Levis Kevcai 10
10
Nadas Thiab Anpihus Lub Txim
1Aloos ob tug tub, Nadas thiab Anpihus nkawd ib leeg nqa ib taig ncaigtaws, muab cov thee uas tseem cig-cig tso rau hauv, muab hmoov tshuaj tswqab tso rau thiab coj mus fij rau tus TSWV. Tiamsis cov ncaigtaws ntawd tsis dawbhuv, rauqhov tus TSWV tsis tau xaaj kom nkawd coj cov khoom ntawd mus fij. 2Tamsim ntawd tus TSWV txawm tso hluavtaws los kub kiag nkawd tuag tabmeeg tus TSWV. 3Ces Mauxes hais rau Aloos tias, “Qhov no yog tej lus uas tus TSWV tau hais tseg cia lawm tias, ‘Cov uas ua Kuv tes haujlwm yuavtsum hwm Kuv txoj kev dawbhuv; Kuv yuav qhia Kuv tus tshwjchim rau Kuv haivneeg.’ ”#10:3: Kuv yuav qhia Kuv tus tshwjchim rau Kuv haivneeg; lossis Kuv haivneeg yuavtsum saib taus Kuv. Tiamsis Aloos nyob twjywm, tsis hais ib lolus li.
4Mauxes hu Aloos tus txivntxawm Uxiyees ob tug tub, Misayees thiab Exafas, kom tuaj cuag nws, thiab nws hais rau nkawd tias, “Neb los ntawm no thiab coj neb ob tug kwvtij ob lub cev tawm hauv lub Tsevntaub dawbhuv no mus tso rau sabnraum ntug yeej.” 5Yogli ntawd, nkawd thiaj los nqa ob lub cev tuag nrog rau tej khaubncaws thiab coj mus tso rau sabnraum ntug yeej rawsli Mauxes tau xaaj rau nkawd.
6Ces Mauxes hais rau Aloos thiab Aloos ob tug tub uas yog Ele-axas thiab Ithamas hais tias, “Tsis txhob cia nej cov plaubhau ntxhov hnyo lossis dua nej tej ristsho kom luag paub tias nej muaj kev quajntsuag. Yog nej ua li ntawd, nej yuav tuag thiab tus TSWV yuav chim rau ibtsoom pejxeem sawvdaws. Tiamsis tsocai rau ibtsoom Yixalayees los quaj rau ob tug tuag uas tus TSWV tau tso hluavtaws los kub ntawd. 7Tsis txhob tawm dhau ntawm lub Tsevntaub Sibntsib lub qhovrooj mus rau sabnraud; yog nej tawm, nej yuav tuag, rauqhov twb muab tus TSWV cov roj txhawb meejthawj pleev nej lawm.” Lawv txawm ua rawsli Mauxes hais ntawd.
Kev Tswjhwm Cov Povthawj Hlob
8Tus TSWV hais rau Aloos tias, 9“Tomqab uas koj thiab koj cov tub haus cawv txivhmab lossis haus cawv ntsim lawm, nej tsis txhob mus hauv Kuv lub Tsevntaub Sibntsib; yog nej mus rau hauv, nej yuav tuag. Nov yog txoj kevcai uas koj thiab koj cajces yuavtsum coj ib tiam rau ib tiam mus li. 10Koj yuavtsum paub cais hais tias qhovtwg dawbhuv thiab qhovtwg tsis dawbhuv, qhovtwg huv thiab qhovtwg tsis huv. 11Koj yuavtsum muab tagnrho tej kevcai uas Kuv kom Mauxes muab rau koj no qhia rau ibtsoom Yixalayees sawvdaws.”
12Mauxes hais rau Aloos thiab Aloos ob tus tub uas yog Ele-axas thiab Ithamas uas tseem ua neej nyob hais tias, “Muab cov hmoov nplej seem uas fij rau tus TSWV ntawd zuaj ua ib co ncuav tsis xyaw keeb thiab coj mus noj tom lub thaj ib sab, rauqhov yog cov khoom fij uas dawbhuv heev. 13Nej ciali coj mus noj hauv qhov chaw dawbhuv, rauqhov tej khoom uas fij rau tus TSWV ntawd yog koj feem thiab koj cov tub feem lawm. Ntawd yog tej uas tus TSWV tau xaaj rau kuv. #Levi 6:14-18 14Tiamsis lub hauvnrob thiab cesqab uas muab yom fij rau tus TSWV, koj thiab koj cov tub cov ntxhais nrog koj noj hauv qhov chaw dawbhuv, rauqhov cov khoom fij ua kev sib raugzoo uas cov Yixalayees coj tuaj fij ntawd, yog koj thiab koj cov menyuam tug. 15Lawv yuavtsum nqa cesqab thiab lub hauvnrob tuaj thaum lub sijhawm uas lawv nqa cov nqaij rog tuaj ua khoom noj fij rau tus TSWV. Cov ntawd yog koj thiab koj cov menyuam tug mus ibtxhis rawsli tus TSWV tau xaaj tseg lawm.” #Levi 7:30-34
16Thaum Mauxes nug txog tus tshis uas muab tua fij daws txim, lawv qhia hais tias lawv twb muab tus tshis ntawd hlawv tag lawm. Qhov no ua rau nws chim heev rau Ele-axas thiab Ithamas nkawd, nws thiaj nug hais tias, 17“Vim licas nej tsis coj cov khoom fij daws txim no mus noj hauv qhov chaw dawbhuv? Ntawd yog yam khoom fij dawbhuv, thiab tus TSWV twb muab rau nej coj mus fij daws cov pejxeem lub txim tabmeeg tus TSWV lawm. #Levi 6:24-26 18Vim twb tsis nqa cov ntshav mus rau hauv Chav Dawbhuv hauv lub Tsevntaub, nej yuavtsum noj tej khoom no rau hauv qhov chaw dawbhuv rawsli kuv twb hais rau nej lawm.”
19Aloos teb tias, “Hnubno cov pejxeem coj lawv tej khoom fij daws txim mus fij rau tus TSWV, thiab lawv coj lawv tej khoom tuaj hlawv fij huv tibsi, tiamsis tseem muaj tej kev ntshai no tshwm los rau kuv thiab. Yog kuv ciali noj cov nqaij uas fij daws txim ntawd hnubno, puas yuav haum tus TSWV siab?” 20Thaum Mauxes hnov li ntawd, nws kuj txaussiab lawm thiab.
ទើបបានជ្រើសរើសហើយ៖
Levis Kevcai 10: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.