Khiav Dim 36
36
1“Npexalees, Auhauli-as thiab txhua tus uas tus TSWV tau pub muaj txujtes zoo thiab kev totaub, paub txog txhua yam uas cheemtsum uas yuav ua rau lub Tsevntaub dawbhuv, yuavtsum ua txhua yam rawsli tus TSWV tau xaaj tseg.”
Cov Neeg Coj Khoom Tuaj Fij Ntau Heev
2Mauxes hu Npexalees, Auhauli-as thiab tagnrho cov txivneej uas txujtes zoo uas tus TSWV pub kom muaj peevxwm thiab cov uas txaussiab pab tuaj, thiab Mauxes kom lawv ciali pib ua haujlwm. 3Mauxes muab tagnrho tej khoom uas cov Yixalayees coj tuaj ua lub Tsevntaub dawbhuv rau lawv. Tiamsis cov Yixalayees tseem niaj tagkis nqa khoom fij tuaj rau Mauxes. 4Ces cov txivneej uas txujtes zoo uas ua haujlwm thiaj mus cuag 5Mauxes thiab hais rau nws tias, “Cov neeg nqa khoom tuaj ntau tshaj qhov uas peb xav tau coj los ua tes haujlwm uas tus TSWV tau xaaj rau peb ua lawm.”
6Yogli ntawd, Mauxes thiaj xaaj rau cov pejxeem thoobplaws hauv lub yeej kom tsis txhob nqa khoom tuaj ua lub Tsevntaub dawbhuv ntxiv lawm; yogli ntawd, cov pejxeem thiaj tsis nqa tuaj lawm. 7Cov khoom uas lawv xub nqa tuaj, tseem ntau tshaj qhov uas lawv xav tau los ua lub tsev ntawd lawm thiab.
Ua Tus TSWV Lub Tsevntaub Sibntsib
(Khiav Dim 26:1-37)
8Cov txivneej uas ua lub Tsevntaub Sibntsib puavleej yog cov uas txujtes zoo nkaus xwb. Lawv muab kaum daim ntaub mag zoo-zoo uas xuas xov xiav, xov tsamxem, thiab xov liab xaws ua duab khelunpees rau. 9Cov ntaub ntawd puavleej loj sibluag, ntev 12 mev thiab dav 12 mev. 10Lawv muab tsib daim los xaws ua ib daig tag mam rov muab tsib daim uas i los xaws ua ib daig thiab. 11Lawv muab ntaub xiav xaws ua ib co ntsej tis raws tus ntug thoobplaws daim ntaub ob sab ntug nraud. 12Ces lawv muab tsibcaug lub ntsej tis rau thawj daim, thiab muab tsibcaug lub tis rau daim thib ob kom sibncag zos. 13Thiab lawv muab kub ntaus ua tsibcaug lub khawb los khawm ob daim ntaub ua ib daig.
14Ces lawv muab tej ntaub plaub tshis xaws ua kaum-ib daig ntaub los vov lub Tsevntaub. 15Lawv xaws cov ntaub ntawd sibluag zos, ntev 13 mev thiab dav 2 mev. 16Lawv muab tsib daim los xaws ua ib daig thiab muab rau daim uas i los xaws ua dua ib daig. 17Lawv muab tsibcaug lub ntsej tis rau tog taw tom no, thiab ua tsibcaug lub ntsej tis rau tos taw tom ub. 18Lawv muab tooj ntaus ua tsibcaug lub khawb khawm ob daim ntaub ua ib daig vov lub tsev. 19Lawv tseem vov ob txheej ntxiv tuaj sab saud, ib txheej yog muab cov tawv laug yaj uas zas liab thiab ib txheej yog muab cov tawv uas zoo heev.
20Lawv muab ntoo kubtwg los ua cov ncej uas sawvntsug txheem lub Tsevntaub. 21Txhua tus ncej siab 4 mev thiab dav 66 xatimev, 22muab ob sab npoo thais ua qwb dia sibdhos, kom cov ncej ntawd sibdhos uake. 23Lawv ua neesnkaum tus ncej rau sab qabtse 24thiab muab plaubcaug pluaj nyiaj ua taw tiag cov ncej, ob pluaj tiag ib tug ncej, kom ob tug ncej ntawd thiaj sibdhos ruaj. 25Lawv muab neesnkaum tus ncej txheem lub Tsevntaub sab qaumtsev, 26thiab muab plaubcaug pluaj nyiaj ua cov tiag taw, ob pluaj tiag ib tug ncej. 27Muab rau tus ncej txhos rau tomqab lub Tsevntaub sab hnubpoob, 28thiab txhos ob tug rau ob lub kaumtsev. 29Ob tug ncej uas nyob ntawm kaumtsev, muab sibdhos hauv taw nto plaws rau saud. Ob tug ncej ntawm ob lub kaumtsev puavleej ua zoo ib yam nkaus. 30Yogli ntawd, thiaj muaj yim tus ncej thiab kaum-rau pluaj taw nyiaj, ob pluaj tiag ib tug ncej.
31Lawv muab ntoo kubtwg ua kaum-tsib tug las, muab tsib tug ua las rau sab phabntsa Tsevntaub sab ped, 32muab tsib tug ua las rau sab phabntsa sab nrad, thiab muab tsib tug ua las rau sab momkaum tomqab uas nyob sab hnubpoob. 33Tus las nruabnrab, yog tus uas yuam lub Tsevntaub sab phabntsa tom no mus ti nkaus tom ub. 34Lawv muab kub vuam cov ncej thiab muab cov khawb kub khawm cov ncej rau ntawm cov las; cov las ntawd puavleej muab kub vuam huv tibsi.
35Daim ntaub thaiv, mas lawv muab ib daim ntaub mag zoo heev uas xuas xov xiav, xov tsamxem, thiab xov liab, los xaws ua daim ntaub thaiv thiab xaws cov duab khelunpees rau ntawm daim ntaub ntawd. 36Lawv muab ntoo kubtwg ua plaub tug ncej uas dai daim ntaub, muab kub vuam cov ncej ntawd huv tibsi, thiab muab tej khawb kub los khawm rau. Ces lawv muab nyiaj ntaus ua plaub daim taw tiag plaub tug taw ncej ntawd. 37Lawv muab ib daim ntaub mag zoo heev uas yog xuas xov xiav, xov tsamxem, thiab xov liab los xaws ua pajntaub txaij nraug zees, los ua daim npog lub qhovrooj uas nkag rau hauv lub Tsevntaub. 38Lawv ua tsib tug ncej dai daim ntaub ntawd, muab khawb khawm rau, thiab muab kub vuam cov hau ncej thiab tej hlua pav ncej, thiab muab tooj ua tsib daig taw tiag tsib tug ncej ntawd.
ទើបបានជ្រើសរើសហើយ៖
Khiav Dim 36: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.