Loos 14
14
Tsis Txhob Txiavtxim Rau Lwmtus
1Nej yuavtsum txais yuav tus uas nws txoj kev ntseeg tseem tsis tau ruaj-khov pestsawg, tiamsis tsis txhob nrog nws sibcav txog nws tej kev xav tias yog lossis tsis yog. 2Muaj qeetus txoj kev ntseeg tsocai rau nws noj tau txhua yam, tiamsis tus uas nws txoj kev ntseeg tseem tsis tau khov tsuas noj tau zaub xwb. 3Tus uas noj tau txhua yam tsis txhob saib tsis taus tus uas tsis noj; thiab tus uas noj zaub xwb, los tsis txhob rautxim rau tus uas noj tau txhua yam; rauqhov Vajtswv yeej lees yuav tus ntawd thiab. 4Koj yog leejtwg, es koj thiaj rautxim rau luag tus tubtxib? Txawm tus tubtxib ntawd yuav sawv thiab ntog los nyob ntawm nws tus tswv. Nws yeej yuav sawv khovkho rauqhov tus Tswv yog tus pab nws.
5Muaj qeeleej xav tias qee hnub tseemceeb dua qee hnub, tiamsis muaj qeeleej xav tias txhua hnub yeej tseemceeb ib yam nkaus. Yogli ntawd cia nyias ntseeg rawsli nyias qhov kev xav. 6Tus uas suav ib hnub ua hnub tseemceeb, yeej yog nws hwm tus Tswv nws thiaj ua li ntawd. Ib yam nkaus li ntawd, tus uas noj tau txhua yam yeej yog nws hwm tus Tswv nws thiaj noj, rauqhov nws twb ua Vajtswv tsaug lawm. Tus uas caiv tsis noj yam ub yam no los yeej yog nws hwm tus Tswv nws thiaj caiv, nws yeej ua Vajtswv tsaug ib yam nkaus thiab. #Kaulx 2:16 7Peb tsis yog muaj sia nyob pub rau peb, thiab tsis yog tuag pub rau peb xwb. 8Yog peb muaj sia nyob, peb nyob rau tus Tswv; yog peb tuag, peb tuag rau tus Tswv. Yogli ntawd, txawm yog peb muaj sia lossis peb tuag, los peb yeej yog tus Tswv li neeg. 9Rauqhov Khetos tuag thiab sawv hauv qhovtuag rovqab los lawm, kom Nws thiaj ua cov neeg ciaj thiab cov neeg tuag tus Tswv.
10Nej cov uas noj zaub xwb, ua licas nej thiaj rautxim rau nej cov kwvtij? Nej cov uas noj txhua yam, ua licas nej pheej saib tsis taus nej cov kwvtij? Peb txhua tus yuav tau mus sawv tabmeeg Vajtswv thiab Nws yuav txiavtxim rau peb. #2Klt 5:10 11Rauqhov Vajtswv Txojlus hais tias,
“Tus Tswv hais tias, Kuv yog Vajtswv tus uas muaj sia nyob,
txhua tus yuav txhoscaug ntawm Kuv xubntiag,
thiab txhua tus lub ncauj yuav lees hais tias Kuv yog Vajtswv.” #Yaxaya 45:23 (LXX)
12Yogli ntawd, peb txhua tus nyias yuav tau qhia nyias zaj rau Vajtswv hais tias vim licas peb thiaj ua li ntawd.
Tsis Txhob Ua Rau Lwmtus Yuamkev
13Yogli ntawd, cia peb tso txoj kev uas pheej txiavtxim rau lwmtus tseg. Tiamsis nej yuavtsum tau txiavtxim siab hais tias nej yuav tsis ua ib yam dabtsi uas yuav ua rau lwmtus dawm lossis yuamkev ua txhaum. 14Qhov uas kuv nyob rau hauv tus Tswv Yexus, ua rau kuv paub meej tias yeej tsis muaj ib yam zaub-mov uas yuav tsis huv li; tiamsis yog leejtwg ntseeg tias yam ntawd tsis huv, ces yam ntawd yeej tsis huv rau nws. 15Yog nej ua rau nej cov kwvtij ntxhovsiab los ntawm tej yam uas nej noj ces yog nej tsis hlub lawv. Tsis txhob cia tej uas nej noj ua rau tus uas Khetos twb los tuag txhiv lawm raug kev puastsuaj! 16Tsis txhob cia yam uas nej suav hais tias zoo lawm raug lwmtus thuam hais tias tsis zoo. 17Rauqhov Vajtswv lub Tebchaws tsis yog kev noj kev haus, tiamsis yog kev ncajncees, kev thajyeeb, thiab kev zoosiab uas Vaj Ntsujplig tus Dawbhuv pub rau peb. 18Tus uas ua Khetos tes haujlwm zooli no yog nws ua haum Vajtswv siab thiab ua rau neeg nrog pomzoo.
19Yogli ntawd, peb yuavtsum muab siab rau#14:19: peb yuavtsum muab siab rau; tej phau ntawv qub uas xuas tes sau, muaj peb yeej ibtxwm muab siab rau. ua tej uas yuav ua rau sawvdaws nyob sib haumxeeb thiab tej uas ib leeg yuav txhawb tau ib leeg lub zog. 20Tsis txhob ua rau Vajtswv tes haujlwm puastsuaj los ntawm tej zaub-mov. Koj yeej noj tau txhua yam zaub-mov, tiamsis yog qhov uas koj noj ntawd ua rau lwmtus yuamkev ua txhaum, ces koj ua tsis yog lawm. 21Yog koj noj nqaij lossis haus cawv lossis ua ib yam dabtsi uas yuav ua rau koj cov kwvtij yuamkev ua txhaum, ces koj tsis noj lossis tsis txhob ua yuav zoo dua.
22Yogli ntawd, ceev tej uas koj ntseeg txog tej yam no cia rau Vajtswv thiab koj paub xwb. Tus uas tsis rov rautxim rau nws tuskheej vim nws paub tias tej uas nws ua ntawd yog lawm, tus ntawd yeej muaj kev kajsiab. 23Tiamsis tus uas ua xyemxyav txog tej uas nws noj, thaum nws noj Vajtswv yuav rautxim rau nws, rauqhov nws tsis noj rawsli txoj kev ntseeg; txhua yam uas tsis yog ua los ntawm txoj kev ntseeg, ces yog kev txhaum.
ទើបបានជ្រើសរើសហើយ៖
Loos 14: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
