Tes Haujlwm 9
9
Kev Uas Xaulaus Los Ntseeg Vajtswv
(Tes Haujlwm 22:6-16; 26:12-18)
1Thaum ntawd Xaulaus tseem uanruj uatsiv yuav tua cov uas ntseeg tus Tswv. Xaulaus thiaj mus cuag tus Tuam Povthawj Hlob, 2thiab thov ntawv tsocai mus rau cov tsev sablaj hauv lub nroog Damaxakas hais tias, yog nws ntsib leejtwg, txawm yog pojniam thiab txivneej los xij, yog lawv coj li tus Tswv Txojkev, ces nws muaj cai ntes coj mus kaw rau hauv lub nroog Yeluxalees.
3Thaum Xaulaus tabtom mus yuav txog lub nroog Damaxakas, txawm muaj ib tug duab ci nplas saum ntuj los puagncig nws. 4Nws txawm ntog kiag rau hauv av thiab hnov ib lub suab hais rau nws hais tias, “Xaulaus, Xaulaus! Ua licas koj tsimtxom kuv?”
5Xaulaus nug hais tias, “Tus Tswv, koj yog leejtwg?”
Lub suab ntawd teb tias, “Kuv yog Yexus tus uas koj tsimtxom ntag. 6Tiamsis koj ciali sawv thiab mus rau hauv lub nroog, yuav muaj neeg qhia rau koj paub tias koj yuavtsum ua dabtsi.”
7Cov txivneej uas nrog Xaulaus mus ntawd, lawv ciali nres thiab yoob tag huv tibsi; lawv hnov lub suab tiamsis lawv tsis pom leejtwg li. 8Xaulaus txawm sawvtsees thiab rua muag hlo, tiamsis nws ob lub qhovmuag tsis pomkev lawm. Yogli ntawd, lawv thiaj tuav nws tes thiab coj nws mus rau hauv lub nroog Damaxakas. 9Nws tsis pomkev tau peb hnub, thiab peb hnub ntawd nws yeej tsis noj tsis haus ib yam dabtsi li.
10Muaj ib tug thwjtim hu ua Ananias nyob hauv lub nroog Damaxakas. Nws ua yogtoog pom tus Tswv los hais rau nws hais tias, “Ananias!”
Ananias teb tias, “Tus Tswv, kuv nyob ntawm no.”
11Tus Tswv hais rau nws hais tias, “Koj ciali sawv thiab mus rau tom txojkev uas hu ua Txojkev Ncaj, koj mus hauv Yudas tsev thiab nrhiav tus txivneej uas hu ua Xaulaus uas yog neeg Thaxus. Lub sijhawm no nws tseem tabtom thov Vajtswv, 12thiab nws ua yogtoog pom ib tug txivneej hu ua Ananias los hauv tsev thiab tsa tes rau saum nws, kom nws rov pomkev.”
13Ananias teb tias, “Tus Tswv, kuv hnov ntau leej hais txog tus txivneej no thiab txhua yam kev tsimtxom uas nws tau ua rau cov ntseeg uas nyob hauv lub nroog Yeluxalees. 14Qhov uas nws tuaj hauv lub nroog Damaxakas no, twb yog nws tau hwjchim ntawm cov thawj povthawj hlob tuaj ntes txhua tus uas pehawm Koj.”
15Tiamsis tus Tswv hais rau Ananias hais tias, “Koj ciali mus, rauqhov Kuv twb xaiv nws los ua haujlwm rau Kuv lawm. Nws yuav muab Kuv lub npe mus qhia rau Lwm Haivneeg, rau cov vajntxwv, thiab rau cov neeg Yixalayees. 16Kuv yuav qhia rau nws paub tias nws yuav raug kev txomnyem npaum licas vim Kuv lub npe.”
17Yogli ntawd, Ananias txawm mus rau tom lub tsev uas Xaulaus so thiab tsa tes rau saum Xaulaus. Nws hais rau Xaulaus hais tias, “Tus tijlaug Xaulaus 'e, tus Tswv Yexus uas koj pom tom kev thaum koj tabtom tuaj rau ntawm no, yog tus txib kuv tuaj pab koj kom koj rov pomkev thiab puvnpo Vaj Ntsujplig Tus Dawbhuv.” 18Tamsim ntawd txawm muaj ib yam zooli nplai ntses poob nthav ntawm Xaulaus ob lub qhovmuag los, ces nws txawm rov pomkev li qub lawm. Nws sawv los thiab ua kevcai rausdej; 19thaum nws noj mov tag, nws thiaj rov muajzog tuaj.
Xaulaus Qhuabqhia Hauv Damaxakas
Xaulaus nrog cov ntseeg hauv lub nroog Damaxakas nyob tau ob-peb hnub. 20Nws ciali mus tom tej tsev sablaj thiab pib qhuabqhia hais tias Yexus yog Vajtswv tus Tub.
21Txhua tus uas hnov nws qhia lawv xav tsis thoob li. Lawv sibnug hais tias, “Tus txivneej no tsis yog tus uas tsimtxom cov ntseeg Yexus nram lub nroog Yeluxalees lov? Nws lub homphiaj uas tuaj ntawm no tsis yog tuaj ntes cov ntseeg coj rovqab mus rau cov thawj povthawj hlob lov?”
22Tiamsis Xaulaus tej lus qhuabqhia yimhuab muajzog heev tuaj. Tej uas nws qhia muaj peevxwm ua tau timkhawv rau sawvdaws paub tseeb-tseeb hais tias Yexus yog tus Mexiyas; qhov ntawd ua rau cov Yudais uas nyob hauv lub nroog Damaxakas txawm tsis muaj lus hais lawm.
23Tomqab ntawd tsis ntev, cov Yudais txawm tuaj sablaj thiab nrhiav kev muab Xaulaus tua povtseg, #2Klt 11:32-33 24tiamsis twb muaj neeg qhia rau nws paub lawm. Cov Yudais niajhnub niajhmo zov lub nroog ntawd tej roojvag tos ntes nws coj mus tua povtseg. 25Tiamsis muaj ib hmos Xaulaus cov thwjtim muab ib lub tawb loj-loj rau nws nyob hauv, thiab lawv muab hlua khi lub tawb tso dauv ntawm sab ntsayeej mus rau sabnraud lawm.
Xaulaus Nyob Hauv Yeluxalees
26Thaum Xaulaus mus txog lub nroog Yeluxalees lawm, nws txawm npajsiab yuav mus koom cov thwjtim. Tiamsis lawv ntshai nws, rauqhov lawv tsis ntseeg tias nws yog ib tug thwjtim tiag. 27Tiamsis Npananpas coj nws mus cuag cov timthawj. Npananpas qhia tej uas Xaulaus ntsib tus Tswv licas thaum nws taug kev mus pem lub nroog Damaxakas, thiab tus Tswv tau los nrog Xaulaus tham licas. Npananpas qhia ntxiv txog thaum Xaulaus nyob pem lub nroog Damaxakas, Xaulaus muaj peevxwm qhuabqhia hauv Yexus lub npe npaum licas rau lawv mloog.
28Yogli ntawd, Xaulaus thiajli nrog cov timthawj nyob thiab mus-mus los-los thoobplaws lub nroog Yeluxalees, nws muaj siab tawv qhuabqhia hauv Yexus lub npe rau ub rau no. 29Nws nrog cov Yudais uas haislus Kilis sibtham thiab sibcav, tiamsis lawv cov ntawd tuavhauv yuav muab nws tua povtseg. 30Thaum cov ntseeg hnov li ntawd, lawv txawm coj Xaulaus mus rau pem lub nroog Xixaleyas thiab xa nws mus rau lub nroog Thaxus.
31Lub sijhawm ntawd cov pawg ntseeg uas nyob thoobplaws hauv xeev Yudas, xeev Kalilais thiab xeev Xamalis muaj txoj kev nyabxeeb. Vaj Ntsujplig tus Dawbhuv tau pab lawv, txhawb lawv lub zog, ua rau lawv lojhlob coob zujzus ntxiv, vim lawv ua lub neej paub ntshai tus Tswv.
Petus Nyob Hauv Lidas Thiab Yaupas
32Petus taug kev mus rau txhua qhov. Muaj ib zaug nws mus saib cov ntseeg uas nyob rau hauv lub zos Lidas. 33Thaum nws nyob hauv lub zos ntawd, nws pom ib tug txivneej hu ua Ane-as. Tus txivneej ntawd tuagtes tuagtaw, nws pw saum txaj tau yim xyoo thiab yeej sawv tsis taus mus qhovtwg li. 34Petus hais rau nws hais tias, “Ane-as 'e, Yexus Khetos yuav kho kom koj zoo. Ciali sawv thiab tu koj lub chaw pw.” Tamsim ntawd Ane-as txawm sawvtsees. 35Tagnrho cov neeg uas nyob hauv lub zos Lidas thiab hauv Saloos pom Ane-as zoo lawm, lawv txawm los ntseeg tus Tswv huvsi.
36Nyob rau hauv lub nroog Yaupas, muaj ib tug pojniam hu ua Tanpithas, nws yog ib tug ntseeg Yexus. (Nws lub npe hauv lus Kilis hu ua Daulakas, lub npe ntawd txhais hais tias “muaslwj.”) Nws niajhnub ua yam zoo thiab pab cov neeg txomnyem. 37Lub sijhawm ntawd nws tau mob thiab ciali tuag lawm. Lawv muab nws lub cev ntxuav thiab muab nws mus tso rau hauv ib chav tsev txheej saud. 38Lub nroog Yaupas kuj nyob ze lub zos Lidas. Thaum cov ntseeg hauv Yaupas hnov tias Petus nyob hauv Lidas, lawv txawm txib ob tug txivneej mus hais rau Petus hais tias, “Thov koj maj ceevnrooj mus rau tom peb.”
39Petus txawm sawvtsees nrog nkawd mus. Thaum nws mus txog, lawv thiaj coj nws mus rau chav tsev txheej saum. Cov pojntsuam los sawv vij nws, lawv quaj zomzaws thiab lawv qhia nws txog tej tsho hnav thiab cov tsho tiv no uas Daulakas tau xaws cia thaum nws tseem muaj sia nyob. 40Petus kom sawvdaws tawm mus sabnraud; ces nws txawm txhoscaug thiab thov Vajtswv. Nws tig rau ntawd tus tuag thiab hais tias, “Tanpithas, koj ciali sawv!” Tanpithas txawm rua hlo qhovmuag; thaum nws pom Petus, nws sawv los zaum. 41Petus cev loo tes rub nws sawv; ces Petus txawm hu cov ntseeg thiab cov pojntsuam los saib thiab muab Daulakas tus uas rov ciajsia lawm cob rau lawv.
42Zaj no nrov-ncha mus thoobplaws hauv lub nroog Yaupas, ces txawm muaj neeg coob-coob los ntseeg tus Tswv. 43Petus nyob hauv lub nroog Yaupas tau ntau hnub, nws so hauv Ximoos tus uas luam tawv tsiaj lub tsev.
ទើបបានជ្រើសរើសហើយ៖
Tes Haujlwm 9: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
