GENESIS 42
42
Joseph Unaute Buh Lei Ding In Aigupta Ah Ahoh Uh
1Huan Jakob in Aigupta gam ah buh a-om chih atheihtak in, Jakob in atapate kiang ah, “Bangziak a ki-en maimah na hi ua?” achi hi. 2Amah mah in, “Ngai un, Aigupta gam ah buh a-om chih ka za hi. Si lou a i hinkhiak theihna ding in huai ah va hohsuk unla, huai a kipan ei a ding in buh va lei un,” achi hi. 3Joseph sanggam sawmte Aigupta ah buh lei ding in ahohsuk uhi. 4Jakob in asanggamte kiang ah Joseph nau Benjamin ahohsak kei; tuahsia ava tuak kha ding, achih ziak in.
5Huchi in Israel tapate mi ava hohte lak ah buh lei ding in ahoh ua; Kanaan gam ah leng kial ake ngal a. 6Aigupta gam tung a heutu Joseph ahi a; amah huai gammi tengteng kiang a buh zuakpa ahi. Joseph sanggamte ahong pai ua, lei si in amai ah akun uhi. 7Joseph in asanggamte ana mu a, amau ana thei lai hi. Himahleh akiang uah midang bang in akibawl a, khauhtak in amaute ahoupih hi. Akiang uah, “Koi a kipan a hong na hi ua?” achi hi. Amau, “Buh lei ding a Kanaan gam a kipan hong pai ka hi uh,” achi uhi.
8Joseph in asanggamte ana thei lai a, amaute'n ahihleh amah athei kei uh. 9Joseph in amau tungtang thu, mang a amatte atheikheta hi. Akiang uah, “Enkhe mite na hi uh. Gam venlouhna munte en ding a hong kuan na hi uh,” achi hi.
10Amau akiang ah, “Ka toupa, hilou e, na sikhate buh lei ding a hong kuan ka hi uh. 11Mi khat ta vek ka hi ua, midiktak ka hi uh. Na sikhate enkhe mite ka hi zenzen kei uh,” achi uhi. 12Ama'n akiang uah, “Ka taksang kei, gam venlouhna munte en ding a hong pai himah uteh,” achi hi. 13Amau, “Kou na sikhate unau sawm-le-nih, Kanaan gam a om, mi khat tapate ka hi uh. Ngai in, ka nautumpen uh tu in ka pa uh kiang ah a-om hi. Khat pen ahihleh a-om nawnta kei,” achi uhi. 14Joseph in akiang uah, “Enkhe mite na hi uh ka hon chih na hi mahmah uhi. 15Hichibang a ettel na hi ding uh. Na nautumpen uh hiai a ahong pai keileh Pharaoh hinna a kichiam in hiai a kipan na pawtkhe kei hial ding uh, ka hon chi ahi. 16Nou ah thutak a-om hia, om lou chetna ding in na lak ua khat kisawl unla, na nau uh hon pi hen. Nou bel hen in na om phot ding uh. Huchi lou in zaw Pharaoh hinna lou a kichiam in, enkhe mite na hi mahmah uh ka hon chi ding,” achi hi. 17Huchi in avek un ni thum atangsak chiat hi.
18Ani thum ni in Joseph in akiang uah, “Ke'n Pathian ka lau ziak in, hichi in hih le uchin na hing ding uh. 19Midiktat na hih ualeh na unau lak uah khat na suangkul tanin uah hen in om hen. 20Na nautumpen uh ka kiang ah hon pi un. Huchi in na thu uh atel ding a, na si kei ding uh,” achi hi. Huan huchibang in ahihta uhi. 21Amau, “I nau tung a i thilhih uh moh petmah i hi, hehpih ding a ahon nget ngutngut lai a, alungtang mangbatdan mu napi a, i ngaihkhiaksak nop louh uh. Huaiziak in hiai mangbatna in hon buak ahita,” akichi uhi.
22Reuben in, “Naupang tung ah thil hihkhial kei un, chi in na kiang uah ka gen kei maw? Na ngaikhe nuam kei ua ahi. Huaiziak in ngai un, asisan phu i tung ua lak ahita ve,” chi in amau adawng hi. 23Akal ua paulet mi a-om ziak in Joseph in athugen uh athei chih athei kei uhi. 24Ama'n amau alehngatsan a, akapta hi. Akiang uah ahong kik nawn a, amau ahoupih a, alak ua pan Simeon apituam a, amitmuh un ahenta hi.
Joseph Sanggamte Kanaan Ah Akik Nawn Uh
25Joseph in a-ipte uh buh a hihdim ding leh adangkate uh a-ip ua koih nawn chiat ding in leh lampi a nek ding pe ding in thu apia hi. Huchi in huchibang in ahihsakta hi. 26Abuh uh asabiltungte aposak ua, huai a kipan apawtkheta uhi. 27Alak ua mi khat in agiahbuk ua asabiltung an pe ding a a-ip ahonleh, adangka amuta hi. Ngai in, a-ipgong bul ah ana om hi. 28Asanggamte kiang ah, “Ka dangka na koih nawn uh hi veh e. Ngai un, ka ip sung ah ana om mawk hi,” achi hi. Alunglel ua, “Pathian in hichibang a eite ahon bawl bangchidan adiam aw?” chi in ling kawm in aki-entuah uhi.
29Kanaan gam a apa uh kiang ahong tung ua, atung ua thil tung tengteng ahilh uhi. 30“Huai mi, agam heutupa un, khauhtak in hon houpih a, enkhe mite ding in hon koih hi. 31Kou akiang ah, midiktak ka hi uh. ‘Enkhe mite ka hi zenzen kei uh.’ 32Unau sawm-le-nih ka hi ua, ka pa uh tapate ka hi vek uh. Khat a-om nawn kei a, ka nautumpen uh tu in Kanaan gam ah ka pa uh kiang ah a-om,” ka chi uhi. 33Huai mi, agam heutupa un ka kiang uah, “Hichi in midiktak na hi uh chih ka hon thei ding. Na sanggampa uh khat ka kiang ah nusia unla, na inkuanpih kialte a ding in buh pua unla, paita un. 34Na nautumpen uh ka kiang ah hon pi un. Huchi in enkhe mite na hi kei ua, midiktak na hi zaw uh, chih ka thei ding. Huchi in na sanggampa uh ka hon pe nawn ding a, hiai gam ah sum na sinta ding uh,” ahon chi, achi uhi.
35Huan hichi ahong hi a, a-ipte uh abutkhiak lai un, ngai in, a-ipsung uah adangka tun chiat uh ana om hi. Amau leh apa un adangka tunte uh amuh un alau mahmah uhi. 36Apa uh Jakob in akiang uah, “Noute'n ka tate hon tansak na hi uh. Joseph a-om nawn kei. Simeon lah a-om nawn kei, Benjamin nangawn lah pimang na tum nawn ngal ua. Hiai thil tengteng in hon kiakkhum ahita ve,” achi hi.
37Reuben in apa kiang ah, “Na kiang a ka hon pikik nawn keileh ka tapa nihte that mai in. Amah ka khut ah hon kemsak inla, na kiang ah ka hon pikik nawn mai ding,” achi hi.
38Ama'n, “Ka tapa na kiang uah ahong suk kei ding. A-upa asita a, amah kia lah ahita ngal a. Na paina lam lak ah tuahsia tuak taleh ka samkangpi toh lungkhamna in han ah na tumsak ding uh,” achi hi.
ទើបបានជ្រើសរើសហើយ៖
GENESIS 42: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.