Alawi 3
3
Isadaka cho ukhalha wo mpuha ni Nlhuku
1“Yakhalhaka ntu nookumiha isadaka yo ukhalha wo mpuha ni mii, ni isadaka awe iyo yakhalhaka ing'ope n'dume ama ithiyana paahi, yoyo mwannama uyo hiremare variwoothe. 2Ntu uyo eesheke moono awe vamuruni wo mwannama uyo ni unhitha vakhiviru ni nlhako wo Nihema Nitakatifu. Ni ayo opochera ishaani o iyari i Naharuni akusheke iphome ni unyunyeriha mipata chonkhaye cho madhubahu. 3Yamalhaka, opochera ishaani athamiheke makhura onkhaye anokhunelha marupo o mwannama o isadaka yo uwiiha mpuha iyo, akusheke apaheke vamooroni umadhubahuni, ukhalha isadaka inokumihiya wa Apwiiya Nlhuku wo mooro. 4Chiicho, athamiheke imphio piilhi ni makhura aya vamoka ni ithayi yoombone ya ahapa. 5Ni yamalhakaru, iyari i Naharuni anoopaha vamadhubahuni vamoka ni isadaka yo upahiya irii vachulhu ikhuni chinopharelha mooro, yeyo phi isadaka yo upahiya vamooroni mpaka uvia irii ni nihiriri noombone ninaachivelha Apwiiya Nlhuku.
6“Yakhalhaka yeyo isadaka yo waathanihiya iyo inokumihiya wa Apwiiya Nlhuku iyo ikhumme nkutiro wo ikhondoro ama wo ipuri, paahi athanlheke ilhopwana ama ithiyana ihiremanre. 7Yakhalhaka ntu nonkhumiha mwaakhondoro ukhalha isadaka awe yo umwaathaniha wa Apwiiya Nlhuku, paahi ankumiheke, 8eesheke moono awe vamuruni wo yoyo mwannama uyo ni unhitha vakhiviru ni Nihema Nitakatifu. Opochera ishaani o iyari i Naharuni anoomichamicha iphome vamadhubahuni mipata chaya chonkhaye. 9Yamalhaka, ukhuma wo yeyo isadaka yo ukhalha wo mpuha ni Apwiiya Nlhuku wo mooro iyo, opochera ishaani awiiheke chi chittu chi, makhura awe, mwiilha wo makhura wonkhaye utupulhiye vanaatameria chinene nthana vamoka ni makhura onkhaye anokhunelha marupo ni makhura onkhaye o mmirimani, 10ni imphio piilhi chilhe ni makhura aya vamoka ni ithayi yoombone ya ahapa. 11Mmoka aya opochera ishaani anoopaha mooro chechiyo chonkhaye vachulhu madhubahu thoko isadaka yo yolhia inokumihiya wa Apwiiya Nlhuku wo mooro.
12“Yakhalhaka isadaka awe iyo ipuri, paahi akumiheke umihoolho wa Apwiiya Nlhuku 13neeshilhe moono awe vamuruni wo mwannama uyo ni unhitha vakhiviru ni Nihema Nitakatifu. Ni mmoka o iyari i Naharuni noomichamicha iphome vamadhubahuni mipata chaya chonkhaye. 14Yamalhakaru, athamiheke makhura onkhaye anokhuneelha marupo o yoyo mwannama uyo, 15ni imphio piilhi chilhe ni makhura aya vamoka ni ithayi yoombone yo ahapa. 16Opochera ishaani apaheke vamooroni vachulhu madhubahu thoko choolhia chinokumihiya isadaka wa Apwiiya Nlhuku wo mooro wiira chinukhelhe nihiriri ninaachivelha Apwiiya Nlhuku. Makhura onkhaye a Apwiiya Nlhuku.
17“Paahi etu mahuku onkhaye ni vakittu variwoothe vanohalha inyu ukhalha, nnothananiya uvarechesha alha malheheriyo alha, nhilhie mena makhura ama iphome yo mwannama riyoothe.”
ទើបបានជ្រើសរើសហើយ៖
Alawi 3: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.