Uttawa 4
4
Nlhuku nowaavaha ashinna Musa ikuru yo upanga cho ushangiha
1Yamalheke ashinna Musa ahomwaakhulha Nlhuku yeeraka, “Nansho Aisraeli khanowa yaakirumelhelha mena ukiwelhelha. Anowa wiira inyuva Apwiiya Nlhuku khankikhumelhenlhe.”
2Vavawo Apwiiya Nlhuku nkaakoha ashinna Musa, “Mmanreni mmathathani mwinyu mmo?”
Ashinna Musa nkayaakhulha, “Ikopo.”
3Apwiiya Nlhuku nkayeerelha ashinna Musa, “Mmoriheke vathi vawo.” Ashinna Musa nkayaamoriha ikopo iyo vathi, ni iyo nkayaathathuwa inwaa, ashinna Musa nkayaattawa. 4Nansho Apwiiya Nlhuku nkayeerelha ashinna Musa, “Mwooromeke, nvareke inwaa iyo umwiilhani.” Ashinna Musa nkayooroma nkayaavara inwaa iyo umwiilhani, nkayaathathuwa ukhalha ikopo tho. 5Apwiiya Nlhuku nkayeera, “Mwaapangeke chiicho mwoonihe Aisraeli arumelhelhe wiira mii Apwiiya Nlhuku kihoukhumelhelhani. Nlhuku a manyaathumwanaya, Nlhuku a Aburahimu, Nlhuku a Naisaka, ni Nlhuku a Nayakhobo.”
6Tho, Apwiiya Nlhuku nkayeerelha ashinna Musa, “Mweesheke moono inyu nhina vakhakaachani winyu vawo.” Ashinna Musa nkayaapanga chiicho, vaakuminhe aya moono nkawaakhalha ni makutulha ooteelha ttuu. 7Yamalheke Nlhuku nkeerelha ashinna Musa, “Mweesheke tho moono inyu nhina vakhakaachani winyu!” Ashinna Musa nkayeesha moono aya vakhakaachani. Vaakuminhe aya, nkawahokolhelha thoko chaari aya mahuku ene. 8Nlhuku nkeerelha ashinna Musa, “Yaahuwiwelhelhekeni ama urumelhelha yo ushangiha yo upacha iyo, anorumelhelha yo ushangiha yo nayelhi iyo. 9Nansho yaahirumelhelheke wo woona cho ushangiha piilhi chiyo, ama wiiwelhelha malhove inyu, nrikeke maashi o mwoolhoko wo Unaili ni umicha vathi. Yayo maashi ayo anoothathuwa ukhalha iphome vachulhu ilhapo vawo.”
10Nansho ashinna Musa nkayaakhulha Apwiiya Nlhuku, “Mena, Thithi, nhikirume mii. Akinooria wulhumacha rata toka khalhayi, ata toka vaachokhonlhe inyu ukulhumana mii namitheko inyu vawo. Ukhalhawaya mii akinooria wulhumacha wo waalhuwa, ni nlhimi naka no ulhemelha.”
11Apwiiya Nlhuku nkayaakoha ashinna Musa, “Phi mpani upilhe malhaku a ntu, phi mpani nonttuka ntu hoorie wulhumacha ama uhiiwa, oone ama ukhalha ohoona? Akihiwe mii, Apwiiya Nlhuku? 12Paahi vano, nrweeke, ni mii kinoukavihani wulhumacha, kinowiittuchihani inohalha inyu wulhumacha.”
13Nansho ashinna Musa nkayeera, “Mena, Thithi, chonte, munrumeke ntu nkina.”
14Vavawo Apwiiya Nlhuku nkayaathunalhelha ashinna Musa, nkayeera, “Chani! Khaawo onninyu Naharuni, uchuulhu u Nalawi? Kihochuwelha wiira yayo anowooria wulhumacha rata. Tho, anoowa uwikamelhani, ni ayo vanohalha aya uwoonani, anootelhiya munrimani mwaya. 15Mwoolhumaneke ni waahimeria malhove onkhaye anothananiya aya wulhumacha. Ni mii kinowiittuchihani mwaatti chittu cho upanga. 16Naharuni anokowolhumana Aisraeli vanipuroni winyu. Anookhalha nkavihi inyu o wulhumacha, ni inyu nnookhalha thoko Nlhuku aya, mwaavahaka ittu yo wulhumacha. 17Nkusheke ikopo ilha mmathathani mwinyu, ni wo ilha nnopanga cho ushangiha chilhe.”
Ashinna Musa anoohokolhia Umisri
18Paahi ashinna Musa nkayaahokolhia u Nayethro, ahokohaya, ni waahimeria wiira, “Chonte, nkihiye kirwee, kihokolhie Umisri wa ashilhoko aka, koone yakhalhaka akumi nanlhelho.”
Nayethro nkayeerelha ashinna Musa, “Nrweeke wo uhikhalha ni nipampa.”
19Ashinna Musa vaari aya bado Umidiyani, Apwiiya Nlhuku aheerelha wiira, “Haya, nrweeke, nhokolhie Umisri, ukhalhawaya attu onkhaye yaathanana uwiivani alhe ahokhwacha.” 20Paahi Ashinna Musa nkayaakusha ahanu aya ni achishaana aya, nkaawelhihacha vachulhu iphuta, nkayaachokholha nkwaha uhokolhia Umisri, anakunshe mmathathani mwaya ikopo ya Nlhuku ilhe.
21Tho, Apwiiya Nlhuku nkayeerelha ashinna Musa, “Vanohalha inyu uphiya Umisri vawo, mwapangeke cho ushangiha chuvahilhe akani ikuru yo upanga chiyo, umihoolho u Nafarao. Nansho kinowaahelha itiyamaru wiira ahaahiyerere Aisraeli wiira athamache. 22Ni inyu mwaahimerieke Nafarao wiira, Apwiiya Nlhuku aneera wiira, ‘Israeli phi mwaamwanaka mwanlhopwana o nttara! 23Kahouhimeriani wiira, mwaahiyerere vano achishaana aka, arwee, wiira avare mitheko chaka! Nansho mwahokhota wiira ahithamache, paahi vano kinomwiiva mwaamwaninyu mwanlhopwana o nttara ninyu.’ ”
24Phi chiichammo ashinna Musa vaari aya mphironi ahokolhiaka Umisri, ahorupelha vakittu, Apwiiya Nlhuku ahaakumaanana, nkayaathanana weeva. 25Vavawo Nazipora ahottimakacha nkayaarokotta nlhuku no wiithia, nkayanthikilha nrapalha no umattepe mwaamwanaya, ni waahika ashinna Musa vamietoni, nkayeera, “Wo ilha iphome ilha nhokhalha owannyaka o ikekhiaye.” 26Nlhuku nkaahiya ashinna Musa. Nazipora yenre, “Inyuva phi abwana arusi o iphome” wo nlhatu no wiina unyawo.
27Yamalheke, Apwiiya Nlhuku nkayeerelha Naharuni, “Nrwee uthakoni mwaakumaane ashinna Musa.” Paahi ahorwaa nkayaakumaana ashinna Musa umwaakoni wa Nlhuku, nkayaakumbatira. 28Ashinna Musa nkayaahimeria Naharuni malhove onkhaye aahimeriye aya ni Apwiiya Nlhuku wiira ahimie, ni cho ushangiha chonkhaye chaalheheriye aya wiira apange.
29Paahi ashinna Musa ni Naharuni nkayaarwa Umisri nkayaathukumaniha ashulhupalhe onkhaye a Aisraeli. 30Ni Naharuni nkayaahimiacha malhove onkhaye Apwiiya Nlhuku yalhehenre aya ashinna Musa. Ni ashinna Musa ni ayo ahopangacha cho ushangiha chilhe vaattuni. 31Attu nkayaarumelhelhacha. Ni veewilhe aya wiira Apwiiya Nlhuku ahowa uwoopolhani achishaana a Aisraeli, ni wiira ahoona utwarushiya waya, ahooromihacha miuru chaya ni waathimicha Apwiiya Nlhuku.
ទើបបានជ្រើសរើសហើយ៖
Uttawa 4: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.