GENESIS 45
45
Joseph Asanggamte Kiang Ah Akipuangkhia
1Huan akiang a dinghte ma ah Joseph akidek zouta kei, “Mi tengteng ka kiang a kipan pawtkhesak vek un,” chi in akikoukhia hi. Joseph asanggamte kiang a akigen sung teng akiang ah kuamah adingh kei uhi. 2Akap loloih a, Aiguptate'n aza ua, Pharaoh inkuanpihte'n leng aza uh. 3Joseph in asanggamte kiang ah, “Keimah Joseph ka hi. Ka pa adam lai na maw?” achi hi. Himahleh asanggamte'n adawng thei kei ua, ama ah buaitak in a-om uhi. 4Joseph mah in asanggamte kiang ah, “Hehpih in hon naih un,” achi hi. Huchi in ava naih ua, ama'n, “Na unaupa uh Joseph, Aigupta gam a lutpih ding a na khotpa uh ka hi. 5Himahleh hiai a pai ding a na hon khot ziak un lungkham kei unla, kihehkhum tuan sam kei un. Mite hinna hondam ding in Pathian in na ma ua hon sawl masa ahi. 6Hiai kum nih sung hiai gam ah kial aketa a; kum nga in asam lai hi. Huai sung in leileh a-om kei ding a, buhlak leng a-om kei ding. 7Tunung khang om zel ding hawisak ding leh noute hotdamna thupitak a hingdam a ka hon omsak theihna ding in Pathian in na ma uah kei ahon sawl masa hi. 8Huchi in hiai a hon sawl noute na hi kei ua, Pathian ahi zaw. Ama'n Pharaoh pa in leh a-inkuanpih tengteng heutu in leh Aigupta gam tengteng vaihawmtu in ahon bawlta hi.
9“Kintak in ka pa kiang ah va pai unla, akiang ah, na tapa Joseph in hichi in achi: Pathian in Aigupta gam tengteng heutu in ahon bawlta a, ka kiang ah hong paisuk in, sawt hon hal ke'n. 10Huchi in Goshen gam ah na teng ding a, ka kiang ngei ah na om ding; nang, na tate, na tute, na belamhonte, na bawnghonte leh na neih tengteng toh. 11Hiai ah keimah in ka hon vak ding; kial lah kum nga om lai ding ahi ngal a. Huchi lou in zaw nang leh na inkuanpihte leh na neih tengteng toh na kialgawp kha ding uh,” hon chi un.
12“Ngai un, noumau mit ngei leh ka nau Benjamin mit ngei in keimah kam mahmah in agen lai na mu kilkel uhi. 13Aigupta gam a ka thupina tengteng thu leh na thil muh tengteng thu uh ka pa na hilh ding ua; kintak in hiai ah ka pa na hon pisuk pah ding uh ahi,” achi hi.
14Anau Benjamin ngawng a kun in akap a; Benjamin leng ama ngawng a kun in akap hi. 15Asanggamte tengteng atawp a, akahkhum chiat a, huai khit in asanggamte'n thu vantang agenpih uhi.
16Joseph sanggamte ahong uh chih thu thuthang Pharaoh inkote'n ana za uhi. Huai in Pharaoh leh asikhate akipaksak mahmah hi. 17Pharaoh in Joseph kiang ah, “Na sanggamte kiang ah huchi in hih in. Na gante uh buh posak unla, pawt unla, Kanaan gam ah pai un. 18Na pa uh leh na inkuanpihte uh hon pi unla, ka kiang ah hong pai un. Aigupta gam a thil hoihte ka hon pe ding a, hiai gam a thil om hoihpente na ne ding uh. 19Thu ka hon pia ahi, ‘Hichibang in hih un: Na taneu chikchikte uh a ding leh na zite uh a ding Aigupta gam a kipan kangtalaite la unla, na pa uh pi ding in va kuan un. 20Na van uh leng ngaihtuah nuam dah un, Aigupta gam tengteng thil hoih peuhmah nou a ahi ngal a,’ ” achi hi.
21Israel suante'n huchibang in ahih ua, Joseph in Pharaoh thupiak bang in akiang uah kangtalaite apia a, lampi a nek ding leng apia hi. 22Avek ua kiang ah puansilh kikhenna ding ape chiat a; Benjamin kiang ngial ah houh dangka zathum leh puansilh kikhenna ding nga apia hi. 23Apa kiang ah hiaite akhak hi: Aigupta gam a thil hoih pua sabiltung sawmkhat leh lampi a, apa a ding buh leh tanghou leh nek ding pua sabengtungnu sawmkhat toh. 24Huchi in asanggamte asawlkhia a, apaita uh. Ama'n akiang uah, “Lampi ah kina lou ding in pilvang un aw,” achi hi.
25Aigupta gam a kipan apaitou ua, huan Kanaan gam a apa uh Jakob kiang ava tungta uhi. 26Akiang ah, “Joseph adam lai a, huan Aigupta gam tengteng tung ah vaihawmpa in apang,” chi in ahilh uhi. Athugen uh agintak louh ziak in, alungtang abahta hi.
27Akiang ua Joseph thugente ahilh ua; atuanna ding kangtalai Joseph in akhakte amuh in Jakob lungtang ahong halh nawn hi. 28Israel in, “Ahunta; ka tapa Joseph hingdam a na om ahi maw. Ka sih ma in amah ka va mu ding,” achi hi.
ទើបបានជ្រើសរើសហើយ៖
GENESIS 45: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.