Levis Kevcai 13
13
Kevcai Rau Cov Neeg Mob Ruas
1Tus TSWV hais rau Mauxes thiab Aloos nkawd tias, 2“Yog leejtwg li nqaijtawv ciali o lossis ua pob rwj lossis mob nti tawv txho tshauv taws uas yuav dhau mus ua mob ruas,#13:2: mob ruas: Lus Henplais siv lolus no rau ntau yam kab mob uas yog mob phem-phem rau ntawm daim tawv nqaij, kuj yuav tsis yog kiag mob ruas xwb. yuavtsum coj nws mus cuag tus povthawj hlob Aloos lossis nws ib tug tub uas yog ib tug povthawj hlob. 3Tus povthawj hlob mam tshuaj nws tus mob, yog cov plaub uas nyob ntawm qhov mob ntawd ciali dawb thiab qawj mus tob dhau daim tawv nqaij mus rau hauv cov nqaij lawm, ces yog mob ruas#13:3: mob ruas: Saib ntawm nqe 2. ntag. Tus povthawj hlob yuav tau qhia rau nws hais tias nws yog neeg tsis huv lawm.
4“Tiamsis yog qhov mob ntawd dawb thiab qawj mus tsis tob dhau daim tawv rau hauv, cov plaub uas tuaj ntawd los tsis dawb, ces tus povthawj hlob yuav tau muab tus neeg ntawd cais nyob tibleeg xya hnub. 5Hnub thib xya tus povthawj hlob rov tshuaj saib nws tus mob ntawd dua ib zaug ntxiv, yog nws pom qhov mob ntawd zooli qub thiab tsis huam li, ces tus povthawj hlob yuav tau rov muab nws cais dua xya hnub ntxiv. 6Xya hnub tomqab ntawd, tus povthawj rov tshuaj dua ib zaug ntxiv, yog qhov mob ntawd ploj zujzus lawm thiab tsis huam ntxiv lawm, ces tus povthawj hlob mam qhia rau nws hais tias nws yog neeg huv, tsuas yog mob xwb. Nws yuavtsum hle nws cev ristsho mus ntxhua nws thiaj huv.
7“Tiamsis yog qhov mob ntawd rov huam tomqab uas tus povthawj hlob tshuaj tag thiab hais tias nws yog neeg huv lawm, nws yuavtsum tau rov mus cuag tus povthawj hlob dua. 8Tus povthawj hlob yuav tau rov tshuaj nws dua, yog qhov mob ntawd huam dhau daim tawv rau hauv lawm, tus povthawj hlob mam qhia rau nws hais tias nws tsis huv, thiab tus mob ntawd yog mob ruas.
9“Yog leejtwg mob ruas, yuavtsum tau coj nws mus cuag tus povthawj hlob. 10Tus povthawj hlob yuav tau tshuaj nws, yog tias qhov mob ntawd ciali dawb thiab ua rau cov plaub ntawm qhov mob ntawd dawb tag thiab ua kua yig, 11ces yeej yog mob ruas lawm. Tus povthawj hlob yuav tau qhia rau nws hais tias nws yog neeg tsis huv; ces tsis tas yuav muab nws cais, vim yeej paub tseeb hais tias nws yog neeg tsis huv lawm.
12“Yog cov ruas ntawd huam thoob ibce saum taubhau ti nkaus hauv kotaw, 13ces tus povthawj hlob yuav tau rov tshuaj nws dua ib zaug ntxiv. Yog tus povthawj hlob pom tias cov mob huam thoobplaws ibce lawm, tus povthawj hlob yuav tau qhia rau nws hais tias nws yog neeg huv; vim daim tawv dawb thoobplaws ibce, ces nws yog neeg huv. 14Tiamsis yog thaum nws cov nqaij tawgpleb ua rau tej mob tshwm tuaj lawm, ces nws yog tus neeg tsis huv. 15Tus povthawj hlob yuav tau rov tshuaj nws dua ntxiv, yog tus povthawj hlob pom qhov mob ntawd tawgpleb lawm tiag, tus povthawj hlob yuav tau qhia rau nws hais tias nws yog neeg tsis huv. Qhov tawgpleb ntawd qhia hais tias yog mob ruas, thiab nws yog neeg tsis huv.
16“Tiamsis yog thaum twg qhov mob ntawd zoo thiab tej tawv nqaij dawb tuaj lawm, tus neeg ntawd yuavtsum rov mus cuag tus povthawj hlob. 17Tus povthawj hlob yuav tau rov tshuaj nws dua ntxiv. Yog qhov mob zoo thiab twb dawb lawm, nws thiaj yog neeg huv thiab tus povthawj hlob mam qhia rau nws hais tias nws yog neeg huv lawm.
18“Yog leejtwg mob npuag rau ntawm daim tawv nqaij tiamsis twb zoo lawm, 19thiab yog tomqab ntawd, lub qhovtxhab ntawd dawb lias thiab o tuaj lossis liab daj dawb rov tuaj, tus neeg mob ntawd yuavtsum mus cuag tus povthawj hlob. 20Tus povthawj hlob yuav tau tshuaj nws, thiab yog qhov mob ntawd twb mob dhau daim tawv rau hauv cov nqaij thiab cov plaub uas tuaj ntawm qhov mob ntawd dawb tag lawm, ces tus povthawj hlob yuav tau qhia rau nws hais tias nws yog neeg tsis huv. Qhov ntawd yog mob ruas uas yog chiv los ntawm qhov mob npuag.
21“Tiamsis yog tus povthawj hlob tshuaj tsis pom cov plaub uas tuaj ntawm qhov mob ntawd dawb thiab qhov mob tsis qawj tob dhau daim tawv rau hauv, tiamsis pom qhov mob ntawd txawv lawm, ces tus povthawj hlob yuav muab tus uas mob ntawd cais nyob tibleeg xya hnub. 22Yog qhov mob ntawd huam tuaj lawm, tus povthawj hlob yuav tau qhia rau nws hais tias nws yog neeg tsis huv; yog nws mob ruas tiag. 23Tiamsis yog tsis txawv thiab tsis huam li, ces yog kiavtxhab mob npuag xwb, ces tus povthawj hlob mam qhia rau nws hais tias nws yog neeg huv.
24“Yog muaj ib tug twg kubhnyiab, yog qhov kubhnyiab ntawd dawb lossis liab dawb lias, 25tus povthawj hlob yuav tau tshuaj qhov mob ntawd. Yog cov plaub ntawm qhov kubhnyiab dawb thiab qawj tob dhau daim tawv rau hauv cov nqaij lawm, yog cov kab mob ruas pib huam ntawm qhov kubhnyiab ntawd tuaj ntag, ces tus povthawj hlob yuav tau qhia rau nws hais tias nws yog neeg tsis huv. 26Tiamsis yog tus povthawj hlob tshuaj qhov mob, cov plaub ntawm qhov mob ntawd tsis dawb thiab tsis qawj dhau daim tawv rau hauv cov nqaij, tiamsis pom qhov mob ntawd txawv lawm, ces tus povthawj hlob muab tus neeg ntawd cais nyob tibleeg xya hnub. 27Hnub thib xya tus povthawj hlob mam rov tshuaj dua ib zaug ntxiv, yog qhov mob huam tuaj, ces qhov mob ntawd yog mob ruas; ces tus povthawj hlob yuav tau qhia rau nws hais tias nws yog neeg tsis huv. 28Tiamsis yog qhov mob tsis txawv thiab tsis huam li thiab ploj zujzus lawm, ces qhov mob ntawd tsis yog mob ruas. Tus povthawj hlob yuav tau qhia rau nws hais tias nws yog neeg huv, tsuas yog lub qhovtxhab kubhnyiab huam tuaj xwb.
29“Thaum ib tug txivneej lossis ib tug pojniam mob o rau saum taubhau lossis rau ntawm pobtsaig, 30tus povthawj hlob yuavtsum tau tshuaj qhov mob ntawd. Yog pom qhov mob ntawd qawj dhau daim tawv rau hauv cov nqaij lawm, thiab cov plaub ntawm qhov mob daj thiab soob-soob lawm, ces qhov mob ntawd yog mob ruas rau saum taubhau lossis ntawm pobtsaig. Ces tus povthawj hlob yuav tau qhia rau nws hais tias nws yog neeg tsis huv lawm. 31Yog thaum tus povthawj hlob tshuaj tus mob ntawd, qhov mob tsis qawj dhau daim tawv rau hauv cov nqaij, thiab yog cov plaub ntawd tsis dub, ces tus povthawj hlob yuavtsum muab tus neeg mob ntawd cais nyob tibleeg xya hnub.
32“Hnub thib xya tus povthawj hlob yuav tau rov tshuaj qhov mob dua ib zaug ntxiv, yog qhov mob tsis huam thiab tej plaub ntawm qhov mob tsis daj thiab tsis qawj dhau daim tawv rau hauv cov nqaij, 33tus neeg ntawd yuavtsum tau muab tej plaub uas nyob ibncig ntawm qhov mob chais povtseg. Ces tus povthawj hlob yuav tau rov muab nws cais nyob tibleeg xya hnub ntxiv thiab. 34Hnub thib xya tus povthawj hlob yuav tau rov tshuaj qhov mob dua ib zaug ntxiv. Yog tias tsis huam thiab tsis qawj dhau daim tawv rau hauv cov nqaij, tus povthawj hlob yuav tau qhia rau nws hais tias nws yog neeg huv. Tus neeg ntawd yuavtsum hle nws cev ristsho mus ntxhua, nws thiaj rov huv.
35“Tiamsis yog qhov mob ntawd rov huam tomqab uas tus povthawj hlob twb hais tias nws yog neeg huv lawm, 36tus povthawj hlob yuav tau rov tshuaj tus mob ntawd dua ib zaug ntxiv. Yog qhov mob huam tuaj, tsis tas yuav saib nws tej plaub daj uas tuaj ntawm qhov mob li, tus neeg ntawd tsis huv lawm. 37Tiamsis yog tus povthawj hlob pom tias, qhov mob los tsis huam, cov plaub dub ntawm qhov mob los tuaj zoo, thiab qhov mob los zoo lawm, ces tus povthawj hlob yuav tau qhia rau nws hais tias nws yog neeg huv.
38“Thaum ib tug txivneej lossis ib tug pojniam mob nti tawv ua plhaws dawb pes vog rau ntawm tej tawv nqaij, 39tus povthawj hlob yuavtsum tau tshuaj tus neeg ntawd. Yog qhov mob ntawd dawb muag lias lawm, ces yog daim tawv lam tawg ua hlwv tawm tuaj xwb, tus neeg ntawd yeej huv.
40-41“Yog muaj ib tug txivneej tej plaubhau hle tag, txawm yog yuav hle tom hauvpliaj ua taubhau docuas los xij, nws tseem yog neeg huv. 42Tiamsis yog mob ua npuag liab dawb tshwm rau saum tus neeg ntawd qhov do hau, ces qhov ntawd yog mob ruas. 43Tus povthawj hlob yuavtsum tshuaj tus neeg mob ntawd, yog mob ciali o ua liab dawb txho taws rau saum taubhau lossis ntawm hauvpliaj, 44ces tus povthawj hlob yuav tau qhia rau nws hais tias nws yog neeg tsis huv, rauqhov nws mob ruas rau saum taubhau.
45“Tus neeg twg uas mob ruas, nws yuavtsum hnav tej ristsho uas ntuag-ntuag, tsis txhob ntsis nws tej plaubhau, muab ntaub los npog nws lub ntsejmuag ibnrab rau hauv, thiab qw hais tias, ‘Tsis huv! Tsis huv!’ 46Tus uas mob ruas, nws mob ntev npaum licas ces nws yog neeg tsis huv ntev npaum li ntawd. Nws yuavtsum tawm mus nyob nws ib leeg rau sabnraum ntug yeej, tsis txhob nyob xyaw luag lwmtus.
Kevcai Hais Txog Tej Khaubncaws Tuajpwm
47“Thaum tej ristsho tuajpwm,#13:47: tuajpwm: Lolus Henplais uas siv rau “mob ruas” thiab “tuajpwm” yog siv tib lolus xwb. tsis hais tej ristsho plaub yaj lossis tej ristsho ntaub mag, 48lossis txhua daim ntaub mag lossis tej ristsho ntaub plaub yaj lossis tej tawv tsiaj lossis txhua yam uas muab tawv tsiaj ua, 49yog cov pwm ntawd ua rau tej ristsho thiab tej ntaub tuajpwm ntsuab daj lis lossis liab daj lis, ces yog cov pwm ntawd huam, mas yuavtsum coj mus rau tus povthawj hlob saib. 50Tus povthawj hlob yuavtsum tshuaj qhov tuajpwm ntawd thiab muab daim khaubncaws uas lo cov pwm ntawd coj mus tso rau ib qho xya hnub. 51Hnub thib xya tus povthawj hlob muab rov los tshuaj dua ib zaug ntxiv, yog tej qho tuajpwm huam tuaj, ces daim khaubncaws ntawd tsis huv lawm. 52Tus povthawj hlob yuav tau muab daim khaubncaws ntawd mus hlawv, rauqhov cov pwm huam tuaj lawm, yuavtsum muab hlawv povtseg.
53“Tiamsis yog thaum tus povthawj hlob tshuaj daim khaubncaws ntawd, thiab nws tsis pom qhov tuajpwm uas lo daim khaubncaws huam tuaj li, 54ces nws yuavtsum kom luag muab daim khaubncaws ntawd coj mus ntxhua thiab muab tso rau ib qho xya hnub ntxiv. 55Tomqab ntawd nws yuav tau rov muab daim khaubncaws ntawd los tshuaj dua, yog tsis pom txawv li, thiab txawm yog tej pwm tsis huam los daim khaubncaws ntawd yeej tsis huv lawm; nej yuavtsum muab daim khaubncaws ntawd hlawv povtseg, tsis hais daim khaubncaws ntawd tuajpwm rau ntawm xubntiag lossis nraum nrobqaum.
56“Tiamsis yog thaum tus povthawj hlob rov tshuaj daim khaubncaws ntawd ntxiv thiab pom tias qhov tuajpwm twb yaj tag lawm, tsis hais ntaub lossis tawv tsiaj, nws yuavtsum muab qhov ntawd dua tawm povtseg. 57Thiab yog cov pwm rov tshwm dua tshiab tuaj thiab huam ntxiv, tus tswv khaubncaws yuavtsum muab daim khaubncaws ntawd coj mus hlawv povtseg. 58Txawm yog nws twb muab daim khaubncaws ntawd ntxhua thiab qhov pwm ntawd tau ploj lawm los xij, nws yuavtsum rov muab ntxhua dua, daim khaubncaws ntawd thiaj yuav huv.”
59Tej uas hais los no, yog txoj kevcai uas hais txog tej pwm uas tuaj rau ntawm tej khaubncaws, tsis hais tej ntaub plaub yaj lossis ntaub mag, lossis tej ristsho ntaub mag lossis tej ristsho ntaub plaub yaj, lossis txhua yam uas muab tawv tsiaj ua; coj los saib seb huv lossis tsis huv.
ទើបបានជ្រើសរើសហើយ៖
Levis Kevcai 13: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.