Alawi 2
2
Isadaka cho choolhia
1“Ntu riyoothe awiihaka isadaka yo choolhia wa Apwiiya Nlhuku, yeyo isadaka iyo ikhalheke yo iphepa yo shilhia. Amiinelheke makhura o izeituni ni ubani vachulhu. 2Yamalhaka awiiheke wa yayo opochera ishaani o iyari i Naharuni ayo. Akusheke nthatha nimoka no yeyo iphepa yo shilhia irii ni makhura ni ubani iyo ni waarwehelha opochera ishaani mmoka aya anohalha upaha vachulhu madhubahu, ikhalhe isadaka yo wooniha wiira isadaka phi yawaya Apwiiya Nlhuku. Yeyo phi isadaka yo upahiya irii ni nihiriri noombone ninaachivelha Apwiiya Nlhuku. 3Inohalha iyo, yeyo phi isadaka yawaya opochera ishaani. Yeyo phi mpatta ntakatifu chinene wo isadaka inokumihiya wa Apwiiya Nlhuku, wo upahiya vamooroni.
4“Yakhalhaka ntu nookumiha wa Apwiiya Nlhuku isadaka yo choolhia chooshiye viikho, chechiyo chikhalheke maandazi ama mikatte chihihelhiye ihengedure cho iphepa yo shilhia ithakanihiye ni makhura o izeituni, ama yo mikatte cho uvevialha chihihelhiye ihengedure.
5“Yakhalhaka isadaka inokumiha inyu phi yo nkatte wooshiye wo uhikhalha makhura, yoyo ukhalheke wo iphepa yo shilhia ithakanihiye ni makhura o izeituni nansho wo uhihelhiya ihengedure. 6Chechiyo mikatte chiyo chimianihiyeke ni umiinelhiya makhura, yeyo phi isadaka yo choolhia.
7“Yakhalhaka isadaka inokumiha inyu phi yo mikatte chaapeiye munsufuriyani, yeyo ikhalheke yo iphepa yo shilhia ni uhelhiya makhura. 8Mmwiiheke isadaka yo choolhia ikooroshiye wo chechiyo chittu chiyo umihoolho wa Apwiiya Nlhuku, ni opochera ishaani arweeheke umadhubahuni. 9Opochera ishaani anookusha mpatta wo yeyo isadaka iyo ikhalhaka phi isadaka yo wooniha wiira isadaka phi chawaya Apwiiya Nlhuku ni upahiya vachulhu madhubahu. Yeyo phi isadaka yo upahiya vamooroni irii ni nihiriri noombone ninaachivelha Apwiiya Nlhuku. 10Mpatta wo isadaka yo choolhia unohalha, phi wawaya opochera ishaani. Yoyo phi mpatta ntakatifu chinene, ukhalhawaya ukhumme wo isadaka inokumihiya wa Apwiiya Nlhuku wo upahiya vamooroni.
11“Isadaka iriyoothe yo choolhia inohalha inyu ukumiha wa Apwiiya Nlhuku inothananiya wiira ikhalheke yo ukooroshiya wo uhihelhiya ihengedure. Ukhalhawaya nhochiichihiya ukumiha isadaka yo upahiya vamooroni ihelhiye ihengedure mena urawo. 12Mmwiiheke wa Apwiiya Nlhuku isadaka yo milhipu yo choolhia chinyu kila iyaakha. Nansho chechiyo khachinopahiya umadhubahuni thoko cho nihiriri ninaachivelha chilhe. 13Nlhukeke maakha isadaka chinyu chonkhaye cho choolhia. Nhihiye mena ulhuka maakha isadaka chinyu cho choolhia ukhalhawaya maakha phi nooniha malhehano apannge awe Nlhuku vamoka ni mwaattiva. 14Vanowiiha inyu isadaka yo milhipu yo choolhia chinyu wa Apwiiya Nlhuku, mmwiiheke chinooshiye mmachaashini mwaya. Ama nkumiheke mikatte cho wooshiya chikooroshiye wo iphepa yo ingaano yo ushilhia. 15Nhelheke makhura ni ubani. Yeyo phi isadaka yo choolhia. 16Opochera ishaani apaheke mpatta wo isadaka yo choolhia iwotiye ni makhura vamoka ni ubani waya wonkhaye, ikhalhe isadaka yo wooniha wiira isadaka yawaya Apwiiya Nlhuku. Yeyo phi isadaka inokumihiya wa Apwiiya Nlhuku wo mooro.”
ទើបបានជ្រើសរើសហើយ៖
Alawi 2: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.