Tourat 1: Foyda Nama 37

37
Hozrot Iusuf (a:) (37:1—50:26)
Hozrot Iusuf (a:)or dui kuab
1Iakub Kenan desho-u roila, tan baf-o hono musafir oia asla. 2Ou oilo Iakubor ḳandanor boyan. Iusufe shotro boros boyosh tone tan baiaintor loge meṛa-sagol raḳta. Tain huruman tone-u tan haton ma Bilha ar Zilpar fuaintor loge roita. Ar erar hoḳol bad sal-cholonor ḳobor bafre zanaita. 3Iusuf, Israilor buṛa boyoshor fua gotike, tain ere hoḳol tone beshi maya ḳorta. Tain ere ek kandani zubba banai dila. 4Bafe Iusufre hoḳol tone beshi maya ḳoroin dekia, baiainte tanre ginnaita. Tara en loge bala mone mat-ḳota-o matta na.
5Iusufe ek kuab dekia tan baiaintore hunaila, teu tara aro beshi ginnaila. 6Tain ḳoila, “Ami kuabe kita deḳsi huno: 7ami deḳlam, amra ḳetor maze danor muiṭ bandiar ar amar banda muiṭḳan ubaigelo, teu tumrar muiṭ oḳole amar muiṭre sairobae beria soizda ḳorer.” 8Ou tan baiainte ḳoila, “Tui hasau amrar raza oite saire ni? Tui raza oia amrar ufre beṭagiri korte ni?” Teu tan kuab ar tan mator lagi tara aro beshi ginnaila.
9Iusufe hirbar ek kuab dekia tan baiaintore hunaila. Tain ḳoila, “Huno, ami hirbar kuabe deḳsi, san-shuruz ar egaroṭa terae amare soizda ḳorer.” 10Tain i kuabor ḳota tan baf ar baiaintor gese ḳoia harle, bafe tanre domḳaia ḳoila, “Tuin ita kun zator kuab deḳle, re fut? Tor ma-baiain ar ami-o kita hasau tore soizda ḳortam ni?” 11Ar Iusufre tan baiainte kub ingshaita. Oile bafe i kuabor ḳota mono raḳla.
Gulam banaia baiainte besila
12Ar tan baiainte bafor foshur fal loia Shikimo raḳat gela. 13Teu Israile Iusufre ḳoila, “Tor baiainte foshur fal raḳat Shikimo gesoin, te ae, ami tore-o hono faṭai.” Tain ḳoila, “Aichcha, ami zaimu.” 14Israile tane ḳoila, “Tui gia tor baiain ar foshur falor ḳobor-antor hunia aia amare ḳois.” Teu tain Iusufre Hebron tone Shikimo faṭaila. Ar Iusuf-o gia Shikimo azir oila.
15Aia harle tanre ḳetor maze gura-firat dekia eḳ beṭae zikaila, “Tumi kita tukairae ba?” 16Iusufe ḳoila, “Ami amar baiaintore tukaiar. Afne zanoin ni, era foshur fal kun zagat raḳra?” 17Hi beṭae ḳoila, “Tara in tone gesoingi. Ami hunchi tara matira, ao, amra Dutono zaigi.” Ou Iusufe tukai tukai Dutono gia tarare faila. 18Baiainte duroi tone tanre deḳlo, ar tarar gese fosar age-u tara ene kun ḳorar motlob ḳorlo. 19Tara eḳzone aroḳzonre ḳoilo, “Ou deḳo, kuab deḳra sab aira. 20Ao, oḳon-u amra ene ḳotom ḳoria ou gato falai dei; bade ḳoimu, kunu zongli zanuare ḳailaise, heshe deḳmune, tar kuabor dosha kita oy?” 21Oile Rubene ita hunia tarar at taki enre basaibar lagi koila, “Tare zane mario na.” 22Tain erare foramish dila, “Kun-ḳarafi korat zaio na, nizor ate na maria ogure emne-u gator maze falai deo.” Oula tain Iusufre tarar at tone basaia, bafor ato faṭanir sesṭa ḳorla. 23Iusuf tan baiaintor gese aite-u tara, tan gotor tone zubba kulilaila, hou ḳandani zubbaṭa ṭania kulilila. 24Ar tane doria gator maze falai dila. I gat hukna asil, kunu fani asil na.
25Heshe tara ḳaoat boia saia deḳla, Giliod taki Ismaili eḳ befarir dol ibae ar. Era uṭor fiṭit ḳori kushboy moshla, agor, ar meshke-ambor loia Mishor desho zaita. 26Ou Ehudae tar baiainre ḳoilo, “Doro, baire kun ḳoria amra lukaililam, teu amrar kita lab oibo? 27He to amrar-u bai, amrar afon lou ar gust. Te tar shorilo at na dia ao, Ismaili oḳlor gese tare besilai.” Ou baiain-o razi oigela. 28Hou Madiani befari oḳol ḳasat aite-u, baiainte Iusufre gato tone ṭania tulla ar ek kuṛi rufar ṭeḳar bodla, Ismaili oḳlor gese tane besilaila. Era Iusufre loia Mishoro gelagi.
29Bade Rubene hou gator gese aia Iusufre na dekia, tan gotror kurta farilla. 30Baiaintor gese gia ḳoila, “Fuagu to ino nae. Oḳon ami kita ḳortam?” 31Ou tara eḳ bokri maria, er lou Iusufor hou zubbat lagaila. 32Bade manushdi ou zubba tarar bafor gese faṭaia ḳoila, “Iṭa amra foto faisi, te afne bala ḳoria deḳoukka, iṭa afnar fuar zubba ni?” 33Iakube i zubba sinia ḳoila, “Iṭa to amar fuar-u. Tare kunu zongli zanuare ḳailise, tare nisoy siṛi-biṛilaise.” 34Tain finnor ḳafoṛ siṛia, ḳomro solar soṭ bandia, fuar lagi bout din mattom ḳorla. 35Tan hoḳol fua-fuṛie tane buzaita saila, oile kunu buze-u tan buk ṭanḍa oilo na. Tain ḳoila, “Ami mattom ḳori kori amar fuar gese ḳoyboro hamaimu.” Fuar lagi tain ou laḳan ḳanda-ḳaṭit roila. 36Er maze Madiani oḳole Iusufre Mishoro nia, Feraunor ḳormosari Azizor#37:36 Mul Hibru bashae ou Azizor nam Puṭifor. gese besilaila, i kormosari asla tan fordan gaḍ.

ទើបបានជ្រើសរើសហើយ៖

Tourat 1: Foyda Nama 37: sylL

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល