Levis Kevcai 11
11
Cov Tsiaj Uas Noj Tau
(2 Kevcai 14:3-21)
1Tus TSWV hais rau Mauxes thiab Aloos nkawd tias, 2“Neb qhia rau cov Yixalayees tias, ‘Nej noj tau txhua yam tsiaj nruabnrag 3uas muaj rau ncau ua ob sab thiab yog cov tsiaj zom zaub xwb, 4-6tiamsis muaj tej yam tsiaj uas zom zaub tiamsis rau tsis ncau, yogli ntawd nej tsis txhob noj cov tsiaj ntawd. Ntxhuav yog tsiaj zom zaub, tiamsis rau tsis ncau ua ob sab, thiab tsis huv rau nej. Tsis txhob noj loobtswb, loobtswb rau ncau tiamsis tsis zom zaub, thiab tsis huv rau nej. Tsis txhob noj luav, luav yog tsiaj zom zaub, tiamsis rau tsis ncau ua ob sab thiab tsis huv rau nej. 7Tsis txhob noj npua. Npua yog tsiaj tsis huv; npua rau ncau ua ob sab tiamsis tsis zom zaub. 8Tsis txhob noj cov tsiaj ntawd lossis kov cov tsiaj ntawd lub cev tuag li, vim cov tsiaj ntawd tsis huv rau nej lawm.
9“ ‘Nej noj tau txhua yam ntses uas muaj xiab thiab muaj nplai, 10tiamsis txhua yam tsiaj nyob hauv dej uas tsis muaj xiab thiab tsis muaj nplai, nej yuavtsum tsis txhob noj. 11Tej tsiaj ntawd suav tau hais tias yog tsiaj tsis huv, yogli ntawd, nej yuavtsum tsis txhob noj lossis kov cov tsiaj ntawd lub cev tuag hlo li. 12Nej yuavtsum tsis txhob noj txhua yam tsiaj nruabdeg uas tsis muaj xiab thiab tsis muaj nplai hlo li.
13-19“ ‘Nej tsis txhob noj tej noog uas hais hauvqab no, rauqhov tej noog no yog tej noog tsis huv rau nej: dav, plas, dav qhuav, liaj, loobnyuas, dav lwjhau, uab-lag, noog ntxhuav, noog tsoo qwj, noog pas hawv, os dej, noog noj ntses, noog dej,#11:13-19 Qeeyam noog uas hais hauv nqe 13-19 no, muaj tej yam paub tsis meej. noog co hauv, lossis puav.
20“ ‘Txhua yam kab muaj tis uas siv plaub txhais tes taw nkag yog tej uas tsis huv, 21tsuas tshwj cov kab muaj tis uas muaj plaub txhais tes taw thiab dhia tau pajpaws mas nej thiaj noj tau. 22Tej kab ntawd yog: kooj, kooj txig, kabziam lossis kooj tshuab. 23Tiamsis tej kab muaj tis uas me dua tej no thiab muaj plaub txhais tes taw nkag, puavleej yog tej kab uas tsis huv.
24-28“ ‘Yog leejtwg mus kov tej tsiaj tuag li nram no, nws yuav tsis huv mus txog thaum tsausntuj: tagnrho tej tsiaj uas muaj rau, tsis hais cov uas rau tsis ncau ua ob sab thiab zom zaub lossis tej tsiaj uas muaj plaub tug rau thiab xuas lub tsawj tes mus kev los xij. Yog leejtwg mus kov tej tsiaj no lub cev tuag, nws yuavtsum hle nws cev ristsho mus ntxhua, tiamsis nws tseem tsis tau huv mus txog thaum tsausntuj thiab.
29“ ‘Tej tsiaj uas nkag saum npoo av, yog tej tsiaj uas tsis huv rau nej: tshwbliag, nastsuag, nabqa tsiaj loj, 30nabqa dej, nabqa nqhuab, tsiav, nabqa xuabzeb thiab nabqa ntoo. 31Leejtwg kov cov tsiaj no lossis kov cov tsiaj no lub cev tuag, yuav ua rau nws tsis huv mus txog thaum tsausntuj. 32Thiab yog cov tsiaj no lub cev tuag poob rau saum ib yam khoom twg, yam khoom ntawd yuav tsis huv lawm thiab. Tej khoom ntawd yog: ntoo, khaubncaws, tawv tsiaj lossis hnabtsaj thiab tej uas yog khoom siv huv tibsi. Yuavtsum muab yam khoom ntawd coj mus tsau dej, yam khoom ntawd yuav tsis huv mus txog thaum tsausntuj, tomqab ntawd thiaj rov huv.
33“ ‘Yog tej tsiaj ntawd poob rau hauv tej laujkaub, txhua yam uas nyob hauv lub laujkaub ntawd tsis huv lawm. Nej yuavtsum muab lub laujkaub ntawd tsoo povtseg. 34Yog tej zaub-mov uas yus ibtxwm noj, ntub cov dej tsis huv uas hliv hauv lub laujkaub ntawd los, ces tej zaub-mov ntawd tsis huv lawm, thiab txhua yam kua uas nyob hauv lub laujkaub los tsis huv ib yam nkaus thiab. 35Txhua yam uas tej tsiaj tuag poob rau saud ces yam ntawd tsis huv lawm, txawm yog qhovtxos lossis qhovcub los yuavtsum muab tsoo povtseg, 36tiamsis lub qhovdej txhawv lossis lub rhawv dej tseem huv, txawm yog txhua yam uas mus chwv cov tsiaj ntawd lub cev tuag es tsis huv lawm los xij. 37Yog cov tsiaj ntawd ib tug poob rau saum tej noobqoob uas yuav coj mus cog, cov noobqoob ntawd tseem huv. 38Tiamsis yog twb muab cov noobqoob ntawd tsau dej lawm, es cov tsiaj ntawd ib tug mam poob rau saud, ces cov noobqoob ntawd tsis huv lawm.
39“ ‘Yog tej tsiaj uas nej muaj cai noj tau ib tug twg tuag, yog leejtwg mus kov tus tsiaj tuag ntawd lub cev, ces tus ntawd tsis huv mus txog thaum tsausntuj. 40Thiab yog leejtwg noj tus tsiaj tuag ntawd, nws yuavtsum hle nws cev ristsho mus ntxhua, thiab nws yuav tsis huv mus txog thaum tsausntuj; yog leejtwg mus nqa tej tsiaj tuag, nws yuavtsum hle nws cev ristsho mus ntxhua, thiab nws yuav tsis huv mus txog thaum tsausntuj.
41“ ‘Nej yuavtsum tsis txhob noj tej tsiaj me uas nkag saum npoo av; 42txawm yog tej uas ntaug, lossis siv plaub txhais tes taw mus kev, lossis tej uas muaj ntau txhais tes taw los xij. 43Tsis txhob ua rau nej lub cev tsis huv uas yog noj tej tsiaj uas tau hais los no. 44Kuv yog tus TSWV, uas yog nej tus Vajtswv, nej yuavtsum ceev nej tuskheej kom dawbhuv, rauqhov Kuv yog tus uas dawbhuv. #Levi 19:2; 1Pet 1:16 45Kuv yog tus TSWV uas coj nej tawm hauv tebchaws Iziv los, Kuv thiaj yog nej tus Vajtswv. Nej yuavtsum dawbhuv, rauqhov Kuv yog tus uas dawbhuv.
46“ ‘Nov yog txoj kevcai uas hais txog tej tsiaj nruabnrag, tej noog, txhua yam tsiaj nruabdeg, thiab txhua yam tsiaj uas nkag saum npoo av. 47Nej yuavtsum ceevfaj kom thiaj paub tias cov tsiaj twg yog cov huv thiab yog cov tsis huv, cov twg yog cov tsimnyog noj thiab cov twg yog cov tsis tsimnyog noj.’ ”
ទើបបានជ្រើសរើសហើយ៖
Levis Kevcai 11: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.