Alawi 4
4
Isadaka wo nlhatu no uwonya wo uhichuwelha
1Apwiiya Nlhuku nkayeerelha ashinna Musa wiira, 2“Mwaahimerieke attu o israeli wiira, yakhalhaka ntu howonya wo uhichuwelha, nkaapanga ittu ichichihiye ni malheheriyo a Apwiiya Nlhuku, apangeke thoko cho.
3“Yakhalhaka Opochera ishaani Olhupalhe phi wonyilhe, nkayaahelha attu muuttekani, paahi yayo akumiheke wa Apwiiya Nlhuku n'dume nikani no ing'ope nihiremanre variwoothe, nikhalhe isadaka yo uthamiha uwonya waya uwo. 4Awiiheke yeyo n'dume nikani no ing'ope nno vakhiviru ni Nihema Nitakatifu, umihoolho wa Apwiiya Nlhuku. Eesheke moono aya vamuruni wo n'dume nikani no ing'ope nno ni uhitha umihoolho wa Apwiiya Nlhuku. 5Yamalhaka, yayo Opochera ishaani Olhupalhe ayo akusheke iphome vakani ni ukelhana nhina Nihema Nitakatifu. 6Ahelheke nikokho naya mphomeni mmo ni unyunyihera mikwaha saba umihoolho wa Apwiiya Nlhuku umihoolho wo nipaziya no Vakittu Vatakatifu. 7Yamalhaka, akusheke iphome ikina ni uhika inyaka cho madhubahu o ututumiheriya ubani wo nihiriri nomboone umihoolho wa Apwiiya Nlhuku u Nihema Nitakatifu. Iphome inohalha iyo arihelheke varii ikhalhelho yo madhubahu o upaheriya isadaka arii vathe vakhiviru ni nlhako wo Nihema Nitakatifu. 8Yamalhaka athamiheke makhura onkhaye o yeyo ing'ope iyo. Makhura anokhunelha marupo ni arii nhina, 9imphio piilhi ni makhura arii vachulhu aya, arii nnyununi, ni alhe avarananne ni imphio ni ahapa, chikhalhaka phi chittu chinothamihiya wa mwannama o isadaka yo waathanihiya. 10Yamalhaka vavawo, opochera ishaani akusheke ni upaha mooro vachulhu madhubahu o upaheriya isadaka, thoko chineeriya wo isadaka yo mwannama nokumihiya isadaka yo uthamiha uwonya. 11Nansho nrapalha no yeyo ing'ope iyo, inama, muru, mieto, inama cho mmirimani vamoka ni mavi aya, 12yaani inama yonkhaye ihanlhe, arweeheke ni upaha mooro uchereshere nikambi. Apaheke vamooroni vachulhu ikhuni chinopharelha mooro, vavawo vakittu vanorihelhiya itura varumelhelhiye ni Apwiiya Nlhuku vawo.
13“Yakhalhaka nlhoko wonkhaye wa attu o Israeli uhowonya wo uhichuwelha, wo upanga ittu ichiichihiye ni malheheriyo a Apwiiya Nlhuku, 14phiyaru uwonya uwo wachuwaniaka, nlhoko wonkhaye ukumiheke n'dume nikani no ing'ope nikhalhe isadaka yo uthamiha uwonya uwo. Awiiheke vakhiviru ni Nihema Nitakatifu. 15Ashulhupalhe ahoolhelhi o nlhoko wa attu eesheke miono chaya vamuruni wo n'dume nikani no ing'ope nno, yamalhaka nihithiyeke umihoolho wa Apwiiya Nlhuku. 16Opochera ishaani Olhupalhe awiiheke iphome yo yeyo ing'ope iyo nhina Nihema Nitakatifu. 17Ahelheke nikokho naya mphomeni mmo ni unyunyihera mikwaha saba umihoolho wa Apwiiya Nlhuku umihoolho wo nipaziya no Vakittu Vatakatifu. 18Yamalhaka ahikeke iphome ikhona cho madhubahu arii Nihema Nitakatifu umihoolho wa Apwiiya Nlhuku. Iphome ihanlhe iyo ariheke vathi varii ikhalhelho yo madhubahu o upaheriya isadaka arii vakhiviru ni nlhako wo Nihema Nitakatifu. 19Akusheke makhura onkhaye o mwannama uyo ni upahera vachulhu madhubahu. 20Chiicho tho, apangeke wo ing'ope n'dume iyo thoko chipannge aya ikina yo isadaka yo uthamiha uwonya ilhe. Paahi Opochera ishaani ayo anoopanga yeyo ittu iyo wo nlhatu wo uhiyereriya uwonya uwo, ni attu ayo anoohiyereriya. 21Yamalhaka akusheke inama ihanlhe yo ing'ope n'dume iyo ni ukelhana uchereshere nikambi ni upaha vamooroni thoko chipannge aya wo ikina yo uthamiha uwonya waya anene ilhe. Yeyo phi isadaka yo uthamiha uwonya wa attu onkhaye.
22“Yakhalhaka nholhelhi howonya wo uhichuwelha wo upanga ittu ichichihiye ni malheheriyo a Apwiiya Nlhuku, Nlhuku awe, nkaatteka, 23vanohalha awe uchuwelhihiya uwonya upannge awe uwo, awiiheke isadaka awe yo ipuri ilhopwana yo uhiremara. 24Eesheke moono aya vamuruni wo ipuri iyo ni uhitha vakittu vanohithelhiya isadaka yo upahiya umihoolho wa Apwiiya Nlhuku. Yeyo phi isadaka yo uthamiha uwonya. 25Ni opochera ishaani ahelheke nikokho naya mphomeni mwo isadaka yo uthamiha uwonya ni uhika inyaka cho madhubahu o upaheriya isadaka. Iphome inohalhelha iyo arihelheke urii ikhalhelho yo madhubahu o upaheriya isadaka. 26Yamalhaka, apaheke makhura onkhaye o ipuri n'dume nno umadhubahuni, thoko chinopanga aya wo makhura o mwannama o isadaka yo uwiiha mpuha. Wo yeyo iphiro iyo opochera ishaani ampangelheke nholhelhi thoko chiichammo wo uthamiha nlhatu wawe wo uwonya, ni uyo noohiyereriya.
27“Yakhalhaka ntu riyoothe nkina howonya wo uhichuwelha, wo upanga ittu ichiichihiye ni malheheriyo a Apwiiya Nlhuku, yoyo hotteka, 28vanohalha awe uchuwelha wiira howonya, awiiheke isadaka yo ipuri nkhoolho ihiremanre wo nlhatu no uthamiha uwonya upannge awe. 29Eesheke moono aya vamuruni wo ipuri iyo ni uhitha vakittu vanohithelhiya isadaka yo upahiya umihoolho wa Apwiiya Nlhuku. Yeyo phi isadaka yo uthamiha uwonya. 30Ni opochera ishaani ahelheke nikokho naya mphomeni mwo isadaka yo uthamiha uwonya ni uhika inyaka cho madhubahu o upaheriya isadaka. Iphome inohalhelha iyo arihelheke urii ikhalhelho yo madhubahu o upaheriya isadaka. 31Athamiheke makhura onkhaye o ipuri iyo thoko chinothamiha aya makhura yo mwannama o isadaka cho uwiiha mpuha, ni opochera ishaani anoopaha vamadhubahuni, ni nihiriri naya noombone ninowaachivelha Apwiiya Nlhuku. Wo yeyo iphiro iyo opochera ishaani anompangelha yoyo ntu uyo ittu yo waathaanihiya, ni uyo noohiyereriya.
32“Yakhalhaka yoyo ntu uyo nommwiiha mwaakhondoro wo nlhatu wo isadaka yo uthamiha uwonya, paahi ammwiiheke mwaakhondoro nthiyana o uhiremara. 33Eesheke moono awe vamuruni wo yoyo mwaakhondoro o isadaka yo uthamiha uwonya uyo, ni unhitha vakittu vanohithelhiya ashinama o isadaka yo upahiya. 34Ni opochera ishaani ahelheke nikokho naya mphomeni mwo isadaka yo uthamiha uwonya ni uhika inyaka cho madhubahu o upaheriya isadaka. Iphome inohalhelha iyo arihelheke urii ikhalhelho yo madhubahu o upaheriya isadaka. 35Yamalhaka, athamiheke makhura onkhaye thoko chinothamihiya aya makhura o ikhondoro yo isadaka yo uwiiha mpuha, ni opochera ishaani anoopaha vachulhu madhubahu, vamoka ni isadaka chinokumihiya wa Apwiiya Nlhuku wo mooro. Ni wowo yeyo iphiro iyo, opochera ishaani anompangelha yoyo ntu uyo ittu yo waathaanihiya, ni uyo noohiyereriya.”
ទើបបានជ្រើសរើសហើយ៖
Alawi 4: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.