MAAKI 16
16
1Vuusim Dabsiri maa ŋɔn daa ti gaari ka Mariama, Magdala tiŋŋa pɔ'a la, ni Mariama Gyeemsi ma la, ni Saloomi, daa da kpanyuuma ni ba kyaŋŋi nti soosi Yisa ningbiŋŋu. 2Alahari daari bɛkyikyeoo ka ba daa kyɛnni Yisa gballi maa ziiya. 3Ba daa bɛ soori ni ka daa boosiri taaba, ni, “Ŋɔni n ya m‑biligi kugri la gballi maa noori ni n‑ti ti?” 4Amaa ba daa gɔsi n‑nya, ka kugri maa pun biligi ni. Kugtibsiri n daa nyɛ ka. 5Ba daa kpɛ gballi maa puuni, ka daa nya na'akyimbilisɔ, ka u yɛ neempeela faratiti n‑zi gballi maa ni, ba nudirigu ya'ari, ka di daa gyɛri ba pam. 6Ka u daa yɛli ba, ni, “Ya di kyɛ ka dabeem mari ya.”, ni, “Ya boori la Yisa ziiya, Nazarɛti dɔsɔ ban daa kpaasi la. U yigsiya. U laa n‑ka kpa. Ya nyam ban daa dooli u seela nŋɔa! 7Amaa ya kyɛma n‑yɛli u nyaandɔliba, ni Piita, ni, u daŋŋi ba tooni n‑kyaŋŋi Galilii. Bɛni ka ba nin nya u, hoo ŋɔn daa pun yɛli ba seem la.” 8Di daa gyɛri pɔ'aba maa pam n‑ŋma ba yam; ka dizugu ba daa zɔ n‑yi gballi maa ni na. Dabeem ŋɔn daa mari ba pam la zugu, ba daa bu yɛli sɔ seelli.
Gbankura seesi puuni ba sɔbi m‑paasi anŋɔa#:-
[[9U daa yisigi Alahari daari asuba pinipini, ka di dabsiri maa u daa daŋŋi n‑kyɛ ka Mariama Magdala pɔ'a la n nya u, pɔ'asɔ ŋɔn daa kari arizimbeeri ayɔpɔi u zugu ni la. 10Mariama daa yi bɛni n‑kyaŋŋi Yisa nyaandɔliseeba la saani, ka ba daa zi la ni sufusa'aŋŋu n‑kumna; ka u daa yɛli ba di lahabaari maa. 11Ban daa ti wum, ni, Yisa bɛ u nyɔvuri ni ka pɔ'a maa pun nya u, ba daa bu niŋi lala yɛdda.
12Di nyaaŋŋa ka ba niriba ayi daa kyɛnni ba nɔba m‑pɔtti moo ni, ka Yisa beesigu daa takki ka u yi ba saani. 13Ba daa labi nti yɛli ban kpalim la, amaa ba daa bu niŋi ba gba yɛligu maa yɛdda.
14Tɔ. Ka u daa naayi zaŋŋi u maŋŋa n‑wulisi u nyaandɔliba pii ni yinni la, ban daa ti diri diibu sahanseaa la, ka daa tɛrisi ba pam ba yɛdda kaalinsi maa zugu, ni ba tuppuwumni zugu, dama ba taaba la daa nya u u kum yisigri maa nyaaŋŋa ka ban mun daa bu niŋi ba yɛligu maa yɛdda. 15Ka u daa yɛli ba, ni, “Ya kyam nti gyili duniya lugri kam zaa m‑mooli lahabasuŋŋu wa yɛla n‑ti Naawunni ŋɔn naam sɔ zaa. 16Ka ŋɔnkam niŋi yɛdda n‑su Naawunni koom nin nya tiliginsim, amaa ŋɔnkam za'asi ka bu niŋi yɛdda nin baasi yɔri. 17Ka tunkara anŋɔ nin bɛ yɛdda dima saani: n yuuri maa ni ka ba nin kari arizimbeeri n‑yiisi niriba ni, ba nin tɔ'asi yɛttɔ'a balibubalibu, 18ba yi ti gbaai wugi ni ba nuusi, bee, n‑nyu tibeoo, di bu ya niŋi ba sɛseelli; ba nin zaŋŋi ba nuusi m‑pa baaridima zugri ka ba nya alaafɛa.”
19Tɔ. Ti Dugma Yisa ŋɔn daa tɔ'asi dinŋɔ zaa n‑ti ba n‑naai, Naawunni daa zaŋŋi u n‑duusi arizana ni ka u zini ŋɔn Naawunni nudirigu ziiya. 20U nyaandɔliba mun daa yi n‑kyaŋŋi ya'ari kam zaa nti mooli lahabaari maa. Ka ti Dugma daa bɛ ba saani n‑tumna, ka u daa wulisi, ni, ba yɛlisim nyɛ la yɛlimaŋni, u tunkara seesi an daa dɔli ba maa zugu. Ammi.]]
ទើបបានជ្រើសរើសហើយ៖
MAAKI 16: maw
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2002, Wycliffe Bible Translators, Inc. All rights reserved.