GENESIS 40
40
Joseph In Hentate Mang Aletkhia
1Huan huai thil khit in hichi ahong hi a, Aigupta kumpipa uain pepa leh atanghou bawlpa'n apu uh Aigupta kumpipa alungkimsak kei uhi. 2Pharaoh, asikha heutu nihte tung ah, a-uain pia heutupen tung ah leh atanghou bawl heutupen tung ah ahehta hi. 3Huchi in vengmi pawl heutu inn, Joseph hen a a-omna suangkul ah, atangsakta hi. 4Vengmi pawl heutu in amau Joseph akemsak a, amau a-nna asepsak ua, bang tan hiamtak atang uhi.
5Suangkul a hen a om, Aigupta kumpipa uain pepa leh tanghou bawlpa'n zan khat khiakna tuam tuak mang anei uhi. 6Azing in akiang uah Joseph ava lut a, amau ava mu a, ngai in, ana lungkham mahmah uhi. 7Ama'n, “Bangchi na hi ua, tuni in lungkham mel pu na tel uchia?” chi in Pharaoh sikha heutu suangkul a tangte adong hi.
8Amau akiang ah, “Mang ka nei tuak ua, hon hilhchiansak thei kuamah lah a-om ngal kei a ahi,” achi uh. Joseph in akiang uah, “Mang hilhchetnate Pathian a ahi kei maw? Hehpih in na mang uh hon hilh un,” achi hi.
9Huchi in uain pia heutupen in amang Joseph ahilh a, akiang ah, “Ngai dih, ka mang in, ka ma ah grepgui ahong om hi. 10Grepgui ah kahiang thum a-om a, ahong selnou ua, ahong pak ua, apakbomte'n grep minte ahon piangsak uhi. 11Huan ka khut ah Pharaoh nou ahong om a; grep gahte ka lou a, Pharaoh nou sung ah ka suk a, huai nou Pharaoh khut ah ka na pia,” achi hi.
12Joseph in akiang ah, ahilhchetna hiai ahi: “Kahiang thumte ni thum ahi. 13Tu a kipan ni thum in Pharaoh in na lutang adomkang ding a, na nasep mah ahon semsak nawn ding. A-uain pepa na hih lai a, na piak ngeina bang in akhut ah Pharaoh nou na pe nawn ding. 14Himahleh na dinmun ahong hoih hun chiang in hon theigige inla, hehpih in hehpihna ka tung a langsak in, Pharaoh kiang ah ka tungtang hon gen inla, huan hiai inn a kipan hon pikhia in. 15Hebrute gam a kipan mi'n aguk a, ahon gukmang uh ka hi a; hiai gam ah leng kokhuk sung a ahon khumna ding in bangmah ka hihkhial kei,” achi hi.
16Tanghou bawlpa'n hilhchetna ahoih chih atheih in, Joseph kiang ah, “Ke'n leng mang ka nei a, ngai in, lohbeu thum ka lu in ka na pua hi. 17Lohbeu tungnungpen ah Pharaoh an, tanghou bawlpa bawl, chi chih ana om hi. Huaite vasate'n lohbeu ka lu a ka puak a kipan ana ne souhsouh uh,” achi hi.
18Joseph in adawng a, “Hiai ahilhchetna ahi: Lohbeu thum ni thum ahi. 19Tu a kipan ni thum in Pharaoh in na pumpi a kipan na lutang adomkang ding a, sing dawn ah akhai ding. Huchi in vasate'n na sa ane souhsouh ding uh,” achi hi.
20Huan hichi ahong hi a, ani thum ni, Pharaoh pian champha ni in, ama'n asikha tengteng a ding in ankuang alui hi. Asikhate lak a uain pia heutupen lutang adomkangta hi. 21Uain pia heutupen uain pemi mah in apangsak nawn a; Pharaoh khut ah nou apeta hi. 22Himahleh Joseph in amau ahilhchet bangtak in, tanghou bawl heutupen akhailumta hi. 23Himahleh, uain pia heutupen in Joseph atheigige kei a, amangngilhta hi.
ទើបបានជ្រើសរើសហើយ៖
GENESIS 40: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.