LUUKI 2
2
1Tɔ. Di daa niŋi lala, ka saha kanŋɔna ka Room NaaTitaari Agasitisi daa tisi noori ni ba ti sɔbri u suulinsi ni niriba zaa yuya. 2(Niriba maa daŋŋni yuya sɔppu n‑daa la, sahaseaa Kuriniyusi ŋɔn daa nyɛ Siriiya tingbaŋŋu Gɔmna la.) 3Ka sɔkam zaa daa kunni u toori tiŋŋa ni ba ti sɔbi u yuuri. 4Ka Gyoosɛfi gba daa yi Nazarɛti, Galilii tingbaŋŋu ni, nti sigi n‑kyaŋŋi Bɛtlihɛm, Gyuudii tingbaŋŋu ni. Ban daa dɔ'ai NaaDauda tinseaa nla; Gyoosɛfi daa nyɛ la NaaDauda za'anɔri nira, dizugu ka u daa kyaŋŋi bɛni ni u ti sɔbi u yuuri. 5Ŋɔn ni Mariama n daa la'am n‑kyaŋŋi, dama Mariama daa pun basi nangbambasiri, ni, u kuli u. Di saha maa ka Mariama daa mari pukarigu. 6Ban daa paai bɛni m‑bɛ ni maa, u dɔ'am saha daa ti paai. 7Ka u daa dɔ'ai u pɔ'asaridɔ'am bidibga, ka zaŋŋi tana n‑vili u, n‑dooli bunkɔbri diibu bunni ni, dama ba daa bu nya doaa ziiya saamma yiri maa ni.
8Tɔ; ka pɛguriba daa bɛ tiŋŋa maa moo ni yuŋŋu, n‑guri ba peesi. 9Ka ti Dugma malaaka daa yi ba saani na, ka ti Dugma gyirima neesim daa neaai n‑gyiligi ba, ka dabeem daa kpɛ ba pam. 10Ka malaaka maa daa yɛli ba, “Ya di zɔri dabeem! Ka n zi la lahabasuŋŋu na ni n ti ya, ka ka mari sufupeelli pam, ka nyɛ sɔkam zaa dinni. 11Dama ba da dɔ'ai ya Tuligra zuna yuŋŋu wa. NaaDauda tiŋŋa ka ba da dɔ'ai u. Ŋɔna n nyɛ Masiiya, Naawunni ŋɔn daa basi nangbambasiri, ni, u zaŋŋi sɔ n‑tum na, ka u nyɛ ti Dugma la. 12Amaa dinŋɔ nin kyɛ ka ya baŋŋi, ni, n yɛligu wa nyɛ la yɛlimaŋni: ya nin ti nya bileaa maa ka ba vili u tana n‑dooli bunkɔbri diibu bunni puuni.” 13Di saha maa ka malaaka bɔbgu daa yi arizana n‑kyɛ na, m‑paasi malaaka yinni maa zugu, ka ba yuumni m‑pɛ'ari Naawunni n‑yɛtta#:-
14“Naawunni ŋɔn bɛ saazugu mari gyirima pam,
Ka daadam ban bɛ duniya wa ni nya sufudoaa ni nangbanyinni,
Naawunni ŋɔn wuri ba zugu!”
15Malaakadima maa ŋɔn daa basi ba ka labi arizana ni maa, pɛguriba maa daa yɛtti la taaba, ni, “Dinŋɔna, ti kyɛm Bɛtlihɛm nti nya bunseelli din niŋi maa, ti Dugma ŋɔn wulisi ti seelli la.” 16Ka ba daa kyaŋŋi yooma, m‑paai m‑bɔ n‑nya Mariama ni Gyoosɛfi, ni bileaa maa, ka u dɔ bunkɔbri diibu bunni maa puuni. 17Ban daa nya lala maa, ba daa yɛli malaaka ŋɔn daa tɔ'asi bii maa yɛla seem la n‑ti ba. 18Ŋɔnkam zaa daa wum pɛguriba maa lahabaari maa, di daa yi niŋi ba la alahazibu. 19Mariama mun daa zaŋŋi yɛla maa zaa n‑niŋi u sufu ni, n‑kur teesiri a yɛla. 20Ka pɛguriba maa daa labi n‑tiri Naawunni gyirima ni pɛ'abu ban daa wum ka nya seelli maa zugu. Ka di siri daa nyɛ la hoo malaaka maa ŋɔn daa yɛli ba seem la.
21Tɔ; ka bii maa dabsa anii daari ŋɔn daa ti paai, ba daa gunni u ka puri u yuuri Yisa, dama ban daa na bu gbaai u puu saha seaa la, malaaka maa daa pun yɛli, ni, ba boolim u yuuri lala.
22Tɔ. Di nyaaŋŋa ka saha daa ti paai ni Gyoosɛfi ni Mariama kyaŋŋi nti tum kaman Musa zaaligu ŋɔn yɛli seem, ni, ba maalim Mariama dɔ'am kasitiri maaligu. Ka ba daa zaŋŋi bii maa n‑kyaŋŋi Gyɛrusalɛm, ni ba ti zaŋŋi u n‑ti ti Dugma. 23Ba daa niŋi kaman din sɔbi n‑yɛli ti Dugma zaaligu ni seem, ni, ba zaŋŋma ba bikpamma, bidibsi la, n‑tisi ti Dugma. 24Ka daa maali maaligu maa kaman ti Dugma zaaligu ŋɔn yɛli seem la, ni, ba kɔrim ŋmanzeesi ayi bee ŋmambisi ayi m‑maali maaligu.
25Tɔ; dɔsɔ n daa bɛ Gyɛrusalɛm, ka u yuuri boonni Simiyɔn, ka doo wa daa zɔri Naawunni ka dɔli u zaaligu suŋŋa: ka guusiri Izraɛli dima tuligra soori; ka Naawunni Vuusim Kasi daa bɛ u ni. 26Sii Kasi daa pun kasigi n‑yɛli u, ni, faasee ka u ti nya ti Dugma Masiiya pɔi ka naayi kpi. 27Ka Naawunni Sii maa daa kyɛ ka u kyaŋŋi Naawunni Gyeeŋŋu Yiri maa ni. Di saha maa ka Gyoosɛfi ni Mariama daa mari Yisa n‑kpeeri na ni ba ti niŋi u hoo zaaligu kaari ŋɔn nyɛ seem maa. 28Ka Simiyɔn daa deaai bii maa n‑zali, ka pɛ'ari Naawunni n‑yɛtta#:-
29“Dizugu, n Dugma, zuna zaŋŋi n‑kyɛnna,
I nin kyɛ ka m bakki duniya wa ka kyaŋŋi ni sufudoaa;
Hoo nyin ŋɔn daa basi nangbambasiri n‑ti ma seem la.
30Dama n nini nya i Tuligra maa,
31nyin daa zaŋŋi sɔ n‑ti butiri kam zaa wa.
32Ŋɔna n nyɛ neesim din ya neaai tinzundima
M‑bugsi ba i soori;
Ka i niriba muna, Izraɛli dima -
I nin taasi gyirima na n‑ti ba.”
33Tɔ; ka Simiyɔn ŋɔn daa tɔ'asi bii maa yɛla maa, di daa niŋi bii maa ba ni u ma alahazibu. 34Ka Simiyɔn daa susi Naawunni susisuma n‑niŋi ba zugu, ka yɛli u ma Mariama, ni, “Dinŋɔ ka Naawunni zaali, ni bii wa nin kyɛ ka Izraɛli dima pam ti sigsi ba maŋŋa ka laa n‑du yaasa. U nin ti laa n‑leebi ŋɔn ya wulisi niriba tuliginsim soori, ka baseeba nin za'asi u yɛla. 35Ka i gba sufu nin sa'am di zugu, kaman takoobi ŋɔn kusi nira seem la. Ka yɛlisɔ'ara nin ti yi niriba pam sufu ni na.”
36Ka pɔ'asɔ gba daa bɛ ni, n‑nyɛ anabi, ka u yuuri boonni Anna. Ka nyɛ Fanuwɛli biiya, Aseeri za'anɔri ni nira. U daa kurigi pam, 37dama u daa zinni doo yiri la yuuma ayɔpɔi, ka daa zinni pukɔtiri muna halli ni yuuma pisinii ni anaasi. U daa kur bɛ la Naawunni Gyeeŋŋu Yiri ni, yuŋŋu ni wuntaŋŋa saha zaa, n‑gyeemni Naawunni ni wunsusigu ni noori loobu. 38Ka pɔ'a wa daa kyɛ na di saha maa, m‑pɛ'ari Naawunni, ka tɔ'asiri bii maa yɛla n‑tiri ninvugseeba ban daa guusiri Gyɛrusalɛm tuliginsim dabsiri la zaa.
39Tɔ; ka ban daa tum ti Dugma zaaligu ŋɔn nyɛ seem zaa n‑naai, ba daa labi n‑kuli Galilii, m‑paai ba toori tiŋŋa Nazarɛti. 40Ka bii maa daa zoaai na, m‑mari yɛm ni yaa, ka Naawunni wurilim bɛ u ni pam.
41Yuumni kam Yisa ba ni u ma daa yi kyɛnni la Gyɛrusalɛm nti diri Yakki-n‑Gaari Kyuu. 42Ka bii maa ŋɔn daa ti paai yuuma pii ni ayi maa, ba daa kyaŋŋi n‑di kyuu maa hoo ban diri ka yuumni kam seem. Ka kyuu maa dabsa ŋɔn daa ti naai ka ba labri n‑kunni la, 43Yisa daa kpalim la Gyɛrusalɛm. Ka u ba ni u ma bu mi, dama ba daa teesi, ni, u bɛ la daadam maa ni. 44Ka dizugu daa kyɛ ka ba kyaŋŋi la dabsimunni kyɛnni; di nyaaŋŋa ka ba daa naayi boori u ziiya ba dɔ'ariba ni ba zɔdima saani. 45N‑daa bɔ u n‑kɔŋŋi bɛni, ka labi Gyɛrusalɛm nti boori u ziiya. 46Di dabsa ata daari ka ba daa nya u Naawunni Gyeeŋŋu Yiri ni, ka u zi karimbadima saani, n‑wumsiri ba yɛttɔ'a, ka boosiri ba boosa. 47Ŋɔnkam zaa daa wum u yɛttɔ'a maa, di daa niŋi ba la alahazibu u yɛm gyɛrigri zugu. 48Ban daa nya u maa di daa gyɛri ba ni, ka u ma boosi u, ni, “M biiya, wula ka i niŋi ti seem wa? Man ni i ba yi boori la i ziiya ni sufusa'aŋŋu.” 49Ka u daa labsi n‑yɛli ba, “Bɔ n niŋi ka ya boori n ziiya? Ammi, ya bu mi, ni, di kpa la talasi ni m bɛ m Ba tuma maa ni?” 50Ka ba daa bu mi ŋɔn yɛli ba seem maa gbinni. 51Ka u daa dɔli ba n‑labi n‑kuli Nazarɛti, ka deaari ba noori. Ka u ma daa zaŋŋi yɛla maa zaa n‑niŋi u sufu ni. 52Ka Yisa bamsim ni u yɛm daa paasira, ka u mari zugu pam Naawunni ni ninsaalidima saani.
ទើបបានជ្រើសរើសហើយ៖
LUUKI 2: maw
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2002, Wycliffe Bible Translators, Inc. All rights reserved.
