Khiav Dim 38
38
Txua Lub Thaj Hlawv Khoom Fij
(Khiav Dim 27:1-8)
1Npexalees muab ntoo kubtwg los ua lub thaj hlawv khoom fij uas dav xwmfab xwmmeem. Ntev 2:2 xatimev, dav 2:2 xatimev, thiab siab 1:3 mev. 2Nws ua plaub tug kub rau saum plaub cegkaum thaj; plaub tug kub ntawd txua keev hlo nrog lub thaj thiab muab tooj vuam huv tibsi. 3Nws tseem ua tagnrho tej twj siv rau lub thaj: laujkaub, duav, tais, nqelauj thiab yias rau ncaigtaws. Tej cuabyeej no puavleej yog muab tooj ua xwb. 4Nws muab tooj ua ib daim ntxaij thiab muab tso rau hauvqab ntawm tus ntug lub thaj txog ntua ibnrab. 5Nws Muab tooj nchuav ua plaub lub khawb ntsia rau ntawm plaub cegkaum thaj ua tes nqa. 6Nws muab ntoo kubtwg ua ob tug las uas kwv lub thaj, thiab muab tooj vuam rau, 7thiab muab ob tug las ntawd ntxig rau ntawm plaub lub khawb uas ntsia rau ntawm lub thaj ob sab. Muab txiag ntoo ua lub thaj thiab tseg hauv plawv khoob.
Ua Lub Phiab Tooj
(Khiav Dim 30:18)
8Npexalees siv tooj ua lub phiab ntxuav tes thiab lub taw phiab yog muab cov pojniam uas ua haujlwm nyob ntawm lub qhovrooj uas mus hauv lub Tsevntaub Sibntsib tej tsom-iav uas yog tooj los nchuav ua. #Khiav 30:18
Xov Vaj Ncig Lub Tsevntaub Sibntsib
(Khiav Dim 27:9-19)
9Npexalees xov vaj ncig lub qabkhav ntawm lub Tsevntaub Sibntsib. Muab daim ntaub mag ntev 44 mev xov sab nrad, 10muab neesnkaum tus kav tooj ua ncej, muab neesnkaum daim tooj tiag taw, tiamsis cov khawb thiab cov hlua yog muab nyiaj ua. 11Xov zoo ib yam li ntawd rau sab ped thiab.
12Sab hnubpoob, yog muab daim ntaub uas ntev 22 mev los xov ncig lub qabkhav ntawd, txhos kaum tus ncej thiab kaum daim tiag taw nrog rau cov khawb thiab cov hlua uas yog muab nyiaj ua. 13Sab hnubtuaj, uas yog lub roojvag nkag mus rau hauv, sab tshavloog ntawd xov 22 mev dav ib yam nkaus. 14-15Ib sab roojvag twg muab cov ntaub uas ntev 6.6 mev los dai rau, thiab txhos peb tug ncej thiab peb daim tiag taw. 16Tagnrho cov ntaub uas xov ncig lub qabkhav ntawm lub Tsevntaub yog muab tej ntaub mag zoo-zoo xov xwb. 17Cov tiag taw ncej yog muab tooj ua; cov khawb, cov hlua pav thiab cov hau khwb ncej yog muab nyiaj ua. Tagnrho cov ncej uas xov ncig lub tshavloog ntawm lub tsev, yog muab xov nyiaj pav xwb.
18Muab cov ntaub mag zoo-zoo uas yog xuas xov xiav, xov tsamxem, thiab xov liab, xaws ua pajntaub txaij nraug zees thaiv lub tshavloog ntawm lub roojloog rau. Daim ntaub ntawd ntev 9 mev thiab siab 2 mev, ib yam li cov ntaub uas xov lub vaj. 19Txhos plaub tug ncej thiab plaub daim tiag taw uas yog muab tooj ua; cov khawb uas khawm tej ncej, cov hau khwb ncej thiab cov hlua pav puavleej yog muab nyiaj ua. 20Tagnrho cov tswg uas txhos rub lub Tsevntaub thiab cov ncej lajkab uas xov ncig lub Tsevntaub puavleej yog muab tooj ua.
Tej Khoom Siv Hauv Lub Tsevntaub Sibntsib
21No mus yog teev tej khoom siv hauv lub Tsevntaub Sibntsib, uas yog lub chaw cia ob daim txiag zeb uas saum Kaum Nqe Kevcai rau. Mauxes tau xaaj kom cov Levis ua tes haujlwm no nyob qab tswjhwm ntawm tus povthawj hlob Aloos tus tub Ithamas.
22Npexalees, uas yog Ulis tus tub thiab yog Hawj tus xeebntxwv uas yog xeem Yudas, tau ua txhua yam uas tus TSWV tau xaaj tseg lawm. 23Tus uas pab Npexalees yog Auhauli-as, uas yog Ahixamas tus tub uas yog xeem Das; Auhauli-as yog tus uas txawj txaug ntoo, txawj tawm qauv, thiab ntos tej ntaub mag uas yog siv xov xiav, xov tsamxem, thiab xov liab.
24Tagnrho tej kub uas coj tuaj fij rau tus TSWV ua lub Tsevntaub dawbhuv ntawd hnyav 1,000 kilus, uas yog muab luj kom hnyav ntaus nqi rawsli nomtswv kevcai. 25Cov nyiaj uas tau los ntawm cov pejxeem uas tuaj sau npe yog hnyav 3,430 kilus, uas yog muab luj kom hnyav ntaus nqi rawsli nomtswv kevcai. #Khiav 30:11-16 26Tagnrho txhua tus neeg uas tuaj sau npe ntawd puavleej tau them nqi sibnpaug zos, uas yog muab luj kom hnyav ntaus nqi rawsli nomtswv kevcai. Cov txivneej uas hnubnyoog muaj neesnkaum xyoo rov saud, tuaj sau npe yog muaj 603,550 leej. #Math 17:24 27Cov nyiaj ntawd, lawv muab 3,400 kilus los ua 100 daim tiag taw lub Tsevntaub dawbhuv thiab ua taw rau cov ntaub xov, ib tug taw twg hnyav 34 kilus. 28Muab 30 kilus nyiaj rau Npexalees ua hlua, ua khawb khawm cov ncej, thiab ua hau khwb cov ncej.
29Cov tooj uas coj tuaj fij rau tus TSWV hnyav 2,425 kilus. 30Npexalees muab cov tooj no ua cov tiag taw qhovrooj rau lub Tsevntaub Sibntsib, ua lub thaj, ua daim ntxaij, thiab ua tagnrho tej khoom uas siv rau lub thaj, 31cov tiag ncej lajkab uas xov ncig lub Tsevntaub thiab cov tiag taw ncej roojloog, thiab tagnrho cov tswg puavleej yog muab cov tooj ntawd ua.
ទើបបានជ្រើសរើសហើយ៖
Khiav Dim 38: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.