MHATHOKO 16
16
Timothy tavo Paul mu Silas ni sakeyi
1Pü ta Derbe mu Lystra lü vori, süce, Hihe, sajimipü püza Timothy püzu Jews kemelümi mu püpo Greek mi. 2Lystra mu Iconium lü keba kemelüko püpo mveshu kebapü. 3Paul püzü tanyüta, püzüvo püyirüyi, kekrelamori Jews miko süce kebakola, kekrelamori uko kese püpo Greek mi tila. 4Uni ta nadekolü kevoce Jerusalem lü apostleko mu mehiko kehu kepo keyifü züyi node pü ukoce po vosü. 5Süla kehuko thi kemetü, mu kemelü thüma kro mama prarita.
Paul zümho Macedonia mipü pükecü
6Uni ta Phrygia mu Galatia khükolü vo kezüce Kemesa Rüpü unipo Asia lü jü zhopo thihino khata. 7Uni ta Mysia lü vori de ta Bithynia lü ru thovo keto lüba, vele Kemesa Rüpü unipo vo muta. 8Uni Mysia vathü ta Troas lü kita. 9Tüzülü zümhopü khapü Paul mengosü, thümapü thade püce choti, ta Macedonia lü kiri de hako khrühi süthaze. 10Zümho süo ngo kesüsa hani rekri ta Macedonia lü ki keto rhüyi, Niepoo hani cüpü ukoce jüyikeve posüketo melü tüte.
Lydia thelü rede keyi
11Hani Troas lü rutho mezi Samothrace lü vo, süsanha Neapolis lü, 12Sülü ta Philippi lü vo, rüna süo Macedonia bülü kemelepü, Roman mipo kekhapü kebapü. Rüna sülü hani pütühu relü bata. 13Deoba nha hani nade sülü kerükhü tavozü, kecho kethi la süce bayi, thenomiko süce kebakoce jüposü. 14Thenomipü püza Lydia, kelo shüha loropü zhu bayo, Thryatira nadelü; pü Jihova kereshümipü, pü hani fü sesü Niepoo pülü khrisü, Paul jüpo kesüko reni menuyi. 15Theno süpü mu pücekroko jülo püyi, püpoti, mhace neni halüpü Niepoo kemelümi kethole zize tavori acelü bate. Thenopü sizide hani redata.
Paul mu Silas ni thejü thi keta
16Tüso pünha hani kecho kethilü ta vozü, relimi miceta püpü, therüzü kemedu tayo tipü zü kesüyi, urükeve kepo thenyümi kethila presa kekro krapü pü niepoko tsüsüyo. 17Süpü Paul hani sa mejizo tata, mu sefü poti, thüma hini Therü kerekrü thoo choyimi ho! Uni kelakeyi cho thapü uko meka sü toho. 18Thenopü tüsozho kekro sizita. Süsü Paul keyhu phita, süla Paul relesü rüpü kesuo cepode Jisu Khrista zalü thenopüyo tapra tate. Pütü bavüdo sülü taprata. 19Thenopü cepoko süo ngo side uko kepra kemeveko thiyi su keta la Paul mu Silas ni tüpü kezhoko kehu keba thethilü vota. 20Uni tüpü shecoko mhüjülü vota, thüma hini Jews mi, unade hio kebü shute. 21Thezho kropü uko züyi keho thezho püpozüte, mori u Roman mi thajü züyo kemo. 22Makro tasü uni metsuta, shecoko ufüne cekhro de poti, thegi sürüpü uni vüsüte. 23Uni vü meshüshu kevasa, uni tüpü thejü celü süva de thejüce kefüopo pe menu bayino posü. 24Jü kerü puce kepo sükola, uni khapü thejüce kerelütholü süva, side uni phekhüpü thegiro yo sü meta. 25Meso tülu Paul mu Silas ni kecho thisü, tsale thipü Jihova chusü, süko metü thejü kethiko metü se. 26Sizisü mu metha cece süshu vorita, thejüce mejuko metü kena shuta; mu thejüce cekhako khri yita, thejü miko phekhako rezüta. 27Thejüce kefüo kezülü kesü mecova, thejüce cekhako khripü keba ngosü, pü zechopü pütho pü dokhri va tozüta, pü kelüce thejüko metü tata lizu ketala. 28Vele Paul semeto de poti, ntho nmethi va hite, hako metü hice bazo. 29Süsa pü mekeve chosü, de kegüpü vasü, mpe reshü zode Paul mu Silas ni mhüjülü chütü tsüta. 30Uni züpra chozu uni ketsoti, Kezhoni! Apo kelakeyi ngoyi ketola dipü thita? 31Uni püce poti, Niepoo Jisu Khrista melüyite, size no mu ncekro sheri kela yito. 32Uni püce Niepoo jüko püposü, mu pücelü kebako metü. 33Pü bavüdo sülü tüzülü uni züvo kevükuko khrü kemesa va; side rekri uko jülo püyi, pü mu pücekro metü. 34Uni zü pücelü vode ketico khapü uni tsüsü, rechüta, pücekro metü zü Niepoo melü yita. 35Tüso vori ketasa, thejüce kefü kezhoo poti, thüma hiko khasü vate. 36Thejü kefüo Paul ce süopü posü, shecomi nenipo tata ri ve sizi bale, süla neni tatate, neni nüde. 37Vele Paul ukoce poti, uko hani vü shusü hani mejo keva thimo zo sheri, hani Roman mizo sheri hani khapü thejücelü sü; tsühino kemekhrülü hani khala süva tola? Sizi hozo! Ukopo tavori de hani züpra süte. 38Jü süko thejü kefü kezhoo khivo shecokoce posü, süsa uko sekeyi uni Roman milezi keti meprü shuta. 39Uko tavori de unipo pratano sita, ta nade saco votano zita. 40Uni thejücelü taprari de ta Lydiapü celü vota; uni tavo ukroko ngokeyice uko thi kethepu mu lütho melu shusü de tata.
ទើបបានជ្រើសរើសហើយ៖
MHATHOKO 16: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
