ni̱bu bunti̱ki̱m. Ni̱n mwal chimi̱nu n ti̱n bi̱bu n ke ni̱bu Yafudamu a Antakiyamu n ti ti̱m Suriyamu n ti Kilikiyamu, ni̱n sii chinedu nabwen!
24Ni̱n nwe bi̱kam ni̱bu we tibe ni̱n ki̱kwau chi̱nu ki̱ni ya̱m bi̱kusi̱m ki̱miya chimi̱n bi̱kam ya̱m bi̱bu nang yimbu bwana chirmi̱nem. 25Nang chi a yo nang ku a da nang sutu ni̱bu nang tum chimi̱nu n ti fati̱bu nanganmu, m bi̱u Barnaba n ti Bulus, 26n chi bi̱bu a ni dutu chitu di̱ne di̱n Tewuduwe Yesu Masiya. 27Di̱ne yiko ni̱n tum chimi̱ne Yafuda n ti Silas. N chi chifwan ka fwa chimi̱n ya̱m ni̱mu yinangu we mi̱nangu.
28“A le yiko we Fi̱ki̱m, n ni̱n ni̱n da̱ng a le ni̱mi̱n ti̱n ta swaan ya̱mu ke a kau chimi̱nuwe ki̱ni tureng, 29kanang chikiye, niku ki̱tuum a di̱yorangu n ti chakku ki̱tuumangu, n ti wuku nam wu ni̱bu a sakkwirusabbe n ti yaritu. Ka ti̱ soo yichiyu we ti̱te, ti̱ma chitu a daantu yinange. N du chi̱n li̱mang.”
30N chi a kun a yika Antakiya, a ya mur ni̱bu, a ni lwangi̱n di̱du. 31Yo ni̱bu a ki lwangi̱n di̱de, a nwe ta̱ma̱ng di̱ne lwangi̱n di̱du a su chimi̱n runi. 32N Yafuda n ti Sila, di̱ne n chi fa̱kubu Kwamame, a ngau kebi̱bu mi̱n ki̱kure ki̱ni ya̱miyu a kum chimi̱n ti̱n ni̱tti̱tu. 33A kuteng ki̱ku n chi a ma wanditi we bwako, yinu a sikan n ti kebu ni̱bu bunti̱ki̱mu a du chi a ki̱la bwa ni̱bu a tumi̱ne chiye. 34[Aya n Sila a ke ka swedu we bwako.]
35M Bulus n ti Barnaba a swe we Antakiya ki̱maka ni̱bu bi̱bu ki̱yungdi̱mu n ti bi̱bu a fwa ya̱m bi̱li̱m Tewuduwemu.
36A kuteng wanditiyangu, m Bulus a yal Barnaba ko chi yika siram a bi̱nti̱tu no n chi a ma mi̱ne di̱mwar di̱kwa̱l ya̱m bi̱li̱m Tewuduwe fereditu, ke chi ku yinangu n chi ki̱madangu. 37Aya m Barnaba a no ke ka yikadu n ti Yowana wu n chi ki̱yalu ko m Markuse. 38Aya m Bulus a ko di̱ne m Markus a du chi we Famfiliya a ko a yikabu ware n ti chi. 39Tukaku chiyangu a ma dukan a mwintuwe n chi a yaran. M Barnaba a yal Markus a le kwa̱mbi̱re mwe a yika Saiyifuru. 40Aya m Bulus a sutu Sila, a bunga ware a kutengu kebu ni̱bu bunti̱ki̱mu a yo chimi̱n delaku we di̱n Tewuduwenu. 41N chi a bunti̱ Suriya n ti Ki̱likiya, ki̱kum ni̱bu bunti̱ki̱mu mi̱n ni̱tti̱tu.
ទើបបានជ្រើសរើសហើយ៖
Nangi̱n Fandubi̱m 15: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
