LUUKI 1
1
1M Ba Tiyɔfiluusi#:-
Niriba pam daa kpaŋŋi ba mansi n‑sɔbi lahabaari zaŋŋi n‑kyaŋŋi din daa niŋi ti saani. 2Ba daa sɔbi yɛttɔ'a maa hoo niriba ŋɔn daa yɛli ti seem maa, ninvugseeba ban daa bɛ di piiligu ni ka nya din daa niŋi la, nti leebi ban moonni lahabaari maa. 3-4Lala zugu man gba daa teesi, ni, di sumni ni n sɔbi yɛla maa deede n‑ti i. Man pun dɔli bunseelli kam zaasa balabala halli nti kyɛ ka i baŋŋi din siri nyɛ yɛlimaŋni zaŋŋi n‑kyaŋŋi yɛliseesi ban daa wulisi i la zaa.
5Tɔ. Sahanseaa ka NaaHɛroodi ŋɔn daa nyɛ Gyuudii tingbaŋŋu naaba la, dɔsɔ n daa bɛ ni, ka u yuuri boonni Zakariiya. Ban maanni maaligu n‑tiri Naawunni la yinni n daa nyɛ u, ka daa yi la maalimaanniba zuliyaseaa ban daa boonni Abaigyadima la ni na. Ka u pɔ'a gba daa nyɛ la Aruuna za'anɔri ni pɔ'a, ka u yuuri boonni Ilizabɛti. 6Ka babayi maa zaa daa nyɛ la ninvugsuma Naawunni saani, ka daa dɔli ti Dugma Naawunni zaaligu soori ni u kaya zaa, ka ka galinsi. 7Amaa ba daa ka biiya, dama Ilizabɛti daa nyɛ la kundɔ'ara. M‑paasi yaasa, babayi maa zaa daa laa n‑kurigi ni pam.
8-9Dahinseaa ka di daa ti paai ŋɔn Zakariiya ni u ya'ari dima ni ba tumni ba tuma n‑tiri Naawunni ba maalimaanniba soori ni, ka ba daa yiisi u ni u kpɛ ti Dugma Naawunni Gyeeŋŋu Duu maa ni, ni u ti nyoaai turaali zum. 10Ka daadam maa zaa daa zɛ dundɔŋŋu maa ni n‑susiri Naawunni lala turaali zum nyoaari saha maa. 11Ka ti Dugma malaaka daa yi Naawunni saani na, nti zɛ turaali zum maa nyoaari zii nudirigu ya'ari. 12Ka Zakariiya ŋɔn daa nya malaaka maa, u daa yirigi ni, ka dabeem gbaai u. 13Ka malaaka maa daa yɛli u, “Zakariiya, di zɔri dabeem, dama Naawunni daa pun wum i susigu, ka i pɔ'a Ilizabɛti nin ti dɔ'ai bidibga n‑ti i, ka i nin ti puri u yuuri Gyɔni. 14I nin ti mari sufupeelli ni sufumaasim pam i bii wa zugu, ka niriba pam gba nin ti mari sufupeelli u dɔ'am maa zugu. 15Dama u nin ti niŋi ninvugtitaari ti Dugma Naawunni soori ni. Ka u ku ti nyu dazeoo bee dapeelli, ka Naawunni Vuusim Sii Kasi nin ti kyɛnni u zugu ni na halli u dɔ'am saha zaŋŋi n‑kyɛnna. 16U nin ti kyɛ ka ya Izraɛli dima pam nin ti ŋmaligi n‑labi ya Dugma Naawunni saani. Ka u nin mari siiya ni yiiko hoo anabi Ilaygya ŋɔn daa mari seem la, 17nti zaŋŋi anabi Ilaygya sii maa ni u yiiko gba n‑daŋŋi Naawunni tooni na. U nin kyɛ ka yaseeba ban nyɛ yaadima la sufu ti labi m‑pɛligi ba ya'ansi zugu, ka kyɛ ka tuppuwumni dima ti takki n‑nya yɛm hoo ninvugseeba ban wumni Naawunni noori ŋɔn mari seem la, ka laa n‑kyɛ ka niriba maali siri n‑guri ti Dugma.” 18Ka Zakariiya daa yɛli malaaka maa, “N kurigiya ni, ka m pɔ'a gba kurigi. Ka wula ka n nin toaai n‑niŋi dinŋɔ yɛdda?” 19Ka malaaka maa daa labsi n‑yɛli u, “Mani n nyɛ Gyeebriyɛli, sɔ ŋɔn bɛ Naawunni tooni la. Ka ŋɔn Naawunni n tum ma na, ni n ti tɔ'asi i ka zaŋŋi lahabasuŋŋu wa n‑ti i. N yɛttɔ'a maa saha yi ti paai, di nin niŋi lala. Amaa i bu niŋi di yɛdda, 20ka dizugu i ya leebi la zɔligu zuna wa, ka ku laa n‑tɔ'asi halli ka di saha maa ti paai.”
21Ka niriba maa daa guusiri Zakariiya, ka di ti gyɛri ba ŋɔn yuui Naawunni Duu maa ni zugu. 22Ŋɔn daa ti yi na, u daa bu nyaŋŋi n‑tɔ'asi n‑ti ba. Ka ba baŋŋi, ni, ŋɔn bɛ Duu maa ni maa, u nya la zii. Ka u yi mari la u nuusi n‑tɔ'asiri m‑bugsiri ba, ka yi kpalim n‑kɔŋŋi yɛttɔ'a. 23Ka di daa niŋi dabsiseesi ka u maaligu tuma dabsa daa ti naai, ka u daa kuli u yiri. 24Dinŋɔ nyaaŋŋa ka u pɔ'a Ilizabɛti daa gbaai puuwa, n‑sɔ'ari u maŋŋa niriba saani halli nti paai u gɔya anu daari, 25n‑yɛtti, ni, “Pampaŋŋɔ ti Dugma yi teaai n yɛla, ka niŋi ma nŋɔa, ni u yiisi ma vi ni niriba saani.”
26Tɔ; ka Ilizabɛti puu maa gɔya ayoobu saha, Naawunni daa tum u malaaka Gyeebriyɛli maa ka u kyaŋŋi tinseaa kan bɛ Galilii tingbaŋŋu ni, ka ka yuuri boonni Nazarɛti la. 27Ka u kyaŋŋi pɔ'asarisɔ saani, ka pɔ'a maa mun yuuri boonni Mariama. Pɔ'asariga maa daa na zi n‑dooni ni doowa, amaa ba daa pun basi nangbambasiri, ni, u nin kuli dɔsɔ ŋɔn yuuri boonni Gyoosɛfi, ka u mun nyɛ NaaDauda za'anɔri biiya. 28Ka malaaka maa daa ti paai Mariama saani na, nti yɛli u, ni, “M puusiri i ni, nyin pɔ'asɔ Naawunni ŋɔn suŋŋi pam wa! Ti Dugma Naawunni bɛ i saani.” 29Ŋɔn daa puusi u seem maa daa gyɛri u pam, ka u birisiri di gbinni ŋɔn nyɛ seela. 30Ka malaaka maa daa yɛli u, “Mariama, di zɔri dabeem, ka i nya zugsuŋŋu Naawunni saani. 31Wumma! I nin gbaai puuwa n‑dɔ'ai bidibga, ka i nin ti puri u yuuri Yisa. 32U nin ti mari tibsim, ka ba nin ti boonni u la Naawunni Ŋɔn Ka Kpeaa biiya. Ka ti Dugma Naawunni nin ti zaŋŋi naam n‑diisi u, u yaaba NaaDauda ŋɔn daa di naseebu la. 33Ka u nin ti di naam n‑su ya yaaba Yaakubu butiri, halli ni saha din ka tɔriga, ka u naam maa ku ti mari naari.” 34Ka Mariama daa yɛli malaaka maa, “N na zi n‑dooni ni doowa. Ka wula ka dinŋɔ nin toaai n‑niŋi?” 35Ka malaaka maa daa labsi n‑yɛli u, “Naawunni Sii Kasi Vuusim nin sigi i zugu na, m‑bɛ i ni, ka Naawunni Ŋɔn Ka Kpeaa wa yiiko nin ti bɛ i saani. Dizugu nyin ti ya dɔ'ai bikasi sɔ maa, ba nin ti boonni u la, ni, ‘Naawunni Biiya’. 36Baŋŋma i dɔ'ara Ilizabɛti yɛla: ammi, ba daa bu boonni u, ni, kundɔ'ara? Tɔ: ŋɔn mun mari bidibga puuwa, ni ŋɔn kurigi maa zaa yɔri, ka ka gɔya ayoobu nŋɔa. 37Dama sɛseelli bu tɔ n‑nyaŋŋi Naawunni yiiko.” 38Ka Mariama daa yɛli u, “Ti Dugma n su ma. Kyɛ ka di niŋi ma hoo nyin ŋɔn yɛli seem maa.” Ka malaaka maa daa bakki n‑kyaŋŋi ka kyɛ u.
39Tɔ. Di saha maa ka Mariama daa yisigi n‑kyaŋŋi yoomayooma n‑kyaŋŋi zɔya ni, nti paai tinseaa kan bɛ Gyuudii tingbaŋŋu ni la. 40M‑paai bɛni nti kpɛ Zakariiya yiri m‑puusi Ilizabɛti. 41Ilizabɛti ŋɔn daa wum Mariama puusigu maa, bii maa daa damni u puuri ni, ka Ilizabɛti paali ni Naawunni Sii Kasi. 42Ka u daa tasi n‑yɛli pampam, ni, “Nyini m mari zugsuŋŋu n‑gaari pɔ'aba zaa, ka bisɔ ŋɔn bɛ i puuri ni maa gba mari la zugsuŋŋu! 43M mun nyɛ la ŋɔni, halli ka n Dugma maa ma kyɛ n saani na wa? 44Man ŋɔn kur wum i puusigu maa, bisɔ ŋɔn bɛ m puuri ni wa damni ni sufupeelli zugu. 45I niŋi yɛdda, ni, ti Dugma ŋɔn tɔ'asi seelli n‑ti i la siri nin niŋi yɛlimaŋni, ka di zugu nyini n nyɛ sufumaasim daana.”
46Ka Mariama yɛli#:-
“N tibgri ti Dugma n sufu ni,
47Ka Naawunni ŋɔn tuligi ma la zugu ka n sufu pɛligi pam.
48Dama u teaai u daabri tarintiri yɛla.
Ka zuna zaŋŋi n‑kyɛnna,
Zamaana zaa nin ti boonni ma sufumaasim daana;
49Dama Yiiko Zaa Daana tum tunkara n‑ti ma,
Ka u yuuri n nyɛ kasi.
50Ka ban zɔri u la muna -
Ban ka ŋɔn mun zɔri ba namboo saha kam.
51U zaŋŋi u nuu ni yiiko n‑ŋmɛ karimbaani dima maa -
Ba teesibeeri nin wurim m‑basi.
52U yiisi la nadima ba naama ni,
Ka tibgri tarimma.
53U zaŋŋi bunsuma n‑diisi kɔm ŋɔn mari seeba maa,
Ka kari bundaandima ka ba bakki ni nuzaala.
54U suŋŋi u daaba Izraɛli dima,
Ka teaai ti yɛla n‑zɔ ti namboo;
55Hoo ŋɔn daa yɛli ti yaadima seem la.
U zɔ Ibrahim ni u nyaaŋŋa dima namboo
Halli ni saha din ka naari.”
56Ka Mariama daa kpalim m‑bɛ Ilizabɛti saani n‑niŋi kaman gɔya ata, ka laa n‑labi n‑kuli u yiri.
57Ka Ilizabɛti dɔ'am saha ŋɔn daa ti paai, u daa dɔ'ai bidibga. 58Ka u ziziitaaba ni u dɔ'ariba daa wum, ni, ti Dugma zɔ u namboo pam, ka ŋɔn ni ban zaa daa mari sufupeelli. 59Bii maa dabsa anii daari ka ba daa la'am na ni ba gunni u ka puri u yuuri. Ba daa ya zaŋŋi la u ba Zakariiya yuuri m‑puri u, 60ka u ma Ilizabɛti mun daa za'asi ka yɛli, ni, “U yuuri nin boonni Gyɔni.” 61Ka ba daa labsi n‑yɛli u, ni, “Ay! - I dɔ'arisɔsɔ ka ni ka u yuuri boonni Gyɔni.” 62Ka daa mari ba nuusi m‑bugsiri m‑boosiri u ba, ni, u boori bii maa yuuri boonni la wula? 63Ka u daa susi bunni n‑sɔbi, ni, “Bii maa yuuri nyɛ la Gyɔni.” 64Ka di daa gyɛri ba zaa. Di saha maa ka Zakariiya zilimni daa di lakki ka u yi tɔ'asiri m‑pɛ'ari Naawunni. 65Ka dabeem daa gbaai ba ziziitaaba maa zaa, ka niriba zaa daa kur diri taaba azama n‑tɔ'asiri yɛla wa Gyuudii zɔya tinsi zaasa ni. 66Ŋɔnkam zaa daa wum yɛla maa daa zaŋŋi a n‑niŋi u sufu ni ka teesiri, ni, “Bii wa lee n ti ya nyɛ la ninvugbɔa?” Dama Naawunni yaa n daa bɛ u ni.
67Ka u ba Zakariiya daa paali ni Vuusim Kasi maa, ka tɔ'asi anabitiri ni, n‑yɛtta#:-
68“Ti pɛ'ari ti Dugma, Izraɛli Naawunni,
Dama u suŋŋi ti n‑yiisi ti wahala ni.
69Ka u daa bɔ tuliginsim daana n‑ti ti na,
Dauda za'anɔri biiya -
Naawunni ŋɔn daa su NaaDauda maa.
70Naawunni daa pun wulisi ti u yɛla,
U daa kyɛ ka u anabidima daa yɛli ti,
Yuuma an gaari la ni -
Ninvugsuma n daa nyɛ ba!
71Ni, u nin tuligi ti ti dindima ni,
Ka yiisi ti ban yaai ti zaa nuu ni.
72-75Naawunni n daa pɔ noori n‑ti ti yaaba Ibrahim,
Ni, u nin yiisi ti ti dindima nuusi ni,
Ka kyɛ ka ti gyeemni u ka dabeem ka ti:
Ka ti niŋi ninvugsuma m‑bɛ u tooni kasikasi,
Halli ni ti nyɔvuri tɔriga.
Dizugu ka u daa zɔ ti yaadima namboo,
Ka daa bu tam u yɛlisuŋŋu ŋɔn nyɛ seem maa.
76M biiya, ba nin ti boonni i la Anabi -
Anabi n‑ti Naawunni Ŋɔn Ka Kpeaa.
Dama i nin ti daŋŋi ti Dugma Naawunni tooni
M‑maali u sɔya n‑ti u.
77I nin wulisi u niriba yɛm,
Ni ba nin baŋŋi tuliginsim ŋɔn nyɛ seem:
Ni, Naawunni nin kyɛ ba taalli m‑pɛŋŋi ba,
78Dama Naawunni zɔ ti namboo pam.
Ka u kyɛ ka neesim yi saazugu n‑kyɛ ti saani na,
79N‑neaai tirim ban bɛ zibsim ni, ni kum puuni,
Ka zaŋŋi nangbanyinni ni sufudoaa soori
N‑wulisi ti nɔba.”
80Tɔ. Ka bii maa daa zoaai na, m‑mari sufukpeemni, m‑bɛ moo ni halli ni dahinseaa ŋɔn daa ti zaŋŋi u maŋŋa n‑wulisi n‑ti Izraɛli dima la.
ទើបបានជ្រើសរើសហើយ៖
LUUKI 1: maw
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2002, Wycliffe Bible Translators, Inc. All rights reserved.
