Levis Kevcai 9
9
Aloos Fij Khoom Rau Vajtswv
1Thaum txog hnub thib yim, Mauxes txawm hu Aloos, Aloos cov tub thiab cov Yixalayees tej thawjcoj tuaj cuag nws. 2Nws hais rau Aloos tias, “Ciali coj ib tug ntsuag nyuj thiab ib tug laug yaj uas tsis muaj ib qho phem li tuaj thiab muab tua fij rau tus TSWV; tus ntsuag nyuj yog muab fij daws txim thiab tus laug yaj yog muab hlawv fij. 3Thiab koj hais rau cov Yixalayees tias, ‘Nej yuavtsum coj ib tug laug tshis mus fij daws txim, ib tug ntsuag nyuj uas muaj ib xyoos thiab ib tug laug yaj uas muaj ib xyoos uas tsis muaj ib qho phem li mus tua hlawv fij, 4thiab muab ib tug ntsuag nyuj thiab tus laug yaj tua fij ua kev sib raugzoo. Nej muab cov tsiaj no fij rau tus TSWV nrog tej ncuav uas zuaj xyaw roj lawm. Nej yuavtsum ua li no, rauqhov hnubno tus TSWV yuav los tshwm rau nej pom.’ ”
5Lawv coj txhua yam tuaj tso rau ntawm hauvntej ntawm lub Tsevntaub Sibntsib rawsli Mauxes tau xaaj rau lawv, thiab tagnrho cov pejxeem tuaj sibsau pehawm tus TSWV rau ntawm qhov chaw ntawd. 6Mauxes hais tias, “Tus TSWV tau xaaj kom nej ciali ua txhua yam no, kom Nws tus tshwjchim uas ci ntsa-iab thiaj yuav tshwm los rau nej pom.” 7Ces Mauxes hais rau Aloos tias, “Ciali mus rau tom lub thaj thiab muab tej khoom fij daws txim thiab hlawv khoom fij daws koj thiab cov pejxeem lub txim. Muab tej khoom no mus fij daws cov pejxeem lub txim rawsli tus TSWV tau xaaj tseg lawm.” #Henpl 7:27
8Aloos thiaj mus rau tom lub thaj thiab muab tus ntsuag nyuj tua fij daws nws lub txim. 9Nws cov tub nqa cov ntshav los rau nws, nws muab nws tus ntivtes tub cov ntshav thiab coj mus pleev rau lub thaj plaub tug kub saum plaub cegkaum thaj, thiab cov uas seem muab hliv ywg thoobplaws lub taw thaj. 10Ces nws muab cov roj, ob lub raum, thiab nplais siab uas zoo tshajplaws coj mus hlawv rau saum lub thaj rawsli tus TSWV tau xaaj rau Mauxes lawm. 11Tiamsis nws coj cov nqaij thiab daim tawv mus hlawv rau sabnraum ntug yeej.
12Nws tua tsiaj hlawv fij daws nws lub txim. Nws cov tub nqa cov ntshav tsiaj los rau nws, thiab nws muab hliv ywg thoobplaws lub thaj ntawd plaub sab huv tibsi. 13Lawv nqa lub taubhau tsiaj thiab cov nqaij los rau nws, thiab nws muab coj mus hlawv rau saum lub thaj. 14Ces nws muab lub plab thiab cov hnyuv, siab-ntsws, thiab ob cesqab ntxuav thiab coj mus hlawv rau saum lub thaj, nrog cov khoom fij uas muab hlawv ntawd.
15Tomqab ntawd, nws mamli muab cov pejxeem tej khoom los fij. Nws muab tus tshis uas coj los fij daws cov pejxeem lub txim, muab tua thiab muab tus tshis ntawd fij, nws ua ib yam li nws tau ua daws nws lub txim uantej ntawd lawm thiab. 16Nws tseem muab tsiaj tua hlawv ua khoom fij thiab muab tus tsiaj ntawd fij rawsli kevcai. 17Nws muab tej qoobloo coj mus fij thiab yawm ib phoovtes hmoov nplej coj mus hlawv rau saum lub thaj. (Qhov no yog fij ntxiv rau cov khoom uas niajhnub coj mus hlawv fij.)
18Nws muab tus txiv nyuj thiab tus laug yaj fij ua kev sib raugzoo rau cov pejxeem. Nws cov tub nqa cov ntshav tsiaj los rau nws, thiab nws muab coj mus nchos thoobplaws lub thaj ntawd plaub sab huv tibsi. #Levi 3:1-11 19Aloos muab tus nyuj thiab tus yaj tej nqaij rog coj mus 20tso tshooj rau saum ob lub hauvnrob thiab muab nqa tagnrho coj mus tso rau saum lub thaj. Nws muab cov nqaij rog ntawd hlawv rau saum lub thaj 21thiab muab ob lub hauvnrob thiab cesqab sab xis coj mus yom fij rau tus TSWV ua cov povthawj hlob tug, rawsli Mauxes tau xaaj tseg lawm.
22Thaum Aloos fij khoom daws txim, hlawv khoom fij, thiab fij khoom ua kev sib raugzoo tag lawm, nws txawm tsa nws ob txhais tes rau saum cov pejxeem, foom koobhmoov rau lawv thiab nqis saum lub thaj los. #Teev 6:22-26 23Mauxes thiab Aloos nkawd mus rau tom lub Tsevntaub Sibntsib, thiab thaum nkawd tawm los, nkawd foom koobhmoov rau cov pejxeem ces tus TSWV tus tshwjchim txawm ci ntsa-iab los rau cov pejxeem sawvdaws pom. 24Tamsim ntawd, tus TSWV txawm tso hluavtaws los kub cov khoom fij thiab tej nqaij rog saum lub thaj huv tibsi. Thaum cov pejxeem pom li ntawd, lawv thiaj qw thiab nyo hau ti nkaus rau hauv av pehawm tus TSWV.
ទើបបានជ្រើសរើសហើយ៖
Levis Kevcai 9: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.