GENESIS 44
44
Nou Mang
1Huan ama'n a-inkemmi kiang ah, “Huai mite ip in apuak zoh zahzah buh in dimsak inla, adangka chiat uh a-ipgong bul chiat uah koih in. 2Ka nou, huai dangka nou, anaupangpenpa ipgong bul ah koih in, abuh man dangka toh,” chi in thu apia hi. Huchi in ama'n Joseph thugen bang in ahihta hi. 3Khua avaktak in amau asabiltungte uh toh apaisakta hi. 4Khua a kipan apaikhiak ua gamla atun ma un, Joseph in a-inkemmi kiang ah, “Thou inla, huai mite va delh in. Na va phak chiang in akiang uah, ‘Bangchidan a thil hoih, thil hoih lou a thuk na hi ua? 5Huai ka pu uain dawnna leh a-aisanna mahmah hilou ahi maw? Hichibang na hih uh na gilou uhi,’ chi in,” achi hi.
6Huan adelhphaktak in, huai thute akiang uah agen hi. 7Amau akiang ah, “Pu, bangchidan ahia hiai bang thute na gen? Na sikhate'n huchibang thil ka hihlouhdan ding uh. 8Ngai in, ka ipgong bul ua dangka ka muhte uh leng Kanaan gam a kipan na kiang ah ka hon tawi ve ua oi. Bangchidan in na pu inn a dangka hiam dangka-eng hiam gu mawk ding ka hi ua? 9Na sikhate lak ah kuapeuh na muhna penpen si hen, huan kou leng ka pu uh sikha in ka om mai ding uh,” achi uhi.
10Ama'n, “Hi hen, na thu bang zel un hi hen. Himahleh kuapeuh ka hon muhna penpen ka sikha in om hen. Nou ahihleh dembei na hi ding uh,” achi hi. 11Huaitak in amau ip chiat uh kintak in lei ah angakhia ua, amau ip chiat ahong uhi. 12Ama'n a-upapen ah apan a, anaupangpen pha in azong a; huchi in Benjamin ip ah nou amuta hi. 13Huaitak in apuansilhte uh abotkek ua, amau sabiltung chiat aposak nawn ua, khua ah akik nawnta uhi. 14Judah leh asanggamte'n Joseph inn ava pha ua; amah huai ah ana om lai hi. Huchi in amai ah abokkhup chiat uh. 15Joseph in akiang uah, “Bang thil ahi mai a na hih uh? Kei bang mi in, aisan a hichibang thil mukhe thei ka hi, chih na thei kei ua hia?” achi hi.
16Judah in, “Ka toupa kiang ah bang ka genta ding ua? Bang ka hon hilhta ding ua? Bangchibang in ka kigenvengta ding ua? Pathian in na sikhate tatlekna amukheta. Ngai in, ka toupa sikhate ka hita mai uh. Kou leh akhut a nou amuhna pen uh leng,” achi hi.
17Ama'n, “Huchibang a ka hih louh ding dan. Akhut a nou amuhna pen kia ka sikha in a-om ding a, nou zaw lungmuangtak in na pa uh kiang ah paitouta un,” achi hi.
Judah In Benjamin A Ding In Angetsak
18Huaitak in, Judah in Joseph ava naih a, “Ka toupa aw, hehpihtak in, kei na sikha, ka toupa bil a na zak ding in thu kam khat hon gensak inla, na hehna na sikha tung ah kuangsak ke'n, nang lah Pharaoh bang hial na hita ngal a. 19Ka toupa'n, ‘Pa hiam sanggam hiam na nei uhia?’ chi in na sikhate na hon dong hi. 20Ka toupa kiang ah, ‘Pa putektak leh atek lam a neih naupang chik ka nei uh. Huai mipa upa asita a, anu neih lak ah amah kia a-om lai a, apa'n lah amah a-it mahmah hi,’ ka chi uhi. 21Nang na sikhate kiang ah, ‘Ka mit a amah ka muhtheihna ding in ka kiang ah hon pisuk un,’ na chi hi. 22Ka toupa kiang ah, ‘Ka naupa un apa anuse thei kei ding; apa paisanleh apa asi mai ding,’ ka chi uhi. 23Nang na sikhate kiang ah, ‘Na nautumpen uh na hon tonpih kei uleh, ka mel na mu nawn kei ding uh,’ na chi hi.
24“Huan hichi ahong hi a, na sikha ka pa uh kiang ka va tun un, ka toupa thute ka hilh uhi. 25Ka pa un, ‘Kuan nawn unla, buh tawmchik bek ei a ding in va lei nawn un,’ ahon chi hi. 26Kou, ‘Ka hohsuk thei nawn kei ding uh. Ka nautumpen uh ahong dingleh bel ka hohsuk ding ua, ka nautumpen un ahong pai keileh zaw huai mi mel mu thei lou ding ka hi uh,’ ka chi uhi. 27Na sikha ka pa un ka kiang uah, ‘Ka zi in tapa nih ahon neihsak chih na thei uhi. 28Akhat pen ka kiang a kipan apaikhia a, bohzan vek a om hi ngei ding ahi, ka chi hi. Huai nungsiah amah mu lou vengveng ka hi. 29Huchi in hiai mi leng ka kiang a kipan na pikhiak ua, tuahsia va tuak taleh lungkhamtak a han a ka samkangpi toh hon tumsak ding na hi uh,’ achi hi.
30“Huchi in ka nau in kou hon zui lou in, na sikha ka pa uh kiang va tung leng, ka nau uh hinna toh ahinna akizop ziak in, 31hichi ahong hi ding a, naupang in ahon zui kei, chih atheih chiang in asi mai ding. Huchi in na sikhate'n na sikha ka pa uh samkangpi toh lungkhamna a han a tumsak ding ka hi uh. 32Na sikha in na kiang a ka hon pikik nawn keileh, amoh tangtawn in ka pa lak ah ka po ding, chi in ka pa kiang ah ka nau uh tungtang thu ah abultumpa in ka kibawlta hi. 33Huchi in hehpih in na sikha ka nau uh sik in, ka toupa sikha in hon omsak zaw inla, ka nau asanggamte zuitousak in. 34Ka naupa'n hon zui lou in bangchi in ka pa kiang ah ka paitou thei dia? Atung a siatna tung mu ding ka kei hiam,” achi hi.
ទើបបានជ្រើសរើសហើយ៖
GENESIS 44: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.