Khiav Dim 39
39
Xaws Tsoostsho Rau Cov Povthawj Hlob Hnav
(Khiav Dim 28:1-14)
1Lawv muab tej xov xiav, xov tsamxem, thiab xov liab, los ntos ua tsoostsho rau cov povthawj hlob hnav thaum lawv mus ua Vajtswv tes haujlwm hauv Chav Dawbhuv. Thiab lawv tseem xaws ib ce tsoostsho povthawj hlob rau Aloos, rawsli tus TSWV tau xaaj rau Mauxes lawm.
2Lawv muab tej tseem ntaub mag zoo-zoo uas yog xuas xov xiav, xov tsamxem, xov liab, thiab xov kub xaws ua lub tsho efauj. 3Lawv muab kub ntaus ua tej pluaj nyias-nyias thiab muab txiav ua xov coj los ntos nrog cov tseem xov maj xiav, xov tsamxem, thiab xov liab. 4Lawv xaws ob pluaj ntaub khuam xubpwg lo rau lub tsho efauj, thiab muab ib txoj khuam ib sab xubpwg, kom thiaj zawm tau. 5Txoj hlab sia yog muab cov ntaub uas xaws lub tsho efauj los ua, uas yog muab xaws lo uake rau ntawm lub tsho efauj rawsli tus TSWV tau xaaj rau Mauxes lawm. 6Lawv muab ob lub qe zeb kanelis uas txaug Yakhauj kaum-ob leeg tub cov npe los; cog rau hauv cov phiaj kub. 7Lawv muab ob lub qe zeb ntawd dai rau ntawm lub tsho efauj ob txoj hlab saum xubpwg, ua lub cim nco txog kaum-ob xeem Yixalayees, rawsli tus TSWV tau xaaj rau Mauxes lawm.
Xaws Daim Awv
(Khiav Dim 28:15-30)
8Lub awv yog lawv muab cov ntaub uas xaws lub tsho efauj los ua, thiab xaws pajntaub rau kom zoo ib yam nkaus. 9Lub awv ntawd yuavtsum yog daim xwmfab xwmmeem thiab muab tais ua ob tsem, ntev 22 xatimev thiab dav 22 xatimev. 10Lawv cog plaub leej qe zeb uas muajnqis rau; thawj leej cog ib lub liab daj lis, ib lub daj ntshiabsi, thiab ib lub liab tshiab-tshiab; 11leej thib ob, cog ib lub ntsuab ci hob, ib lub xiav, thiab ib lub dawb ci hob; 12leej thib peb, cog ib lub liab ntshiabsi, ib lub txho taws, thiab ib lub liab ua tsamxem ntshav; 13leej thib plaub, cog ib lub txho xiav, ib lub dawb txho, thiab ib lub dawb ci ntshiabsi. Cov qe zeb no puavleej muab cog rau ntawm ob daim phiaj kub. 14Kaum-ob lub qe zeb ntawd puavleej txaug Yakhauj kaum-ob tus tub cov npe rau, uas yog sawvcev kaum-ob xeem Yixalayees.
15Lawv muab cov tseem-tseem kub los ntaus ua ib co saw ntswj zooli txojhlua, tis rau ntawm lub awv. 16Lawv muab kub ntaus ua ob daim phiaj thiab ob lub khawb kub, muab ob lub khawb kub tis rau ntawm daim awv ob cegkaum saud. 17Lawv muab ob txoj saw kub tis rau ntawm ob lub khawb kub, 18thiab muab ob tog qab tis rau ob daim phiaj, ua li no kom ob txoj saw lo lub tsho efauj ob daim tiag xubpwg uas dauv rau ntawm xubntiag. 19Lawv ua ob lub khawb kub tis rau ntawm lub awv ob lub kaum hauvqab ntawm tus ntug sabhauv uas npuab lub tsho efauj. 20Lawv ua dua ob lub khawb kub tis ntxiv rau lub tsho khuam ob txoj hlab khuam xubpwg ob tog tw kawg tom xubntiag uas ze kab xaws thiab txuas nkaus txoj hlab sia lub tsho efauj. 21Lawv muab ntaub xiav khi lub awv ob lub khawb rau ntawm lub tsho efauj ob lub khawb uas txuas rau ntawm txoj hlab, kom daim awv thiaj tsis txav ntawm lub tsho efauj, rawsli tus TSWV tau xaaj rau Mauxes lawm.
Xaws Dua Ib Co Tsho Rau Cov Povthawj Hlob
(Khiav Dim 28:31-43)
22Lub tsho ntev uas hnav tuaj hauvqab lub tsho efauj, yog muab cov ntaub xiav xaws xwb. 23Lub cajdab tshos, xaws looj saum taubhau tuaj, muab foob lub cajdab tshos ntawd thoobplaws kom thiaj tsis ntuag. 24Lawv muab xov xiav, xov tsamxem, thiab xov liab xaws ua ib co txiv ntsiab pobkws dai rau ntawm lub tw tsho ntev. 25Thiab lawv muab cov tseem kub los ntaus ua ib co tswb dai rau ntawm lub tw tsho nruabnrab ntawm cov txiv ntsiab pobkws, 26muab cov tswb thiab cov txiv ntsiab pobkws dai thoobplaws lub tw tsho, dai ib lub txiv ntsiab pobkws quas ib lub tswb, rawsli tus TSWV tau xaaj rau Mauxes lawm.
27Lawv muab tej ntaub mag uas ntos tau zoo heev, xaws ib co tsho loj rau Aloos thiab nws cov tub hnav, 28thiab muab ntaub mag xaws phuam, kausmom, ris luv, 29thiab muab cov ntaub mag zoo-zoo uas xuas xov xiav, xov tsamxem, thiab xov liab xaws ua hlab sia, thiab xaws ua pajntaub rau kom txaij nraug zees rawsli tus TSWV tau xaaj rau Mauxes lawm. 30Lawv muab cov tseem kub ntaus ua ib daim phiaj, thiab txaug npe ntawv rau saum daim phiaj ntawd hais tias, “Dawbhuv rau tus TSWV.” 31Lawv muab ib txojhlua ntaub xiav khi daim phiaj kub rau txoj phuam uas ntoo saum taubhau thiab muab tig rau ntawm hauvpliaj.
Tej Haujlwm Tiav Tag Lawm
(Khiav Dim 35:10-19)
32Txhua yam haujlwm uas ua lub Tsevntaub Sibntsib twb tiav tag lawm. Cov Yixalayees ua txhua yam rawsli tus TSWV tau xaaj rau Mauxes lawm. 33Lawv nqa lub Tsevntaub, cov khawb, cov ncej, cov las, cov ncej thiab tej tiag taw ncej los rau Mauxes; 34cov tawv yaj uas zas liab thiab cov tawv nyuj yog cov vov; daim ntaub thaiv; 35lub Phijxab Lus Cogtseg uas ntim ob daim txiag zeb, ob tug las, lub hau phijxab; 36lub rooj thiab tagnrho tej khoom siv ntawm lub rooj, thiab cov ncuav uas fij rau Vajtswv; 37tus ncej txawb teeb uas yog tseem-tseem kub, cov teeb, tagnrho tej khoom siv ntawm lub teeb thiab cov roj sam teeb; 38lub thaj kub, cov roj txhawb meejthawj; cov hmoov tshuaj tswqab; daim ntaub thaiv lub qhovrooj mus rau hauv lub Tsevntaub; 39lub thaj tooj nrog daim npog lub thaj; cov ncej thiab tej khoom siv ntawm lub thaj; lub phiab tooj ntxuav tes thiab lub taw phiab; 40cov ntaub xov vaj ncig lub tshavloog thiab cov ncej lajkab thiab tej tiag taw ncej lajkab; daim ntaub thaiv lub roojloog thiab cov hlua khi daim ntaub, cov tswg thiab tagnrho tej khoom uas siv rau lub Tsevntaub Sibntsib; 41thiab tej tsoostsho uas xaws rau cov povthawj hlob hnav mus ua haujlwm hauv Chav Dawbhuv, cov tsoostsho povthawj hlob ntawd yog rau Aloos thiab nws cov tub.
42Cov Yixalayees tau ua txhua yam uas tus TSWV tau xaaj rau Mauxes huv tibsi. 43Mauxes tshuaj txhua yam thiab pom tias cov Yixalayees yeej ua tiavlog li tus TSWV tau xaaj tseg lawm tiag. Yogli ntawd, Mauxes thiaj foom koobhmoov rau lawv.
ទើបបានជ្រើសរើសហើយ៖
Khiav Dim 39: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.