GENESIS 41
41
1Huan kum nih vingveng nung in hichi ahong hi a, Pharaoh in mang anei a; ngai in, lui gei ah ana dingh hi. 2Ngai in, bawngpi sagih hoih taktak, thau taktak ngen tui a kipan ahong pawtkhetou ua, loupa nou lak ah ahong gamta uhi. 3Ngai in, bawngpi dang sagih kil theuthou, gawng gemgom ahong pawtkhe nawn ua, bawngpi dangte kiang, lui gei ah adingh uhi.
Joseph In Pharaoh Mang Hilhchian
4Huan bawngpi kil theuthoute'n bawngpi hoih taktak, thau taktakte anegai maimah uhi. 5Huchi in Pharaoh akhanglou a, a-ihmu nawn a, mang anei nawn hi. Ngai in, buh kung khat ah avui sagih lian pipi, hoih liahluah ahong omkhia hi. 6Ngai in, huai nung in vui sagih ngat giuhgeuh suahlam huih in anuai eksa nung ahong omkhe nawn hi. 7Avui ngat giuhgeuhte'n avui sagih lian pipi, hoih liahluahte avalh khin maimah uhi. Huchi in Pharaoh akhanglou a; ngai in, mang ana hi. 8Azingsang in hichi ahong hi a, alungsim abuai mahmah a; mi asawl a, Aigupta gam a mitkhialdawi siam tengteng leh mipil tengteng asamkhawm hi. Pharaoh in amang amau ana hilh a; himahleh Pharaoh mangte hilhchian thei kuamah a-om kei uhi.
9Huchih lai in uain pia heutupen in Pharaoh kiang ah, “Tuni in ka hihkhelh ka theikhia hi. 10Khatvei asikhate tung ah Pharaoh aheh a, huchi in vengmi pawl heutu inn ah kei leh tanghou bawl heutupen ahon tangsak hi. 11Kei leh ama'n zan khat mang ka nei ua, akhiakna tuam tuak ahi ka mat uh. 12Huai ah ka kiang uah vengmi pawl heutu sikha, Hebru mi, tangval khat a-om a; amah ka hilh ua, ama'n ka mangte uh ahilhchian hi. Ka mang uh toh kituak in ahon hilhchetsak hi. 13Huan hichi ahong hi a, kei ka nasep mah ahon semsak nawn a, amah akhailumta hi,” achi hi.
14Pharaoh in Joseph asamsak pah a, kintak in suangkul a kipan apikheta uhi. Amah akimet ngil a, apuansilh akhek a, Pharaoh kiang ah ava lut hi. 15Pharaoh in Joseph kiang ah, “Mang ka nei a, ahilhchian thei kuamah a-om kei uh. Nang mang thu na zak chiang in na hilhchian thei chih na tungtangmi gen ka na za hi,” achi hi.
16Joseph in Pharaoh adawng a, “Huai ahihleh kei a om ahi kei hi. Pathian in lungkimhuaitak in Pharaoh adawng zaw ding,” achi hi.
17Pharaoh in Joseph kiang ah, “Ka mang in, ngai in, lui gei ah ka na dingh hi. 18Ngai in, bawngpi sagih hoih taktak, thau taktak ngen tui a kipan ahong pawtkhetou ua, loupa nou lak ah ahong gamta uhi. 19Bawngpi dang sagih gina lou leh deihhuai lou leh gawng siatsuat, huchibang tel a hoih lou Aigupta gam tengteng a leng ka muh ngei louh, anung uah ahong pawtkhetou nawn uhi. 20Bawngpi gawng siatsuat deihhuai lou pipite'n bawngpi sagih thau taktak hong pawt masate anegai maimah uhi. 21Anekgaih khit nung un leng, ane uh chih akithei tuan kei hi. Atung lai mah bang in deihhuai loutak in a-om lailai uhi. Huchi in ka khanglouta hi. 22Ka mang in, ngai in, buh kung khat ah vui sagih lian pipi, hoih pipi ahong vuikhia hi. 23Ngai in, huai nung in vui sagih vuai ningniang, neu chikchik, suahlam huih in anuai hong vuikhe nawn hi. 24Avui ngat ngiungeute'n avui sagih hoih taktakte avalh khit maimah uh ka mu hi. Mitkhialdawi siamte ka hilh a, himahleh hon hilhchian thei kuamah a-om kei uh,” chi in agen hi.
25Joseph in Pharaoh kiang ah, “Pharoah mang khat ahi a, Pathian in hih ding a akisak Pharaoh theisak ahi. 26Bawng sagih hoih taktakte kum sagih ahi ua; vui sagih hoih taktakte leng kum sagih mah ahi uh. Huai mang khat ahi. 27Anung ua bawng sagih tek taktak, deihhuai lou taktak hong pawtkhetoute kum sagih ahi ua, vui sagih ahawm ngen suahlam huih nuaite toh; huaite kial kum, kum sagih ding ahi. 28Hiai ahi Pharaoh kiang a ka gen. Pathian in hih ding a akisak Pharaoh kiang a theisak ahi. 29Ngai in, Aigupta gamsung pumpi ah niang-le-tai a om kum, kum sagih ahong tung ding. 30Huai nung in kial kum, kum sagih ahong om nawn ding. Huchi in Aigupta gam ah niang-le-tai a omna mangngilh vek ahita ding. Kial in gam anegawp vek ding hi. 31Niang leh tai kum hon zui kial pen anasat mahmah ding ziak in mite'n hiai gam hauhsak lai hun athei nawnta kei ding uh. 32Pharaoh mang nihvei aneih tuansakna ahihleh hiai ziak ahi. Thilhih ding Pathian in ahihkip a, Pathian in atungsak pah ding hi.
33“Tu in Pharaoh in mi khat, teitak leh piltak zongkhia henla, Aigupta gam tung ah heutu in omsak hen. 34Pharaoh in hiai hih hen. Gam tung ah heutute sep henla, niang-le-tai a om kum, kum sagih sung Aigupta gam buh mun nga a khen mun khat zel kaikhawm hen. 35Amau huai kum hoih kum hong tung ding a buh tengteng kaikhawm in Pharaoh nuai a om ding in khuate ah tunung a nek ding in buh sungkhawm henla, kholkhawm hen. 36Kial ziak a gam amanlouhna ding in, buh kial kum, kum sagih Aigupta gam a hong tun hun a ding in hiai gam a ding a kiginkholhna ahi ding,” achi hi.
Aigupta Ukpa A Joseph Bawl Ahi
37Pharaoh leh asikha tengteng in hiai thusawm hoih asaklamtak uh ahi. 38Pharaoh in asikhate kiang ah, “Hichibang Pathian kha omna mi i muzou ding ua hia?” achi hi.
39Pharaoh mah in Joseph kiang ah, “Pathian in hiai tengteng hon theihsak ziak in, nang bang a tei leh pil himhim a-om kei uh. 40Nang ka inkote tung ah heutu in na om ding a, ka khua-le-tui tengteng na thu bang zel in a-om ding uh. Laltutphah a tut thu ah kia nang sang in ka lianzaw ding,” achi hi. 41Pharaoh mah in Joseph kiang ah, “En in, Aigupta gam tengteng tung ah heutu in ka hon bawl hi,” achi hi. 42Pharaoh in akhut a kipan aminsawnna zungbuh atolkhia a, Joseph khut ah abunsak a, puanmalngat a kibawl puansilhte asilhsak a, angawng ah dangka-eng khainiang a-oksak lai hi. 43Akangtalai neih nihna ah atuangsak a, “Ama ah khukdin un,” chi in mi akikousak hi. Huchi in Aigupta gam tengteng tung ah heutu in abawlta hi. 44Pharaoh in Joseph kiang ah, “Kei Pharaoh ka hi, na thu lou in Aigupta gamsung pumpi ah kuamah in akhut uh hiam, akhe uh hiam alik kei ding,” achi hi. 45Pharaoh in Joseph min Zaphnath-Paneah asa a; azi ding in On kho siampu Potiphera tanu Asenath apia hi. Joseph apawt a, Aigupta gamsung pumpi asiksuak hi. 46Aigupta gam kumpipa Pharaoh ma a Joseph adin lai in kum sawmthum a upa ahi. Pharaoh a kipan Joseph apawt a, Aigupta gamsung pumpi asiksuak hi. 47Hauh kum, kum sagih sung, lei in buh tampi atungsak hi. 48Aigupta gam ah hauh kum, kum sagih ahong tung a, buh tengteng adongkhawm a, huai buhte khuate ah asungkhawmta hi. Akim a om kho chih lou a buhte asungkhawm chiat hi. 49Joseph in buh tampi, tuipi piaunel zah bang in asungkhawm venvon a, asim leng atawp hial hi; sim zoh vual louh ahih tak ziak in.
50Kial ahong tun ma in Joseph in tapa nih anei a, huaite On kho siampu Potiphera tanu Asenath in aneihsakte ahi uh. 51Joseph in atapa masa min Manasseh asa a, “Pathian in ka sepgimna leh ka pa insung mite tengteng ahon mangngilhsakta,” achi hi. 52Atapa nihna min Ephraim asa a, “Pathian in ka gimthuakna gam ah chi ahon suangsakta,” achi hi.
53Hauh kum, kum sagih Aigupta gam a hong tung abeita hi. 54Huan kial kum, kum sagih ding, Joseph gen bang in ahong tung panta hi. Gam chih ah kial ahong keta a; Aigupta gamsung teng ah bel nek ding a-om hi. 55Aigupta gam a mi tengteng akialtak un, Pharaoh kiang ah nek ding ngen in akikou uhi. Pharaoh in Aigupta mite kiang ah, “Joseph kiang ah hoh unla; na kiang ua agen peuhmah hih un,” achi hi. 56Leitung pumpi ah kial aketa hi. Joseph in sunkhawmna buh innte ahong a, Aigupta gam ah leng kial anak kiak mahmah hi. 57Leitung pumpi a kial anak kiak luat ziak in gam chih a mite buh lei ding in Aigupta gam a Joseph kiang ah ahong zel uhi.
ទើបបានជ្រើសរើសហើយ៖
GENESIS 41: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.