Levis Kevcai 12
12
Kev Ntxuav Cov Pojniam Tomqab Yug Menyuam Tag
1Tus TSWV hais rau Mauxes tias, 2“Qhia rau cov Yixalayees hais tias, ‘Tus pojniam uas yug tau ib tug tub, nws lub cev yuav tsis huv txog xya hnub, ib yam li nws coj khaubncaws ua rau nws lub cev tsis huv. 3Hnub thib yim, yuavtsum muab tus metub ua kevcai txiav tawv. #Chiv 17:12; Lukas 2:21 4Ces tus pojniam ntawd yuavtsum caiv pebcaug-peb hnub ntxiv mamli ua kevcai ntxuav qhov uas nws nchuav cev ntawd; tiamsis nws yuavtsum tsis txhob kov tej yam uas dawbhuv lossis tsis txhob mus rau hauv lub Tsevntaub dawbhuv mus txog thaum uas nws ua kevcai ntxuav tag tso.’
5“ ‘Tiamsis yog tus pojniam ntawd yug tau ib tug ntxhais, ces nws lub cev yuav tsis huv txog kaum-plaub hnub, ib yam li nws coj khaubncaws ua rau nws lub cev tsis huv. Mas nws yuavtsum caiv raucaum-rau hnub ntxiv mamli ua kevcai ntxuav qhov uas nws nchuav cev ntawd.
6“ ‘Tomqab tus pojniam ntawd ua kevcai ntxuav tag lawm, txawm nws yug tau tub lossis tau ntxhais los xij, nws yuavtsum coj ib tug thav yaj hnubnyoog ib xyoos mus rau tus povthawj hlob ntawm lub Tsevntaub Sibntsib lub qhovrooj, muab tua hlawv ua khoom fij, thiab coj ib tug nquab taug lossis ib tug nquab nyeg mus fij daws txim. 7Tus povthawj hlob yuavtsum muab tus pojniam ntawd tej khoom fij rau tus TSWV thiab ua kevcai ntxuav tus pojniam ntawd tej kev tsis huv povtseg, mas nws lub cev thiaj rov huv. Qhov no yog tej kevcai uas ib tug pojniam yuav tau ua tomqab uas nws yug menyuam tag, tsis hais tau tub lossis tau ntxhais.
8“ ‘Yog tus pojniam ntawd fabpeem tsis tau ib tug thav yaj mus, nws coj ob tug nquab taug lossis ob tug nquab nyeg mus xwb los tau, muab ib tug tua hlawv ua khoom fij thiab muab ib tug fij daws txim; thiab tus povthawj hlob yuavtsum ua kevcai ntxuav nws tej kev tsis huv povtseg, nws lub cev thiaj rov huv.’ ” #Lukas 2:24
ទើបបានជ្រើសរើសហើយ៖
Levis Kevcai 12: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.