GENESIS 43
43
1Huan gamsung ah kial anak kiak mahmah lai hi. 2Huan hichi ahong hi a, Aigupta gam a kipan a buh apuaktouh uh anekgaih nung un, apa un, akiang uah, “Kuan nawn unla buh tawmchik bek ei a ding in va lei nawn un,” achi hi.
3Huchi in Judah in akiang ah, “Huai mi'n, na naupa uh na hon tonpih kei uleh, ka mel na mu kei ding uh, chi in hon kalh giugeu hi. 4Ka naupa uh na hon zuihsak dingleh, buh ka hon va leisak ding uh. 5N'on zuihsak nop kei dingleh zaw, ka hoh dah mai ding uh. Huai mi'n ka kiang uah, na nau uh na hon tonpih kei uleh, ka mel na mu kei ding uh, achita ngal a,” chi in agen hi.
6Israel in, “Bangziak in ahia nau dang na neih lai tantan na hilh chitchiat uh? Kei a dia hoih lou na hih uh?” achi hi.
7Amau, “Huai mi'n, na pa uh dam lai hia? Unau dang na nei lai uhia? chi in i tanchin leh i tanaute tanchin ahon dong hi. Ahon thudot bang zel in ka hilh uhi. Na nau uh hon pisuk un, achi ding chih kua'n athei chitchiat dia?” achi uhi.
8Judah in apa Israel kiang ah, “Ka naupa uh hon zuisak in. Huchi in ka kisa ding ua, ka kuan ding uh. Kou leh nang leh ka taneu chikchikte uh leng si lou a i hintheihna ding un. 9Atungtang thu keimah in bultum na ning. Ka khut a kipan mahmah ah amah hon phut in. Amah na kiang a ka hon pikik nawn louh a, na ma a ka hon dinsak nawn keileh, tangtawn in amoh ka po ding hi. 10Om sawt lou hi le ung, anihveina hong tung nawn khinta ding hi ung a,” achi hi.
11Apa uh Israel in akiang uah, “Huchibang ahih vanglakleh hichi in hih un. Na seng un hiai gam a thil hoih khenkhat singnai damdawi, khuaizu, gimnamtui, murrah, theihawk leh makha gah, neukha chiat bek huai mi a ding thilpiak tawisuk un. 12Dangka amun nih in tawi unla, na ipgong bul ua ahon dangka piak nawn leng tawi nawn un; amuhkhelh ahi kha ding. 13Na naupa uh leng pi un, thou unla, huai mi kiang ah va hoh nawn un. 14Na sanggampa uh khat pen leh Benjamin ahon khahsakna ding in Pathian Bangkim hihthei in huai mi hon zahngaisak hen. Ka tate suun ka hihleh suun ka hita mai kei dia,” achi hi.
15Huchi in thilpiak atawi ua, dangka leng amun nih atawi ua, Benjamin leng api uhi. Athou ua, Aigupta gam ah ahohsuk ua, Joseph ma ah adingh nawn uhi. 16Joseph in akiang ua Benjamin om amuhtak in, a-inkemmi kiang ah, “Huai mite insung ah pilut inla, gan gou inla, bawl in, huai mite'n sun chiang in ka kiang ah an ane ding uh,” achi hi. 17Huchi in ama'n Joseph thupiak bang in ahihta a; Joseph inn ah apilutta hi.
18Joseph inn a pilut a a-om ziak un alau ua, “I hoh masak lai a, i ip ua dangka hong kik nawnte ziak in ei ve ahon pilut uh. I tung ua siatna zong a, hon sual in, ei leh i sabiltungte toh sikha ding a mat hon tum ahita ve,” achi uhi. 19Joseph inkemmi kiang ah ava hoh ua, kongbul ah ahoupih uhi.
20“Ka toupa aw, ka hong masak lai ua buh lei ding lel a hong suk ka hi uh. 21Huan hichi ahong hi a, giahbuk ka tun un ka ipte uh ka hong ua, ngai in, ka dangka chiat uh ka ipgong bul uah ana om hi. Ka dangka uh abuk ngeingei in ana om a, huchi in ka hon tawi uhi. 22Buh leina ding in dangka dang ka hon tawi ua, ka dangka uh lah kua'n ahia ka ip ua koih ka thei ngal kei ua,” achi uhi.
23Ama'n, “Lungmuangtak in om unla, lau kei un. Na Pathian, na pa uh Pathian in na ipte uah gou ahon pia ahi mai ve. Na dangka uh lah ka mu ngal a,” achi hi. Huchi in akiang uah Simeon hon pikhia hi.
24Huai mi in Joseph insung ah amaute apilut a, tui apia hi. Akhe uh asil ua; asabiltungte uh leng an apia hi. 25Athilpiak tawi uh Joseph sun an ne ding a ahong pai ma in ana bawlkhol ua; huai ah an ane ding uh chih lah aza ngal ua. 26Joseph a-inn a ahong paitak in, akhut ua thilpiakte, insung ah akiang ah atawilut ua, lei si in amai ah akun chiat uhi. 27Ama'n atanchin uh adong a, “Na pa uh tanchin na gen uh, huai putek ahoih na maw? Adam lai hia?” achi hi.
28Amau, “Na sikha ka pa uh damtheihna ahoih in, adam laitak ahi,” achi uh. Huchi in alu uh akunsak ua, zahtakna apia uhi.
29Amah adak a, anau Benjamin, anu tapa amu a, “Hiai na nautumpen uh, atanchin na hon hilh uhia?” achi hi. Amah mah in, “Ka tapa, Pathian in hon hehpih hen,” achi hi. 30Joseph in anaupa amuh in akhase mahmah a, kintak in kahna ding mun azong pah a, adantan sung ah alut a, huai ah akapkheta hi. 31Amai aphiat a, ava pawt nawn a, akidek teitei a, “An nek bawl un,” achi hi. 32Huchi in amah a ding atuam in, amaute a ding atuam in, Aigupta mi anekpihte a ding atuam in abawlta uhi. Aiguptate'n lah Hebrute anekpih thei ngal kei ua; huchibang hih lah Aiguptate a ding in thilsiang lou ahi. 33Huchi in a-upapen ta masa ahihna bang in, anaupangpen nautumpen ahihna bang dungzui zel in Joseph ma ah atu ua; huchi in lamdang asa chiat uhi. 34Joseph in ama a mite a kipan tantuan an aban piaksak a, Benjamin tantuan houh amaute tantuan tengteng sang in amun nga in atam tuam hi. Uain adawn ua, nuam asa chiat uhi.
ទើបបានជ្រើសរើសហើយ៖
GENESIS 43: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.