Khiav Dim 37
37
Txua Lub Phijxab Lus Cogtseg
(Khiav Dim 25:10-22)
1Npexalees muab ntoo kubtwg los txua ua lub Phijxab Lus Cogtseg, ntev 110 xatimev, dav 66 xatimev, siab 66 xatimev. 2Nws muab cov tseem-tseem kub vuam lub Phijxab ntawd sabnraud thiab sabhauv nruabnrog, thiab muab kub los ua tus ntug thoobplaws. 3Nws muab kub ua plaub lub khawb ntsia rau ntawm plaub tug ceg, ib sab twg yog ntsia ob lub. 4Nws muab ntoo kubtwg ua ob tug las kwv, thiab muab kub vuam ob tug las ntoo ntawd huv tibsi, 5thiab muab ob tug las ntawd ntxig rau hauv cov khawb ntawm lub Phijxab ib sab ib tug.
6Nws muab cov tseem-tseem kub los ua daim khwb, qhov ntev yog 110 xatimev, qhov dav yog 66 xatimev. 7Nws muab kub ntaus ua ob tug khelunpees, 8txawb ib tug rau ib tog hau Phijxab. Nws muab ob tug khelunpees ntawd cog keevxeeb rau lub hau Phijxab ib tug rau ib tos. 9Tso ob tug khelunpees ntawd tig ntsejmuag tuaj uake, kom cov koojtis nthuav los npog lub Phijxab.
Txua Lub Rooj Rau Ncuav Uas Fij Rau Vajtswv
(Khiav Dim 25:23-30)
10Npexalees muab ntoo kubtwg txua ua ib lub rooj ntev 88 xatimev, dav 44 xatimev, siab 66 xatimev. 11Nws muab cov tseem-tseem kub vuam lub rooj ntawd, thiab muab kub ua ib tug ntug ncig thoobplaws lub rooj. 12Nws ua ib tug npoo tuab li 7.5 xatimev ncig lub ntug thiab muab kub ua tus ntug thoobplaws lub npoo. 13Nws ua plaub lub khawb kub ntsia rau plaub lub kaum rooj ntawm plaub tug ceg. 14Cov khawb uas ntxig las kwv lub rooj ntawd, muab ntsia kom ze rau ntawm tus npoo. 15Nws muab ntoo kubtwg los txua ua ob tug las thiab muab kub vuam rau ob tug las ntawd. 16Nws muab cov tseem-tseem kub nchuav ua ib co twj taig tau siv rau saum lub rooj: phaj, khob, thiab tais tau siv rau cawv txivhmab ua khoom fij.
Ua Tus Ncej Txawb Teeb
(Khiav Dim 25:31-40)
17Npexalees muab rauj ntaus cov tseem-tseem kub ua tus ncej txawb teeb. Nws muab kub ntaus ua tus taw thiab tus ncej txawb teeb; ntaus ua paj, cos paj, thiab nplai paj, kom keevxeeb rau ntawm tus ncej. 18Thiab ua kom ncau ua rau ceg, ib sab peb ceg. 19Rau ceg ntawd, ib ceg ua peb lub paj zooli paj txiv ovmees, nrog cov cos paj thiab tej nplai paj. 20Tus ncej txawb teeb mas muab zaig ua plaub lub paj zooli paj txiv ovmees, nrog cov cos paj thiab tej nplai paj. 21Ntawm rau tus ceg teeb ntawd, ua ib lub paj rau hauvqab ntawm cov ceg ncau. 22Cov cos paj, cov ceg thiab tus ncej txawb teeb yog muab tib thooj tseem-tseem kub ntaus ua xwb. 23Nws ua xya lub teeb rau ntawm tus ncej txawb teeb, thiab nws muab tej tseem-tseem kub ntaus ua phaj thiab txiab txiav teebxeeb. 24Nws muab 35 kilus uas tseem-tseem kub los ntaus ua tus ncej txawb teeb thiab tagnrho tej twj siv rau lub teeb.
Txua Lub Thaj Hlawv Hmoov Tshuaj Tswqab
(Khiav Dim 30:1-5)
25Npexalees muab ntoo kubtwg ua ib lub thaj hlawv hmoov tshuaj tswqab. Lub thaj ntawd yuavtsum muab txua ua xwmfab xwmmeem, ntev 45 xatimev thiab dav 45 xatimev, thiab siab 90 xatimev. Txua plaub tug kub keev hlo rau plaub cegkaum thaj. 26Nws muab tej tseem kub vuam rau plaub sab thiab plaub tug kub huv tibsi, thiab muab ib pluaj kub ntsia npuab tus ntug thoobplaws. 27Ua khawb kub rau lub thaj thiab muab ntsia rau ob sab hauvqab tus ntug, ib sab twg ob lub ua chaw ntxig las kwv lub thaj. 28Nws muab ntoo kubtwg txua ua las kwv lub thaj thiab muab kub vuam ob tug las ntawd huv tibsi.
Ua Cov Roj Txhawb Meejthawj Thiab Cov Hmoov Tshuaj Tswqab
(Khiav Dim 30:22-38)
29Npexalees tseem ua cov roj txhawb meejthawj dawbhuv thiab muab cov nroj tswqab los tov ib yam li tov tej tshuaj tswqab.
ទើបបានជ្រើសរើសហើយ៖
Khiav Dim 37: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.