Uttawa 5
5
Ashinna Musa ni Naharuni umihoolho u Nafarao
1Kaanyuma aya ashinna Musa ni Naharuni yahorwa u Nafarao, ni weerelha, “Apwiiya Nlhuku, Nlhuku o Aisraeli aneera wiira, ‘Mwaahiyacheke attu aka athamache, yapange nihuku nulhupalhe uthakoni, wo nlhatu waka.’ ”
2Nansho Nafarao nkayaakoha, “Phi apani yayo Apwiiya Nlhuku ayo, ata kewelhelhe ni waahiyacha Aisraeli wiira arwaache? Mii akinaachuwelha yayo Apwiiya Nlhuku ayo, mena akinaahiyerera Aisraeli wiira arwaache.”
3Ashinna Musa ni Naharuni nkayaakhulhacha, “Nlhuku a Aebraniya ahokumaana ni hii. Vano ninolhepelhani wiira nnihiye nirwaache uthakoni nkwaha wo mahuku mararu nakumihe isadaka wa Apwiiya Nlhuku ihu. Mena yaahikhalheke chiicho, yayo anooniva wo mareta o uweria ama ikhoto.”
4Nansho amwene Nafarao nkayaakhulha, “Inyu mwaatti, ashinna Musa ni Naharuni, nlhatuni no ulhikacha waakumiha attu munthekoni waya? Mwaahimerieke attu ahokolhie unthekoni waya.” 5Tho Nafarao nkayeera, “Attu inyu alha enchi waapwaha attu o Umisri. Chani nnothanana etu wiira ahiyache uvara ntheko?”
6Nenno nihuku Nafarao nkayaalhehera amanyapara ni attu owemelhelha mitheko yeeraka, 7“Toka lhelho nhaavahe alha attu alha manyashi o ukooroshelha matofali thoko chinopanga inyu. Anoorwacha uwaaviani ashinene. 8Nansho ihesabu yo matofali anokooroshiya kila nihuku ihiwukuwe. Ikhalheke phi yeyo kila nihuku, ihiwukuwe mena ata ntofali nimoka, ukhalhawaya yalha attu alha kharina ntheko wo ulhipa, phi nlhatu nineera aya wiira, ‘Nnihiye nirwee nakumihe isadaka wa Nlhuku ihu.’ 9Mwaavacheheke ntheko wo ulhipa wiira athepeke uttwaruwa, ahiyeke wulhumacha malhove o woothacha.”
10Paahi, amanyapara ni attu owemelhelha ntheko nkayaathama ni urwaa wa attu ayo ni wiira, “Nafarao aneera wiira, ‘Akinovahani manyashi o ukooroshelha matofali tho. 11Nrweeke mwaavieke mwaashinene variwoothe vanohalha inyu upatta, ni mena ntheko inyu khunowukulhiya ata vakani.’ ” 12Paahi, attu onkhaye nkayaamwaria kila vakittu velhaponi Umisri yaviaka manyashi o ukooroshelha matofali. 13Ni amanyapara nkayaathepa wiira, “Mmalhiheke ntheko inyu wo kila nihuku thoko vaawiheriya inyu manyashi mpacho valhe.” 14Amanyapara Amisri nkayaatakacha attu yaathanlhiye wemelhelha Aisraeli ntheko yiiraka, “Nlhatuni kannomalhiha ntheko inyu ni upiiha ihesabu yo matofali thoko mpacho valhe?”
15Paahi attu owemelhelha ntheko vaarwenlhe aya u Nafarao, ni wonlhelha yiiraka, “Nlhatuni no unipanga chiicho hii anamitheko inyu? 16Khaninovahiya tho manyashi ariyoothe, uno nikanyererihiyaka ukoorosha matofali. Tho, hii anamitheko inyu ninowaatakachiya, uno attekilhe ayo attu inyu.”
17Nansho Nafarao nkayeera, “Ohuva inyu, mwaattiva ohuva, phi nlhatu nineera inyu, ‘Nnihiye nirwee nakumihe isadaka wa Apwiiya Nlhuku.’ 18Nrwaacheke vano etu mwavare ntheko. Ukhalhawaya khannovahiya manyashi ariyoothe, nansho nthananiyaka wiira nkoorosheke matofali ihesabu thoko yo mpacho ilhe!” 19Paahi, attu o wemelhelha ntheko Aisraeli ahochuwelhacha wiira vano arii muuhuvani, ukhalhawaya yeerelhiye wiira, ihesabu yo matofali yo kila nihuku, khinowukulhiya mena.
20Yathameke u Nafarao, nkayaakumaana ashinna Musa ni Naharuni yaakhanlhe yaawehereraka. 21Paahi, nkayaahimeria ashinna Musa ni Naharuni wiira, “Apwiiya Nlhuku oone nna nlhove nna ni uhukumulhani mwaattiva wo nlhatu no unipanga hii nikhalhe ittu yaarushilhe Nafarao ni anamitheko aya olhupalhe. Mwaattiva nhaavaha nlhatu wo uniiva!”
Ashinna Musa anowonlhelha Apwiiya Nlhuku
22Paahi ashinna Musa nkayaarukunuwa wa Apwiiya Nlhuku, nkayeera, “Pwiiya Nlhuku, woonaka nhaapangelha mwo uhilhoka yalha attu alha? Nlhatuni no ukiruma mii? 23Ukhalhawaya toka vaarwelhe aka u Nafarao ni wolhumana wo nchina ninyu, ahaapangelha mwo uhilhoka alha attu alha. Mena khannapanga ittu yo wookholha attu inyu ata vakani!”
ទើបបានជ្រើសរើសហើយ៖
Uttawa 5: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.