Loos 15
15
Ua Kom Haum Lwmtus Siab
1Peb cov uas txoj kev ntseeg ruaj-khov lawm, tsimnyog peb yuavtsum pab ris cov uas txoj kev ntseeg tseem tsaugmuag lub nra, es tsis txhob ua li peb nyiam xwb. 2Peb txhua tus yuavtsum ua kom haum tej kwvtij zejzog siab thiab, thiaj yuav zoo rau lawv thiab txhawb tau lawv txoj kev ntseeg kom loj tuaj. 3Rauqhov Khetos tsis tau ua kom haum Nws siab xwb, tiamsis rawsli Vajtswv Txojlus hais tias, “Tej lus uas cov neeg txobthuam koj ntawd, tau poob los rau Kuv lawm.” #Nnkauj 69:9 4Rauqhov txhua yam uas tau muab sau rau hauv Vajtswv tej Lus yog sau los qhia peb, kom peb muaj kev ciasiab los ntawm kev ua siabntev thiab muaj kev txhawbzog uas yog Vajtswv tej Lus tau qhia rau peb.
5Thov Vajtswv tus uas muaj lub siabntev thiab kev txhawbzog, pab kom nej nyob sib haumxeeb kom nej thiaj ua tau rawsli Yexus Khetos tus yamntxwv. 6Yog nej ua li ntawd, nej thiaj yuav koom tau ib lub siab thiab ua ib roog lus qhuas Vajtswv tus uas yog peb tus Tswv Yexus Khetos Leejtxiv.
Qhia Txoj Moo Zoo Rau Lwm Haivneeg
7Nej ib leeg yuavtsum zoosiab hlo txais yuav ib leeg, ib yam li Yexus Khetos tau txais yuav nej, kom Vajtswv thiaj yuav tau ntsejmuag. 8Kuv qhia rau nej hais tias qhov uas Khetos los pab cov neeg Yudais, yog ua rau sawvdaws paub tias Vajtswv yog tus ncajncees, yog tus ua kom tiav rawsli tej lus uas Nws tau cogtseg rau lawv cov yawgkoob, 9thiab ua kom Lwm Haivneeg paub qhuas Vajtswv txog Nws txoj kev tabncuab. Rawsli Vajtswv Txojlus hais tias,
“Yogli ntawd thaum kuv nrog Lwm Haivneeg nyob,
kuv yuav hunkauj qhuas Koj lub npe.” #2Xamu 22:50; Nnkauj 18:49
10Thiab hais ntxiv hais tias,
“Lwm Haivneeg, nej ciali nrog Vajtswv haivneeg zoosiab!” #2Kev 32:43
11Thiab tseem hais ntxiv hais tias,
“Tagnrho Lwm Haivneeg, nej ciali qhuas tus Tswv;
txhua haivneeg ciali qhuas Nws!” #Nnkauj 117:1
12Thiab Yaxayas hais ntxiv hais tias,
“Ib tug ntawm Yexis cajces yuav tshwm los;
Nws yuav kav Lwm Haivneeg,
thiab lawv yuav muab lawv txoj kev ciasiab tso plhuav rau Nws.” #Yaxaya 11:10 (LXX)
13Thov Vajtswv tus uas nej ciasiab rau, pub kom nej puvnpo txoj kev zoosiab thiab kev nyabxeeb, vim nej ntseeg Nws, kom nej txoj kev ciasiab thiaj yuav loj zujzus ntxiv los ntawm Vaj Ntsujplig tus Dawbhuv lub hwjchim.
Paulus Qhia Txog Vim Licas Nws Sau Tsab Ntawv No
14Cov kwvtij, kuv paub tseeb hais tias nej yog cov uas puvnpo txoj kev zoo, puvnpo kev txawjntse, thiab ib leeg muaj cuabkav ntuas ib leeg. 15Tiamsis qhov uas kuv muaj cuabkav sau qee zaj nyob hauv tsab ntawv no tuaj rau nej, yog kuv xav rov hais kom nej nco tej zaj ntawd kom zoo. Vim Vajtswv txoj hmoovhlub uas Nws tau pub rau kuv 16los ua Yexus Khetos ib tug tubtxib, zoo ib yam li ib tug povthawj hlob, uas qhia Vajtswv Txoj Moo Zoo rau Lwm Haivneeg, kom lawv peemtsheej zooli tej khoom fij uas haum Vajtswv siab, thiab raug ntxuav kom dawbhuv los ntawm Vaj Ntsujplig tus Dawbhuv.
17Vim kuv nyob rau hauv Yexus Khetos, kuv thiaj muaj cuabkav khav txog tej haujlwm uas kuv ua rau Vajtswv. 18Kuv yeej tsis muaj cuabkav khav ib yam dabtsi li, tsuas yog tej uas Khetos tau siv kuv mus coj Lwm Haivneeg los ntseeg Vajtswv, uas yog los ntawm tej lus uas kuv qhia thiab tej haujlwm uas kuv ua, 19thiab los ntawm tej txujci tseemceeb, thiab los ntawm tej uas Vajtswv tus Ntsujplig lub hwjchim tau ua lawm xwb. Yogli ntawd, kuv thiaj qhia Txoj Moo Zoo uas hais txog Khetos puvntoob hauv lub nroog Yeluxalees mus txog rau pem lub nroog Ilelikus. 20Kuv yeej ibtxwm muaj lub homphiaj hais tias kuv xav mus qhia Txoj Moo Zoo rau cov chaw uas tsis tau muaj neeg hnov txog Khetos zaj dua li, kom kuv thiaj tsis mus tsa tsev rau ntawm lwmtus lub quatsev. 21Rawsli Vajtswv Txojlus hais tias,
“Cov uas tsis tau muaj leejtwg qhia txog Khetos zaj rau lawv li, lawv yuav pom;
thiab cov uas tsis tau hnov dua li, los lawv yuav totaub.” #Yaxaya 52:15 (LXX)
Paulus Npajsiab Mus Saib Lub Nroog Loos
22Muaj ntau yam pheej tabkaum kuv, kuv thiaj tsis tau tuaj saib nej. #Loos 1:13 23Tiamsis nimno kuv twb ua kuv tej haujlwm tiav hauv tej cheebtsam no lawm, thiab kuv yeej npajsiab los tau ntau xyoo lawm hais tias kuv yuav tuaj saib nej 24thaum kuv mus tim tebchaws Xapees. Kuv ciasiab hais tias thaum kuv tuaj ntawd, kuv yuav pom nej thiab tau nrog nej nyob ib ntus, tomqab ntawd, nej yuav tau pab xa kuv mus rau tim tebchaws Xapees.
25Tamsim no kuv tabtom mus pab cov ntseeg uas nyob nram lub nroog Yeluxalees. #1Klt 16:1-4 26Rauqhov cov ntseeg uas nyob hauv Makedaunias thiab Akhayas tau txaussiab muab mentsis nyiaj xa mus pab cov ntseeg txomnyem uas nyob nram lub nroog Yeluxalees. 27Lawv yeej txaussiab hlo ua li ntawd; thiab tseeb tiag, yeej tsimnyog lawv pauj cov neeg uas nyob nrad txiajntsig. Rauqhov cov Yudais twb cia Lwm Haivneeg tau los nrog lawv koom txoj koobhmoov ntawm sab ntsujplig lawm, yogli ntawd, Lwm Haivneeg yuav tau ua koobhmoov ntawm sab nqaijtawv pab rau cov Yudais thiab. #1Klt 9:11 28Thaum kuv ua tes haujlwm no tiav thiab nqa cov nyiaj no mus cob rau lawv lawm, ces kuv yuav mus rau tim tebchaws Xapees, tiamsis kuv yuav xub tuaj saib nej tso. 29Kuv paub tias thaum kuv tuaj rau tim nej, kuv yuav tuaj nrog Khetos txoj koobhmoov uas puvnpo.
30Cov kwvtij, los ntawm peb tus Tswv Yexus Khetos thiab los ntawm Vaj Ntsujplig txoj kev hlub, thov nej nrog kuv koom kuv txoj kev nyuajsiab los ntawm kev thov Vajtswv pab rau kuv. 31Thov Vajtswv pab kom kuv khiav dhau ntawm cov neeg tsis ntseeg Vajtswv uas nyob hauv lub xeev Yudas txhais tes, thiab thov Nws pab kom tes haujlwm uas kuv mus ua pab cov ntseeg uas nyob hauv lub nroog Yeluxalees haum sawvdaws siab. 32Yog Vajtswv pomzoo, kuv yuav tuaj saib nej ntawm txoj kev zoosiab kawg nkaus, thiab thaum kuv tuaj pom nej lawm, kuv yuav zoosiab thiab yuav tau so lossiav heev. 33Thov Vajtswv tus uas pub tau kev nyabxeeb rau peb, nrog nej txhua tus nyob. Amees.
ទើបបានជ្រើសរើសហើយ៖
Loos 15: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
