GENESIS 46
46
Aigupta Ah Jakob Leh A-inkuan Apai Uh
1Huan Israel aneih tengteng toh apawtkhia a, Beer-sheba atung a, apa Isak' Pathian kiang ah kithoihnate alan hi. 2Pathian in zan a mengmuhna in Israel ahoupih a, “Jakob, Jakob,” achi hi.
Ama'n, “Hiai ah ka om,” achi hi.
3Ama'n, “Kei Pathian, na pa Pathian ka hi. Aigupta gam a hohsuk lau ke'n. Huai ah chi thupitak in ka hon bawl ding hi. 4Aigupta gam ah na kiang ah ka hong ding a; ka hon pitou nawn ngeingei ding, na sih chiang in Joseph in hon mitsisak ding hi,” achi hi.
5Huchi in Beer-sheba a kipan Jakob apawt a; Israel suante'n apa uh Jakob leh ataneu chikchikte uh leh azite uh tuanna ding a Pharaoh in kangtalai akhakte ah atuangsak uhi. 6Huchi in Jakob leh asuan tengteng in Kanaan gam a alamkhiak uh, gantate leh vante tawi in, Aigupta gam atungta uhi. 7Atapate, atupate, atanute, atunute leh asuan tengteng, Aigupta gam ah alutpihta hi.
8Hiaite Israel suan Aigupta gam a lut, Jakob leh atapate min ahi uh: Jakob ta masa Reuben ahi. 9Reuben tapate Hanok, Pallu, Hezron leh Karmi ahi uh. 10Simeon tapate: Jemuel, Jamin, Ohad, Jakin, Johar leh Kanaan numei tapa Shaul ahi uh. 11Levi tapate: Gershon, Kohath leh Merari ahi uh. 12Judah tapate: Er, Onan, Shelah, Perez leh Zerah ahi ua; (Kanaan gam ah Er leh Onan asita ua) Perez tapate Hezron leh Hamul ahi uh. 13Issakar tapate: Tola, Puah, Job leh Shimron ahi uh. 14Zebulun tapate: Sered, Elon leh Jahleel ahi uh. 15Hiaite tengteng Leah tapa, atanu Dinah toh Padan-aram gam a Jakob aneihsakte ahi ua; atapate leh atanute avek un sawmthum-le-thum ahi uh.
16Gad tapate: Ziphion, Haggi, Shuni, Ezbon, Eri, Arodi leh Areli ahi uh. 17Asher tapate: Jimnah, Ishuah, Isui leh Beriah leh asanggamnu uh Serah ahi uh. Beriah tapate: Heber leh Malkiel ahi uhi. 18Hiaite Zilpah Laban in atanu Leah kiang a apiak tapate, Jakob aneihsak mi sawm-le-guk ahi uh.
19Jakob zi Rakil tapate: Joseph leh Benjamin ahi uh. 20Joseph in Aigupta gam ah tapa Manasseh leh Ephraim anei a, huai mite On kho siampu Potiphera tanu Asenath in amah aneihsakte ahi uh. 21Benjamin tapate: Belah, Beker, Ashbel, Gera, Naaman, Ehi, Rosh, Muppim, Huppim leh Ard ahi uh. 22Hiaite Rakil tapa Jakob aneihsakte ahi ua, avek un sawm-le-li ahi uh.
23Dan tapa Hushim ahi. 24Naphtali tapate: Jahzeel, Guni, Jezer leh Shillem ahi. 25Hiaite Bilhah tapate Laban in atanu Rakil kiang a apiak ahi uh. Hiaite Jakob aneihsak a, avek un sagih ahi uh.
26Jakob tapate' zite sim louh in Jakob kiang a Aigupta gam a lut, akhal a pawt tengteng avek un sawmguk-le-guk ahi uhi. 27Joseph in Aigupta gam a tapa aneihte nih ahi ua; Jakob inkote, Aigupta gam a lutte, avek un sawmsagih ahi uhi.
Aigupta Ah Jakob Leh A-inkuante
28Jakob in Goshen gam lampi na kawkmuh ding in Joseph kiang ah Judah ahoh masasak hi. 29Huchi in Goshen gam ah alutta uhi. Joseph in akangtalai abawlkhol a, Goshen gam ah apa dawn ding in ahohtou hi. Akiang ah akigen a, angawng a kun in akap nilouh hi. 30Israel in Joseph kiang ah, “Dam in na om a, na mel ka muh nawn ziak in tu'n zaw si ding in ka kimanta,” achi hi.
31Joseph in asanggamte leh apa inkuanpihte kiang ah, “Ka va hohtou ding a, Pharaoh ka hilh ding a, akiang ah, ka unaute leh ka pa inkuanpihte, Kanaan gam a-omte ka kiang ahong tungta uh. 32Amaute ganvulmi, belamching mite ahi ua, abelamhonte uh, abawnghonte uh leh aneih tengteng uh ahon po vek uh, chi in ka va gen ding. 33Hichi ahong hi ding a, Pharaoh in nou ahon sap a, bang nasem na hi ua? ahon chih chiang in, 34na sikhate, hon suangtute a kipan naupang chik ka hih lai ua kipan tuni tanpha ganvulmi ka hi uh, na chi ding uh. Huchi in Goshen gam ah na teng thei ding uh,” achi hi; belamching mite himhim lah Aigupta mite kihlamtak ahi ngal ua.
ទើបបានជ្រើសរើសហើយ៖
GENESIS 46: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.