Uttawa 6
6
1Nansho Apwiiya Nlhuku nkayaakhulha ashinna Musa wo wiira, “Vano nnowoona chinohalha aka waapanga Nafarao. Ukhalhawaya wo moono aka wo machiri anowaahiyerera attu aka wiira athamache. Eiyo, wo machiri anowoomolha Aisraeli athamache mwiilhaponi mwaya.”
Nlhuku noweehana ashinna Musa
2Nlhuku nkeerelha ashinna Musa, “Mii phi Apwiiya Nlhuku. 3Kahaakhumelhelha Aburahimu, Naisaka ni Nayakhobo kichuwelhiyaka wiira Nlhuku o Machiri onkhaye. Nansho akachuwelhiye uwannyaya ukhalha Apwiiya Nlhuku. 4Tho, kahopanga malhehano ni ayo wiira kinowaavaha ilhapo yo Kanaani, ilhapo waakhanlhe aya thoko alheto. 5Uthepa yayo, kiheewa ichuku ya Aisraeli anottwarushiya ni attu o Umisri, ni mii kihoopuwelha malhehano aka. 6Paahi etu, mwaahimerieke Aisraeli wiira, ‘Mii Apwiiya Nlhuku! Kinowookholha ukhuma upottani wa attu o Umisri. Kinowookolha moono aka urii wo machiri ni waatwarusha chinene attu o Umisri, ni uwoopolhani mwaattiva. 7Kinoupangani ukhalha attu aka, ni mii kinookhalha Nlhuku inyu. Ni inyu nnowa uchuwelha wiira mii phi Apwiiya Nlhuku inyu, kuukumihilheni upottani mwa attu o Umisri. 8Ni mii kinourwehani ilhapo ilhe yaavahilhe aka Aburahimu, Naisaka ni Nayakhobo. Kinouvahani yeyo ilhapo iyo ikhalhe yawinyu. Mii phi Apwiiya Nlhuku kaalhehilhe.’ ” 9Ashinna Musa nkayeerelha Aisraeli yayo malhove ayo. Nansho manyaattu ayo khayewelhenlhe ukhalhawaya mirima chaya chahokhwa wo nlhatu wo upangihiya ntheko wo ipotta.
10Yamalheke Apwiiya Nlhuku nkayeerelha ashinna Musa, 11“Nrwe mwaahimerie Nafarao, amwene o Umisri, wiira aahiye Aisraeli athamache mwiilhaponi mwaya.”
12Nansho ashinna Musa nkayaakhulha Apwiiya Nlhuku, “Yakhalhaka Aisraeli khanokiiwelhelha, Nafarao anohalha ukiiwelhelha chani? Tho, mii ntu kihinooria wulhumacha rata!” 13Nansho Apwiiya Nlhuku nkayaalhehera ashinna Musa ni Naharuni arwee u Nafarao, amwene o Umisri, yaaholhelhe Aisraeli uthama Umisri uwo.
Iyari ya ashinna Musa ni iyari i Naharuni
14Alha phi machina a manyaapwiiya aya Aisraeli. Achishaana a Narobeni, nttara ni Naisraeli yaani Nayakhobo yaari, Henoko, Palu, Hesroni, ni Karimi. Yayo yaari manyaapwiiya a attu o nihimo ni Narobeni. 15Achishaana ashilhopwana a Nasimeoni yaari, Yemueli, Yamini, Ohadi, Yakini, Sohari ni Shauli. Shauli ulha aayariye ni nthiyana o Ukanaani. Yayo yaari phi manyaapwiiya a attu o nihimo ni Nasimeoni. 16Achishaana ashilhopwana a Nalawi ni iyari aya yaari, Gershoni, Kohathi ni Merari. Nalawi yaalhokenlhe iyaakha imia imoka ni makhumi mararu ni saba. 17Achishaana ashilhopwana a Nagershoni yaari, Libni ni Shimeyi, ni iyari aya yaari yulhupalhe. 18Achishaana ashilhopwana a Nakohathi yaari, Amramu, Ishari, Hebroni ni Uzieli. Nakohathi yaalhokenlhe iyaakha imia imoka ni makhumi mararu ni ttaru. 19Achishaana ashilhopwana a Namerari yaari, Mahli ni Mushi. Yayo phi manyaapwiiya a attu o nihimo ni Nalawi.
20Naamramu yahaathelha Nayokebedi, amati aya, ni ayo nkayaayara Naharuni ni ashinna Musa. Naamramu yaalhokenlhe iyaakha imia imoka ni makhumi mararu ni saba. 21Achishaana ashilhopwana a Naishari yaari, Kora, Nefegi ni Zikiri. 22Achishaana ashilhopwana a Nauzieli yaari, Mishaeli, Elsafani ni Sithri.
23Naharuni ahonthelha Elisheba, mwaamwana a Naaminadabu, arokorawe Nashoni. Nkayaayara Nanaadabu, Abihu, Eleazari ni Ithamani. 24Achishaana ashilhopwana a Nakora yaari, Asiri, Elikana ni Abiasafu. Yaari phi manyaapwiiya a attu o mahimo a Nakora. 25Mwaamwana a Naharuni, Eliazari, ahonthelha mmoka a achishaana ashithiyana a Naputieli, nkannyara Finiyasi. Alha phi yaari ashulhupalhe olhupalhe a Alawi.
26Naharuni ni ashinna Musa yaari phi attu yaalheheriye ni Apwiiya Nlhuku wiira, “Mwaaholhelhe Aisraeli ukhuma ilhapo yo Umisri.”
27Ni phi yayo yolhumanne Nafarao, amwene o Umisri, mwaha wo waakumiha Aisraeli mwiilhaponi Umisri.
Apwiiya Nlhuku anowaalhehera ashinna Musa ni Naharuni
28Nihuku Apwiiya Nlhuku nolhumanne aya ni ashinna Musa Umisri nne, 29yeerenlhe wiira, “Mii phi Apwiiya Nlhuku. Mwaahimerie Nafarao, amwene o Umisri, malhove onkhaye anohimeriakani.”
30Nansho ashinna Musa nkayaakhulha Apwiiya Nlhuku wiira, “Mii akinooria wulhumacha rata, Nafarao anohalha ukiwelhelha chani?”
ទើបបានជ្រើសរើសហើយ៖
Uttawa 6: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.