MHATHOKO 15
15
Jerusalem lü kehu
1Judea lü sazüjürako thümahu voride kemethathi poti, neko Moses zho züde yirü kemosa kelakeyi ngoyiho. 2Paul mu Barnabas ni süko zü kekre phita mu uko zü kemelita, sülü kepo keyi Paul, Barnabas mu sazüjürako humi ta Jerusalem lü kho de sülü apostleko, mu mehiko zü jü hiola kepono sisü. 3Süla kehuko uko ketsü kesüce uko ta Phoenicia mu Samaria kolü püthü vo, Gentileko thelü redeba keta popü ukoce sü, süla kemelü miko metü unü shuta. 4Uko ta Jerusalem lü vori tice, kehuko uko mesoyi, apostleko mu mehiko ri, uko Jihova mhathoko metü popü uko kasü. 5Vele sülü Pharisees kropü kemelülü vori keta ba, Yikerü sü thimo suzo zita, ukopo Moses thezho kha kesüko zümoze su. 6Apostleko, mehiko vori kezüde mha hio keti moze suta. 7Sülü ketü shuta, sizi kebace Peter süthayi de ukoce poti, “Thümako mu sazüjürako, pütühu vo ketace nekori seba, Jihova uko dolü keda kesü, Gentiles kopo atalü jüyikeve seyi mu melüyi no posü. 8Jihova mimelüko keseo süo zhopo zo, Kemesa Rüpü khapü uko tsüsü ukoyo thi kesü bide. 9Uko mu uko zide kelakre keti bamo, kemelü khipü uko melü thi kemesa sü. 10Tsühi, dipüla neko Niepoo medephi bata, voce khapü sajiko volü dusü to züme, upotsaneko mu uko sheri thi mu züyi ho ketako? 11Vele Niepoo Jisu Khrista ngokemezhe yono uko kela yito mu uko sheri.” 12Süsa thüma metüko kemekre zü zi bata, mu Barnabas mu Paul nipo jüpo, Jihova ungo mhathoko mu zasiko uniyo thipü Gentileko dolü kesüko posü. 13Uko metü kemekre züzi batari, James tasü jü poti, “asazüjürako, afü reni süte,” 14Simeon (Peter) Jihova therace dipü bide Gentileko pesü sheri posüte, thüma süko khiphrapü püzalü süyi ketola. 15Hihi saju kepoko jüko zü kekhüba, hibi thopü meta: 16Hisalü I tavorito, tavo David kereshüce thi sala süto, retuzü ketao, nrhü ketao ketso sala yito, side pü metha süto. 17Thüma mehapü ketakopo Niepoo phu vorito, mu Gentileko metü, aza cükeyiko metü, Niepoo sizi posü, pütho hiko metü thisü. 18Jihova pümhathoko metü cejü thikeyi theralü se bazo. 19Süla akelüce uko Gentiles mi Jihova ce vori kezüko kebü hize veto. 20Vele uko lesi thopü uko tsüsü ketoko, ukopo marhe kereshüko, kekhrükezü, keropü khonu gukhri, mu thüza hikolü ukethü yi moze su. 21Kekrelamori thajü zori Moses ju phripü nade metülü sütazo, deoba nha synagogue kolü.
Council-kehulü lesi thopü Gentile kemelüko cekesü
22Süsa apostleko, mehiko, mu kehu metü umedo unüta, side uko dolü thüma kedapü Paul mu Barnabas ni zü Antioch lü vo ketola Judas, püza thopü Barsabas thi ketao, mu Silas uko sazüjürako dolü krüta kemeleko. 23Uko lesi hibi thosü, “Apostleko, mehiko, kemelükroko, kelü kesü pü sazüjüra thi keta Gentileko Antioch, Syria, mu Cilicia lü kebako ce süzüho. 24Sekeyi thümahu hako celü ta nekoce kevoko jükopü neko kebü sü keta sesüte, ukopo jü süko posüte zimo; nekopo yirüte, mu thezhoko züte sizi sümo: mhapo kesüko la neko lü relümo mu neko kebü bate. 25Kepokeyi hako metü lüpü thide thümahu hako dolü kedapü kekhrü Paul mu Barnabas ni sa ketsüpü nekoce sü züho. 26Thüma hiko Niepoo la kemeche lü upho kha kesüko, Niepo Jisu Khrista zala. 27Hako süla Judas mu Silas ni ketsü süzüho, unitalü jükopü nekoce posüto. 28Kekrelamori hako kelü mu Kemesa Rüpü medo kevelü mha kemele hiko kezüpü neko pü thimeshi sü moze veketo kepoyi. 29Sükosü, nekopo themu khapü marhe reshü kevako tiho, thüza mu khonu keropü rokhri ketiko tiho, mu regürezhü ho. Mhace neko mha hiko züyi süze verizo. Vebayite.” 30Süla uko ketsü süva, mu uko ta Antioch lü vota. Uko vori keyice thüma kekro vo kenguyi, uko lesio khapü uko tsüsü. 31Uko lesi süo phrisü mu uko rechüta side uko lüluyi. 32Judas mu Silas ni sheri saju kepomi zo süla uni jüko popü kemelü miko tarhosü mu thelü tho melu shusü. 33Pütühu uko sülü bata, side kemelü miko uko ketsü salapü apostleko koce süva. 34Vele sizosheri Silas sülü basa nyü de bata. (Version hulü hio bamo)
35Paul mu Barnabas ni Antioch lü basata thüma kekro sa, zhopothi mu mimetha Niepoo jüpü.
Paul mu Barnabas ni kekho kekre keta
36Tüsozho husa Paul Barnabas cepo, Khe, ami sala nadekolü vode thajü avu Niepoo jüpü zhopo thi kemetakolü ukromiko dipübiba sheri pesükhe. 37Barnabas no John, püza thopü Mark thi ketao züta tole sizita. 38Vele Paul no püzü tati vemole sita, pü Pamphylia lü uni khava de mhatho kolü uni zü tamo ketala. 39Uni sülü ketü shuta, mu uni hunehu zü tamuta kekhota; süla Barnabas no Mark züde ta Cyprus lü rutho khi vota. 40Paul Sila kedayi de tata, kemelükro Niepoo ngokemezhe lü uni ketsüsüva. 41Pü ta Syria mu Cilicia kolü kehuko pe vota.
ទើបបានជ្រើសរើសហើយ៖
MHATHOKO 15: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
