Levis Kevcai 8
8
Tsa Aloos Thiab Nws Cov Tub Ua Povthawj Hlob
(Khiav Dim 29:1-37)
1Tus TSWV hais rau Mauxes tias, 2“Koj ciali coj Aloos thiab nws cov tub mus rau tom lub qhovrooj uas yuav nkag mus rau hauv lub Tsevntaub Sibntsib, thiab nqa cov ristsho uas cov povthawj hlob hnav, cov roj txhawb meejthawj, ib tug ntsuag nyuj uas siv rau kev fij daws txim, ob tug laug yaj, ib tawb ncuav tsis xyaw keeb, 3thiab hu tagnrho cov Yixalayees tuaj sibsau rau tod.”
4Mauxes txawm ua rawsli tus TSWV tau xaaj rau nws. Thaum cov Yixalayees tuaj sibsau txhij lawm, 5nws thiaj hais rau lawv tias, “No yog yam uas tus TSWV tau xaaj kom peb ua.”
6Ces Mauxes thiaj mus coj Aloos thiab nws cov tub los thiab muab dej los ua kevcai ntxuav lawv. 7Nws muab lub tsho thiab lub tsho ntev rau Aloos hnav thiab muab txoj hlab rau Aloos sia. Nws muab lub tsho efauj#8:7: efauj: Saib Cov Lus Txhais uas teev rau tomqab. rau Aloos hnav tuaj sabnraud thiab muab txoj hlab ntaub mag zoo-zoo los rau nws pav duav. 8Nws muab lub awv los npog Aloos hauvsiab thiab muab lub Ulees thiab lub Thumees#8:8: lub Ulees thiab lub Thumees: Ob lub no, yog tus povthawj hlob siv kom paub Vajtswv lub siab nyiam, tiamsis tsis paub xyov cov povthawj siv licas. ntsaws rau hauv daim awv ntawd. 9Nws muab txoj phuam rau Aloos ntoo thiab muab daim phiaj kub dawbhuv dai rau ntawm txoj phuam ntawm Aloos hauvpliaj rawsli tus TSWV tau xaaj rau nws lawm.
10Ces Mauxes txawm muab cov roj txhawb meejthawj nchos rau lub Tsevntaub Sibntsib, thiab txhua yam uas nyob hauv lub Tsevntaub. Qhov uas ua li no yog nws muab txhua yam fij rau tus TSWV. 11Nws tseem muab ib qho roj mus nchos xya zaus rau lub thaj thiab tej cuabyeej saum lub thaj, thiab nchos rau lub phiab tooj thiab lub taw phiab thiab muab tej ntawd fij rau tus TSWV. 12Mauxes muab cov roj txhawb meejthawj hliv rau saum Aloos taubhau tsa nws ua povthawj hlob. 13Tomqab ntawd, Mauxes mamli coj Aloos cov tub los rau tom hauvntej, nws muab tsho rau lawv hnav, muab hlab rau lawv sia thiab muab phuam rau lawv ntoo rawsli tus TSWV tau xaaj tseg lawm.
14Ces Mauxes txawm muab ib tug ntsuag nyuj los ua kevcai fij daws txim. Aloos thiab Aloos cov tub tsa tes rau saum tus nyuj ntawd taubhau. 15Mauxes thiaj muab tus nyuj ntawd tua thiab nqa ib qho ntshav, thiab nws muab ntivtes tub cov ntshav ntawd coj mus pleev rau plaub tug kub saum plaub cegkaum thaj ua kevcai ntxuav lub thaj. Nws muab cov ntshav uas seem mus hliv ywg thoobplaws lub taw thaj. Qhov uas nws ua li no yog nws fij lub thaj thiab ua kevcai ntxuav lub thaj. 16Mauxes muab cov npluag roj uas qhwv lub plab thiab cov hnyuv, nplais siab uas zoo tshajplaws thiab ob lub raum nrog tej npluag roj uas npog ob lub raum coj mus hlawv rau saum lub thaj. 17Tiamsis nws coj tus nyuj lub cev, daim tawv, cov nqaij, thiab cov hnyuv mus hlawv rau sabnraum ntug yeej, rawsli tus TSWV tau xaaj tseg lawm.
18Dua li ntawd, Mauxes tseem muab ib tug laug yaj tua hlawv ua khoom fij, ces Aloos thiab Aloos cov tub tsa tes rau saum tus yaj ntawd taubhau. 19Mauxes muab tus yaj ntawd tua thiab muab cov ntshav nchos thoobplaws lub thaj ntawd plaub sab huv tibsi. 20-21Nws muab tus laug yaj ntawd txiav ua tej thooj, muab lub taubhau, cov roj, thiab tagnrho tej nqaij coj mus hlawv rau saum lub thaj rawsli tus TSWV tau xaaj tseg lawm. Cov no yog khoom noj uas muab hlawv ua khoom fij, ua pa tswqab ntxiag ua rau Tus TSWV txaussiab heev.
22Ces Mauxes muab dua tus laug yaj thib ob los tua ua kevcai tsa cov povthawj hlob; Aloos thiab Aloos cov tub tsa tes rau saum tus yaj ntawd taubhau. 23Mauxes muab tus yaj ntawd tua thiab muab ib qho ntshav coj mus pleev Aloos sab taubntseg xis, sab taubtes xis, thiab sab taubtaws xis. 24Ces Mauxes mamli mus coj Aloos cov tub los thiab muab ntshav pleev lawv cov taubntseg xis, cov taubtes xis, thiab cov taubtaws xis. Mauxes muab cov ntshav uas seem coj mus nchos thoobplaws lub thaj ntawd plaub sab huv tibsi. 25Mauxes muab cov nqaij rog, tus kotw uas rog-rog, cov npluag roj uas qhwv lub plab thiab cov hnyuv, nplais siab uas zoo tshajplaws, ob lub raum nrog tej npluag roj uas npog ob lub raum, thiab cesqab sab xis. 26Ces nws muab ib lub ncuav tsis xyaw keeb hauv lub tawb uas rau cov ncuav tsis xyaw keeb uas twb muab fij rau tus TSWV lawm, ib lub ncuav zuaj xyaw roj, thiab ib lub ncuav nyias-nyias, coj mus tso rau saum cov roj thiab cesqab sab xis. 27Nws muab tagnrho tej khoom ntawd cob rau Aloos thiab Aloos cov tub, ces lawv muab yom fij rau tus TSWV. 28Ces Mauxes muab cov khoom ntawd rov los thiab coj mus hlawv uake nrog rau cov khoom fij nyob rau saum lub thaj uas yog khoom fij ua kevcai tsa povthawj hlob. Cov no yog tej khoom noj hlawv fij uas tswqab ntxiag ua rau tus TSWV txaussiab heev. 29Ces Mauxes muab lub hauvnrob coj mus yom fij rau tus TSWV. Tus yaj uas muab tua ua kevcai tsa povthawj ntawd yog muab rau Mauxes. Mauxes ua txhua yam rawsli tus TSWV tau xaaj tseg lawm.
30Mauxes muab ib co roj txhawb meejthawj thiab ib co ntshav yaj saum lub thaj los nchos rau Aloos, Aloos cov tub, thiab rau lawv tej ristsho. Qhov uas nws ua li ntawd yog nws muab lawv thiab lawv tej ristsho fij rau tus TSWV.
31Mauxes hais rau Aloos thiab Aloos cov tub hais tias, “Nqa cov nqaij no mus hau rau tom lub qhovrooj uas yuav nkag mus rau hauv lub Tsevntaub Sibntsib, thiab noj ntxuag cov ncuav tsis xyaw keeb uas nyob hauv lub tawb uas muab fij ua kevcai tsa povthawj hlob rawsli tus TSWV tau xaaj rau kuv lawm hais tias, ‘Aloos thiab nws cov tub yuavtsum noj tej ntawd.’ 32Muab tej nqaij lossis tej ncuav uas seem hlawv povtseg huv tibsi. 33Xya hnub nkaus mas nej yuavtsum tsis txhob tawm ntawm lub qhovrooj uas nkag mus rau hauv lub Tsevntaub Sibntsib hlo li, mus txog hnub uas nej ua kevcai tsa povthawj hlob tiav tag tso. 34Tej uas peb ua hnubno yog tus TSWV tau xaaj kom ua los daws nej tej kev txhaum. 35Nej yuavtsum nyob twjywm ntawm lub Tsevntaub Sibntsib lub qhovrooj xya hnub xya hmo thiab ua rawsli tus TSWV tau xaaj tseg lawm. Yog nej tsis ua li ntawd, nej yuav tuag. Nov yog tej lus uas tus TSWV tau xaaj rau kuv lawm.” 36Yogli ntawd, Aloos thiab Aloos cov tub thiaj ua txhua yam rawsli tej lus uas tus TSWV tau xaaj rau Mauxes kom hais rau lawv ntawd.
ទើបបានជ្រើសរើសហើយ៖
Levis Kevcai 8: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.