Efexaus 2
2
Dim Ntawm Kev Tuag Los Tau Txojsia
1Yav tas los nej sab ntsujplig twb tuag lawm, vim nej txoj kev tsis mlooglus thiab txoj kev ua txhaum. 2Thaum ntawd nej tseem nyiam ua ib yam li tej neeg uas nyob hauv ntiajteb no ua; thiab nej ua rawsli tus ntsujplig uas kav saum nruabntug qhia nej, uas yog tus ntsujplig dab uas nimno kav cov neeg tsis mloog Vajtswv lus. 3Qhov tseeb, yav tas los peb los zoo nkaus li lawv thiab, uas yog ua lub neej rawsli sab nqaijtawv txoj kev ntshaw; peb ua txhua yam rawsli peb lub cev thiab peb lub siab nyiam ua. Yogli ntawd, Vajtswv yeej yuav rautxim rau peb ib yam li Vajtswv rautxim rau lwmtus los ntawm Nws txoj kev chim.
4Tiamsis Vajtswv txoj kev tabncuab loj heev, thiab Nws hlub peb kawg nkaus li. 5Txawm yog peb twb tuag ntawm sab ntsujplig vim peb tsis mloog Vajtswv lus lawm los, Vajtswv tseem pub peb rov muaj txojsia nrog Khetos thiab. Qhov uas nej dim ntawd twb yog vim Vajtswv txoj hmoovhlub nkaus xwb. #Kaulx 2:13 6Vim peb koomxeeb nrog Yexus Khetos, Vajtswv thiaj tsa peb nrog Nws sawv rovqab los thiab nrog Nws kav saum ntuj ceebtsheej. 7Tej uas Vajtswv ua ntawd yog Nws qhia kom yav tomntej sawvdaws paub txog Nws txoj hmoovhlub loj kawg nkaus uas tsis muaj ib yam dabtsi yuav piv tau, uas Nws tau ua rau peb nyob hauv Yexus Khetos.
8Qhov uas nej dim yog vim Vajtswv txoj hmoovhlub, uas los ntawm txoj kev ntseeg; tsis yog los ntawm nej tus peevxwm, tiamsis yog Vajtswv ciali pub rau nej xwb. 9Nws tsis yog nej lub dag lub zog ua, kom thiaj tsis muaj leejtwg khav tau. 10Peb yog cov uas Vajtswv txhais tes puab. Vajtswv tsim peb nyob rau hauv Yexus Khetos kom los ua tes haujlwm zoo uas Vajtswv twb xub npaj tseg cia rau peb ua lawm.
Koom Uake Rau Hauv Khetos
11Nej cov uas tsis yog haivneeg Yudais, kom nej ncontsoov tias yav tas los cov Yudais hu nej hu ua “cov uas tsis ua kevcai txiav” tiamsis lawv hu lawv hais tias lawv yog “cov uas ua kevcai txiav” (uas yog yam neeg txhais tes ua rau neeg lub cev). 12Ncontsoov tias lub sijhawm ntawd, nej nyob deb ntawm Yexus Khetos. Nej yog Lwm Haivneeg, nej tsis yog cov uas Vajtswv tau xaiv tseg. Nej tsis muaj feem koom nyob rau hauv Vajtswv tej lus cogtseg uas Nws tau coglus rau cov neeg uas Nws twb xaiv tseg lawm, thiab nej tsuas yog lam ua neej nyob hauv ntiajteb no xwb nej yeej tsis muaj chaw ciasiab thiab yeej tsis muaj Vajtswv li. 13Txawm yog yav tas los nej nyob nrug deb los xij, nimno nej twb tau los nyob rau hauv Yexus Khetos lawm. Qhov uas nej tau los li ntawd twb yog vim Yexus Khetos cov ntshav#2:13: vim Yexus Khetos cov ntshav; lossis vim Yexus txoj kev tuag. xwb.
14Rauqhov Khetos twb coj txoj kev sib haumxeeb los rau peb, uas yog coj cov Yudais thiab Lwm Haivneeg los ua tau ib pab lawm. Los ntawm Nws cev nqaij daim tawv, Nws tau muab sab phabntsa uas ua rau muaj kev sibfaib thiab kev ua yeebncuab ntawd rhuav povtseg lawm. 15Nws tau muab cov Yudais tej Kevcai uas lawv qhia thiab tej uas lawv txwv rhuav huvsi, kom Nws thiaj tsim tau ib pab neeg tshiab tawm hauv ob pab neeg ntawd los nrog Nws sib raugzoo; ua li ntawd thiaj muaj kev sib haumxeeb. #Kaulx 2:14 16Khetos txoj kev tuag saum ntoo khaublig ua rau Nws rhuav tau lawv txoj kev ua yeebncuab; coj tau lawv los ua ib pab, thiab coj tau lawv rov los cuag Vajtswv. #Kaulx 1:20 17Khetos tau los qhuabqhia Txoj Moo Zoo uas yog hais txog kev sib haumxeeb rau sawvdaws, suav tagnrho nej cov uas yog Lwm Haivneeg uas nyob nrug deb Vajtswv thiab cov Yudais uas nyob ze Vajtswv huv tibsi. #Yaxaya 57:19 18Tsuas yog los ntawm Khetos xwb, peb sawvdaws nrog rau cov Yudais thiab Lwm Haivneeg, thiaj muaj cuabkav mus cuag tau Vajtswv, rauqhov peb puavleej koom Vajtswv tibtug Ntsujplig.
19Yogli ntawd, nej cov uas yog Lwm Haivneeg, nej tsis yog Lwm Haivneeg lossis tsis yog neeg txawv teb txawv chaw ntxiv lawm, nimno nej nrog Vajtswv haivneeg koom teb koom chaw thiab nej yog Vajtswv tsev neeg lawm. 20Vajtswv tsa nej rau saum lub quatsev uas cov timthawj thiab cov xibhwb cev Vajtswv lus twb ncaws cia lawm.#2:20: lub quatsev uas cov timthawj thiab cov xibhwb cev Vajtswv lus twb ncaws cia lawm; lossis lub quatsev, uas yog cov timthawj thiab cov xibhwb cev Vajtswv lus. Tus ncej zeb uas txheem lub tsev ntawd yog Yexus Khetos ntag. 21Yexus yog tus uas txheem tagnrho lub tsev ntawd kom khov thiab ua kom lojhlob, thiajli tau ib lub tuamtsev uas dawbhuv zoo kawg nkaus rau Vajtswv. 22Vajtswv tabtom muab nej txhua tus uas koomxeeb nrog Nws los ua ib lub tsev rau Vajtswv tus Ntsujplig nyob.
ទើបបានជ្រើសរើសហើយ៖
Efexaus 2: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.