Nangi̱n Fandubi̱m 16
16
N Timoti a bunti̱ Bulus n ti Sila
1M Bulus a ya Darbe n ti Listi̱ra. We Listi̱ra wuka naba miyare we di̱n ki̱nu n Timoti. N ki̱n bwe wuka na Yafudiya wu ki̱bunti̱ Kwama. N te ki̱n naba Yelena. 2Kebi̱bu a Listi̱ra n ti Yikoniyamu ki̱wer Timoti we nangi̱n kitu. 3Di̱ne m Bulus ki̱baddu ka yikadu n ti Timotiye, a bi ki̱mi̱n laaru di̱ne ni̱bu Yafudam a ki̱twalang kange a yim ko n te Timotiye naba Yelena. 4We ki̱dangu n chi a chir ki̱bunti̱ bi̱nti̱tu, ki̱fwa ni̱bu mi̱nu chi seli̱bu n ti fandubu we Wurchalima a fwa ya̱m chabti̱mu n ti bi̱bu a yarimu, ke n chi a madu ti̱kali we ki̱ni yilangu. 5Di̱ne yiko, ni̱bu bunti̱ki̱mu ki̱sudu ki̱la mi̱n fiko ki̱ni keku bi̱yili̱mangu.
6A kuteng ki̱ku m Bulus n ti Sila a kana bi̱ntu Firichiya n ti Ka̱latiya di̱ne Fi̱ki̱m Kwamamu a dang chi fwaku ya̱m Kwamamu we Asiyange. 7Yo n chi a lam ki̱dire wu a ti̱m Misiyame, n chi a funti̱bwi ka bunti̱ Bitiniya, aya Fi̱ki̱m Yesumu a dubu chi ko a ya. 8Di̱ne yiko, n chi a bunti̱ ki̱ti̱ku Misiya, a suu bwa Toruwa. 9Ki̱ni kum m Bulus a ma dwakam bi̱yili̱m, we dwakamu, n ki̱n a ku naba Makadoniya a titiye ki̱wana ki̱nu ko, “Be Makidoniya, be maka ni̱n.” 10A kuteng ki̱ku m Bulus a ku dwakam bi̱yili̱mangu, nang kaibu ki̱swi, ni̱n kun ni̱n yika Makidoniya. Di̱ne ni̱n swaan ko n Kwama a yal ni̱n ko ya ni̱n ma di̱mwar ya̱m bi̱li̱mi̱nu we bwako.
N Lidiya a yiu Kwama we Filibi
11Yinu ni̱n kun we Toruwa ni̱n le kwa̱mbi̱re mwe ni̱n yika Samurtakiya. Yo ti̱mu a kwiyane, ni̱n yika Niyafoli. 12We bwako, ni̱n kun ni̱n yika Filibi wu a wume mati̱n Roma, n nang bi̱n di̱dunu we ti̱m Makidoniyamu. Ni̱n ma wanditi we bwako.
13We difi̱kare Yafudame ni̱n chir we kwa̱r bi̱ni̱nu, ni̱n yika ki̱ti̱ku laang fi ni̱n kamadu nang yaan ni̱bu Yafudam ki̱twa̱ba̱ mi̱n buniye, ni̱n swe we fiko ni̱n fwa ya̱mu n ti nati̱bu a muran we fikomu. 14N Lidiya we bi̱bu a sii ki̱tele yinang ki̱nwe ni̱ni̱mu, n ki̱n fwa̱n Tiyati̱ra, ki̱feku kuli̱n di̱di bungbungi̱n di̱du a ma ka̱mbi̱ri̱n. N Tewuduwe a wudu ni̱r ki̱nu, n ki̱n a si ki̱tele we ya̱m Kwamamu m Bulus ki̱fwadi̱mu. 15A kuteng ki̱ku ni̱bu a ma ki̱mi̱n batisma n ti ni̱bu lokomu, n ki̱n a wana ni̱n ko, “Ka ta ke bi̱yili̱mu we Tewuduwe, ti̱be Lomi ti̱ si̱ku we. A kutengu n ki̱n a da ni̱mi̱n ki̱ti̱mangu, ni̱n ke ki̱mi̱n.”
Ni̱bu a yinge Bulus n ti Sila a di̱bi̱nti̱l
16Wuka di, yinangu nang chir ni̱n yika twa̱ba̱kungu, ni̱n tekan n ti di̱kan fwa̱n ka̱be di̱du ki̱ni ki̱fi̱bti di̱du ki̱ma buwang. Wu tewuduwe ko ki̱ya ka̱mbi̱r we nabwen we buwangu ki̱madangu. 17Fwa̱n di̱du a le ki̱bung ni̱mi̱n ti̱nu, n ni̱n n ti Bulus, ki̱fwa ya̱mu dukan ko, “Ni̱bu bi̱bu ni̱bu Kwama Tewuduwe, ki̱ma chimi̱n di̱mwar wa̱re wu a yuke.” 18Ditiyu nabwen ki̱fwa ya̱m bi̱bu, ti̱tu a kai Bulus mi̱n ni̱r, n ki̱n a sabran a yi fwa̱nu ki̱ni ki̱fi̱bti ko, “We di̱n Yesu Masiya, chir mi̱n we fwa̱nu. Bi̱nabi̱na ki̱fi̱btiyu a chirti̱n.”
19Yo Tewuduweko a kuu wa̱re yaku ka̱mbi̱re chingu a tale, n chi a tau Bulus n ti Sila, a yikan tikaketi ni̱bu kabaki̱mu mi̱ni ki̱n a bwa kwa̱ma̱re. 20Yo n chi a lam fi a kwa̱l kabaki̱ne, a yi chi ko, “Ni̱bu Yafudam bi̱bu ki̱kai bi̱n chi̱renu. 21N chi ki̱miya datiyu a dakabu n chi̱ni ni yiddu ka ni bunti̱ne. Di̱ne n chi̱ni ni̱bu Roma.”
22Ni̱bu a kiya chimi̱ntuwe ki̱ti̱bu, kwa̱l kabaki̱nu a ngi̱ra chimi̱n lukeyu, a suku chi a dubi twatwad, yinu a yi ni̱bu ko a twalani kwa̱ntang. 23A kuteng ki̱ku ni̱bu a ni chi riyengu, a mar chi a di̱bi̱nti̱l, yinu a yi nii ki̱to lo di̱bi̱nti̱le ko a to yinang. 24Nii ki̱to lo di̱bi̱nti̱le a yiu ya̱m bi̱bu kani yurau, a yikani ki̱n a kan di̱du a murenu, a kwau chi a di̱bi̱nti̱l kwali̱mi̱n.
25Ki̱ni ki̱tangti̱lang kuma̱ng m Bulus n ti Silas ki̱twa̱ba̱ bunitu ki̱kabati̱ teni delaki Kwamamu, ti̱bi̱nti̱litu ki̱nwe chidu yinangu n chi ki̱kaba teniyangu. 26Bi̱nabi̱na ti̱mu a mi̱kan ki̱ni dukan, lo ti̱bi̱nti̱liye a mi̱kan ki̱ni tame kwang. Kanang di̱di̱le kwa̱re a wuden, maki̱lanitu a fa̱li ti̱bi̱nti̱liniti kwang a kwiyan a twaka ti̱n. 27Yinangu naba toke a kaban we duumangu a ku kwa̱ti̱tu a wudenangu, a chaku too ki̱baddu ka chi̱u dur ki̱nu, di̱ne we kamaki̱ kangu, ko kano ti̱bi̱nti̱litu a chir. 28Aya m Bulus a ngau keru ki̱ni dukan ko, “Chiddu dur munu we, n ni̱n we ki̱ni kwang!”
29Yinu nii ki̱to lo ti̱bi̱nti̱liye a bau ki̱rang, a wul we bwa di̱Bulus n ti Sila a ya yar we kakku chiyangu. 30A chaku chi a fi̱lang yinu a bi̱u chi ko, “Tewuduwe, mang ma wureni ke n ya yuke?”
31N Chi a yi ki̱n ko, “Ke bi̱yili̱mu we di̱n Tewuduwe n Yesu, mwang ya yuku, mun n ti lomo kwang.” 32We ki̱dang kangu, n chi a fwa ki̱mi̱n ya̱m Tewuduwe mu n ti bi̱bu we di̱bi̱nti̱li̱m kwang. 33We ki̱swi wuko, nii ki̱to lo di̱bi̱nti̱liye a yikani ki̱ni chi a nura chimi̱n bumbitu, yinu n chi a ma ki̱mi̱n batisma, n ki̱n n ti loko kwang. 34Nii ki̱to lo ti̱bi̱nti̱liye a be ki̱ni chi a loko, a ni chi chabti̱tu we fiko. N ki̱n n ti loko a ri ki̱ni ka ti̱mi̱lan di̱ne n chi a ke bi̱yili̱mu we di̱Kwama.
35Yo ti̱mu a kwiyane, kwa̱l kabaki̱nu a tum chitu ko ni̱bu a yi ni ki̱to lo ti̱bi̱nti̱liye ko. “A mar ni̱bu bi̱bu.” 36Nii ki̱to lo ti̱bi̱nti̱liye a yi Bulus ko, “Kwa̱l kabaki̱nu a tume chi, ko m mar chi̱n. Di̱ne yiko ti̱chir, ti̱ya li̱mang.”
37Aya m Bulus a yi ko, “N chi a twala ni̱n a kakku ni̱bang, yoko n chi a tibu kabade, kasi ki̱ku n ni̱n ni̱bu Romame. N chi a mar ni̱n a di̱bi̱nti̱l. Yinu ki̱chaku ni̱nni daan. A ne nang chiru! N chi a be chifwan, a be chaku ni̱n.”
38Ni̱bu nanganmu a ya fwa kwa̱l kabaki̱nu mi̱n ya̱m bi̱bu. Tayi a tau ni̱bu bi̱bu kangu a nwe ko ni̱bu bi̱bu ni̱bu Romamu. 39Yinu n chi a be a ni Bulus n ti Sila bwanu. A kuteng ki̱ku n chi a yo ni̱bu bi̱bu, a wana chi a chir we bi̱nu. 40Yo m Bulus n ti Sila a chire we di̱bi̱nti̱le, a yika bwa di̱Lidiya. A kutengu n chi a ku kebu ni̱bu bunti̱ki̱mangu, a ru chimi̱n ni̱tti̱tu, yinu a yikan.
ទើបបានជ្រើសរើសហើយ៖
Nangi̱n Fandubi̱m 16: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
