Tes Haujlwm 10
10
Petus Thiab Kaunelius
1Nyob hauv lub nroog Xixaleyas, muaj ib tug txivneej hu ua Kaunelius, nws yog haivneeg Loos ib tug thawj tubrog pawg pua, uas saib pab tubrog hu ua “Cov Neeg Italis Pab.” 2Nws yog ib tug uas hwm Vajtswv, nws thiab nws tsev neeg puavleej pehawm Vajtswv. Nws txeev pab cov neeg Yudais uas txomnyem, thiab nws thov Vajtswv tsis tuncua. 3Muaj ib hnub kwvlam li thaum peb teev yav hnubqaij, nws txawm ua yogtoog thiab pom Vajtswv ib tug timtswv meej nplhiav los rau ntawm nws thiab hais tias, “Kaunelius!”
4Kaunelius ntsiantsoov tus timtswv ntawd thiab ntshai kawg li; nws txawm nug tus timtswv hais tias, “Tus Tswv, koj hais dabtsi?”
Tus timtswv teb tias, “Vajtswv twb hnov koj tej lus thov thiab pom tej uas koj muab pub rau cov neeg txomnyem lawm. 5Zaumno, koj ciali txib neeg mus hauv lub nroog Yaupas, mus coj Ximoos tus uas hu ua Petus tuaj rau ntawm no. 6Nws nyob hauv Ximoos tus uas luam tawv tsiaj lub tsev, uas yog nyob ntawm ntug hiavtxwv.” 7Thaum Vajtswv tus timtswv mus lawm, Kaunelius txawm hu ob tug tubtxib thiab ib tug tubrog uas hwm Vajtswv uas niajhnub ua haujlwm rau nws los cuag nws. 8Nws piav tej uas nws pom huv tibsi rau lawv, thiab txib lawv mus rau hauv lub nroog Yaupas.
9Hnub tomqab uas lawv peb tug ntawd tabtom mus yuav txog lub nroog Yaupas, thaum tavsu, Petus nce mus rau saum rutsev, txheej tsev lastshav, uas yog mus thov Vajtswv. 10Nws txawm tshaib plab thiab nws xav noj mov; thaum lawv tseem tabtom ua su noj, nws txawm ua yogtoog. 11Nws pom roojntug qhib thiab muaj ib yam zooli daim ntaub dav-dav, muaj hlua khi plaub cegkaum tso dauv saum ntuj los rau hauv ntiajteb. 12Nyob hauv daim ntaub ntawd muaj txhua yam tsiaj, muaj nab, nabqa, vaubkib thiab tej noog saum nruabntug. 13Ces txawm muaj ib lub suab hais rau Petus hais tias, “Petus, koj ciali sawv thiab muab tua noj!”
14Tiamsis Petus hais tias, “Tsis tau, tus Tswv! Kuv yeej ibtxwm tsis noj tej uas txoj kevcai hais tias tsis huv lossis txwv tsis pub noj.”
15Lub suab ntawd txawm rov hais dua rau nws hais tias, “Tej uas Vajtswv hais tias huv lawm, koj tsis txhob suav hais tias tsis huv.” 16Muaj li ntawd txog peb zaug, ces daim ntaub ntawd txawm rov rau saum ntuj lawm.
17Thaum Petus tseem tabtom xav txog lub ntsiablus ntawm zaj uas nws ua yogtoog pom ntawd, ces peb tus txivneej uas Kaunelius txib tuaj, lawv twb tuaj nrhiav tau Ximoos lub tsev thiab sawv sabnraud lub roojvag. 18Lawv txawm hu thiab nug tias tus txivneej uas hu ua Ximoos Petus puas nyob hauv lub tsev ntawd.
19Thaum Petus tseem tabtom xav txog zaj uas nws ua yogtoog pom ntawd, Vaj Ntsujplig txawm hais rau Petus hais tias, “Koj saib, muaj peb tug#10:19: peb tug; tej phau ntawv qub uas xuas tes sau, muaj tus puav; muaj ib phau qub hais tias ob tug. txivneej tuaj nrhiav koj. 20Ciali sawv thiab nqis mus rau txheej hauv. Tsis txhob xav licas, ciali nrog lawv mus, rauqhov twb yog Kuv txib lawv tuaj.” 21Petus thiaj nqis rau txheej hauv thiab nws hais rau lawv hais tias, “Kuv yog tus uas nej tuaj nrhiav ntag; nej tuaj nrhiav kuv ua dabtsi?”
22Lawv teb tias, “Tus thawj tubrog pawg pua, uas yog Kaunelius txib peb tuaj. Nws yog ib tug neeg ncajncees thiab hwm Vajtswv heev, cov Yudais sawvdaws puavleej hwm nws. Vajtswv ib tug timtswv los hais rau nws kom tuaj caw koj mus rau tom nws tsev, kom nws thiaj yuav tau hnov tej uas koj qhia.” 23Ces Petus txawm caw cov txivneej ntawd los hauv tsev thiab kom lawv pw ntawd ib hmos.
Hnub tomqab Petus txawm nrog lawv mus; thiab cov ntseeg uas nyob hauv lub nroog Yaupas muaj qeeleej nrog nws mus thiab. 24Ib hnub tomqab ntawd ntxiv thiab, nws mamli mus txog hauv lub nroog Xixaleyas. Kaunelius twb hu tej kwvtij neejtsa thiab tej phoojywg tuaj nyob tos Petus lawm. 25Thaum Petus tseem tabtom yuav nkag mus rau hauv tsev, Kaunelius txawm tawm tuaj tostxais Petus; nws txhoscaug ntua ntawm Petus kotaw thiab hawm. 26Tiamsis Petus tsa kiag Kaunelius sawv thiab hais tias, “Ciali sawv! Kuv yog neeg ib yam li koj thiab xwb.”
27Petus txawm nrog Kaunelius sibtham thiab nkag mus rau hauv tsev, nws pom muaj neeg coob-coob twb tuaj nyob uake rau hauv lawm. 28Nws hais rau cov neeg ntawd hais tias, “Nej yeej paub zoo lawm hais tias cov Yudais txoj kevcai yeej ibtxwm tsis pub ib tug neeg Yudais mus saib lossis nrog Lwm Haivneeg uake, tiamsis Vajtswv tau qhia rau kuv hais tias kom kuv tsis txhob suav ib leeg twg hais tias yog neeg tsis huv. 29Yogli ntawd, thaum nej txib neeg tuaj hu kuv, kuv tsis yig li, kuv thiaj ciali tuaj. Kuv thov nug seb nej hu kuv tuaj ua dabtsi?”
30Kaunelius teb tias, “Plaub hnub dhau los, tiblub sijhawm li tamsim no uas yog thaum peb teev hnubqaij, kuv tabtom thov Vajtswv#10:30: thov Vajtswv tej phau ntawv qub uas xuas tes sau, muaj yoo mov thov Vajtswv. hauv kuv tsev. Tamsim ntawd, txawm muaj ib tug txivneej hnav ristsho ci ntsa-iab los sawv ntawm kuv hauvntej 31thiab hais tias, ‘Kaunelius, Vajtswv twb hnov koj tej lus thov thiab pom tej uas koj tau muab pub rau cov neeg txomnyem lawm. 32Koj ciali txib neeg mus nram lub nroog Yaupas thiab mus hu tus txivneej uas muaj npe hu ua Ximoos Petus. Nws so hauv Ximoos tus uas luam tawv tsiaj lub tsev uas nyob ntawm ntug hiavtxwv.’ 33Ces tamsim ntawd kuv txawm txib neeg tuaj hu koj, thiab koj txaussiab hlo tuaj. Tamsim no peb sawvdaws los nyob uake rau ntawm Vajtswv lub xubntiag, tosntsoov mloog txhua yam uas tus Tswv tau qhia kom koj hais rau peb.”
Petus Tej Lus Tsuamxeeb
34Petus pib qhia rau lawv hais tias, “Nimno kuv paub tseeb hais tias Vajtswv tsis xaiv leejtwg ntsejmuag. #2Kev 10:17 35Txawm yog haivneeg twg los xij, txhua tus uas hwm Vajtswv thiab ua qhov uas dawbhuv, ces Vajtswv yeej txaussiab yuav. 36Nej twb paub txojlus uas Vajtswv qhia rau cov neeg Yixalayees lawm, uas yog Txoj Moo Zoo hais txog txoj kev kajsiab uas muaj nyob rau ntawm Yexus Khetos, tus uas yog sawvdaws tus Tswv. 37Nej twb paub zaj uas tau tshwmsim nyob thoobplaws tebchaws Yixalayees, uas pib muaj hauv xeev Kalilais, tomqab uas Yauhas qhuabqhia hais txog kevcai rausdej. 38Thiab nej paub txog qhov uas Vajtswv tau pub Vaj Ntsujplig tus Dawbhuv thiab hwjchim rau Yexus tus uas yog neeg Naxalev lawm. Yexus mus rau txhua qhov chaw, Nws ua tej haujlwm uas zoo thiab kho txhua tus uas nyob hauvqab dab ntxwgnyoog lub hwjchim, rauqhov muaj Vajtswv nrog Nws.
39“Peb ua tau timkhawv txog txhua yam uas Yexus ua hauv cov Yixalayees tej zos thiab hauv lub nroog Yeluxalees. Lawv tua Nws los ntawm qhov uas muab Nws ntsia rau saum ntoo khaublig. 40Tiamsis peb hnub tomqab, Vajtswv tsa Nws sawv hauv qhovtuag rovqab los thiab Nws tau los tshwm rau ib cov pom. 41Tsis yog txhua tus pom, tiamsis tsuas yog rau cov ua timkhawv uas Vajtswv twb xub xaiv cia lawm pom xwb, cov ntawd yog peb cov uas tau nrog Nws nojhaus uake tomqab uas Nws sawv hauv qhovtuag los lawm. 42Thiab Nws xaaj kom peb mus qhia Txoj Moo Zoo rau sawvdaws, thiab ua timkhawv qhia hais tias Nws yog tus uas Vajtswv tau tsa los ua tus txiavtxim rau cov neeg ciaj thiab cov neeg tuag. 43Cov xibhwb uas cev Vajtswv lus puavleej hais txog Nws hais tias txhua tus uas ntseeg Nws, Vajtswv yuav zam lawv lub txim los ntawm Nws lub npe uas muaj hwjchim.”
Lwm Haivneeg Tau Txais Vaj Ntsujplig Uas Dawbhuv
44Thaum Petus tseem tabtom qhia, Vaj Ntsujplig tus Dawbhuv txawm los rau saum txhua tus uas mloog nws tej lus qhia. 45Cov Yudais uas ntseeg Yexus uas nrog Petus tuaj nram lub nroog Yaupas tuaj ciali xav tsis thoob txog qhov uas Vajtswv tau pub Vaj Ntsujplig tus Dawbhuv los rau Lwm Haivneeg lawm thiab. 46Rauqhov lawv hnov cov neeg ntawd hais tau lus txawv-txawv, thiab qhuas hais tias Vajtswv yog tus uas zoo kawg nkaus. Petus hais tias, 47“Cov neeg no twb tau txais Vaj Ntsujplig tus Dawbhuv ib yam li peb tau txais lawm. Leejtwg tseem yuav txwv tsis pub muab cov neeg no ua kevcai rausdej thiab?” 48Yogli ntawd, Petus thiaj kom lawv ua kevcai rausdej los ntawm Yexus Khetos lub npe. Lawv thiaj thov kom nws nrog lawv nyob ob-peb hnub ntxiv.
ទើបបានជ្រើសរើសហើយ៖
Tes Haujlwm 10: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
