GENESIS 39
39
Joseph Leh Potiphar Zi
1Huan Aigupta gam ah Joseph apisuk ua; Pharaoh nuai a heutu khat, vengtu pawl heutu, Aigupta mi, Potiphar in ahon pisuk Ishmaelte khut a kipan aleita hi. 2Joseph kiang ah Toupa a-om a, amah mi lohchingtak ahi a; apu Aigupta mi inn ah a-om hi. 3Apu in, Toupa akiang ah a-om a, athilhih peuhmah Toupa'n akhut ah alohchingsak chih athei hi. 4Huchi in Joseph in apu mitmuh in deihsakna atang a, a-inn ah nna asem zel hi. Ama'n a-inkuante tung ah heutu in abawl a, aneih tengteng akhut ah akoih vek hi. 5Huan hichi ahong hi a, a-inn leh aneih tengteng tung a heutu ding a abawl nungsiah Joseph ziak in Toupa'n Aigupta mi insung avualzawlta hi. Inn lam leh gam lam a aneih tengteng ah Toupa'n avualzawl hi. 6Huchi in aneih tengteng Joseph khut ah akoih a, aneih teng, a-an nek kia lou ngal bangmah atheihpih kei hi. Joseph pianhoih leh melhoihtak ahi. 7Huai nung in hichi ahong hi a, apu zi in Joseph angaih et a, “Hon kithuahpih in,” achi hi. 8Himahleh a-ut kei a, apu zi kiang ah, “Ka pu in hiai inn ah ka kiang ah bangbang a-om a chih lah athei ngal kei a, aneih tengteng ka khut ah akoih vek hi. 9Hiai insung ah kei sang a lianzaw kuamah a-om kei. Azi na hih ziak in nang kia lou ngal, kei a kipan bangmah it anei kei hi. Bangchi in hiai khelhna khawktak hih in Pathian tung ah thil ka hihkhial thei dia?” achi hi. 10Huan hichi ahong hi a, niteng in Joseph houpih zel mahleh amah kithuahpih lam thu hiam, ama kiang a om lam thu hiam alimsak nuam kei hi.
11Huchih lai in hichi ahong hi a, a-nna sem ding in insung ah ava lut a; insung ah mi himhim kuamah a-om kei hi. 12Huchi in ama'n, “Hon kithuahpih in,” chi in apuansilh ah ana man a, ama'n apuansilh akhut a nusia in ataikhia hi.
13Huan hichi ahong hi a, apuansilh akhut a nusia in ataikhia, chih atheihtak in, 14A-inn a mite asam a, akiang uah, “En un, hon zahlaksak ding in Hebru mi khat i kiang ua hon pi ahita ve. Hon kithuahpih tum in ka kiang ah ahong lut a, huchi in ngaihtak in ka kikouta hi. 15Huan hichi ahi a, aw suah a ngaihtak a ka kikou azaktak in hiai ka kiang ah apuansilh anusia a, ataikheta,” achi hi.
16Joseph pu ahong tun masiah apuansilh akiang ah ana koih gige hi. 17Akiang ah hiai thu ana gen a, “Hebru sikha i kiang a na hon pi in hon zahlaksak tum in ka kiang ah ahong lut hi. 18Huan hichi ahong hi a, aw suah a ka kikoutak in hiai apuansilh ka kiang a nusia in ataikheta,” achi hi.
19Huan hichi ahi a, Joseph pu in azi in akiang a, “Na sikha in hichi in ahon bawl,” chi a, athugen azak in, ahehna asou hi. 20Huchi in Joseph pu in amah api a, suangkul, kumpi suangkul tangte khumna mun ah akhum a; huchi in suangkul ah a-omta hi. 21Himahleh Joseph kiang ah Toupa a-om a, atung ah azahngai a, suangkul vengmi mitmuh in deihsakna atang hi. 22Huchi in suangkul vengmi in suangkul a tang tengteng Joseph khut ah akemsakta hi. Huchi in huai a thil kihih peuhmah ama hih ahong hita. 23Joseph kiang ah Toupa a-om a, athilhih peuhmah Toupa'n alohchinsak ziak in suangkul vengmi in akhut a thil om himhim a-enta kei hi.
ទើបបានជ្រើសរើសហើយ៖
GENESIS 39: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.