Tes Haujlwm 11
11
Petus Tshabxo Rau Pawg Ntseeg Hauv Yeluxalees
1Cov timthawj thiab cov ntseeg uas nyob txhua qhov hauv xeev Yudas hnov tias Lwm Haivneeg tau los txais yuav Vajtswv tej lus lawm thiab. 2Thaum Petus rovqab mus rau saum lub nroog Yeluxalees, cov ntseeg uas ua kevcai txiav lawm txawm yws Petus hais tias, 3“Uacas koj mus rau hauv Lwm Haivneeg uas tsis ua kevcai txiav lub tsev, thiab tseem nrog lawv noj mov uake thiab?” 4Yogli ntawd, Petus thiaj pib piav ntxaws-ntxaws txog txhua yam uas tau tshwmsim, pib thaum hauvpaus los:
5“Thaum kuv tseem tabtom thov Vajtswv nyob hauv lub nroog Yaupas, ces kuv txawm ua yogtoog pom ib yam zooli daim ntaub dav-dav, muaj hlua khi plaub cegkaum tso dauv saum ntuj los rau ntawm kuv. 6Kuv ua tibzoo saib, kuv pom muaj txhua yam tsiaj, muaj nab, nabqa, vaubkib thiab tej noog saum nruabntug nyob hauv daim ntaub ntawd. 7Ces kuv txawm hnov ib lub suab hais rau kuv tias, ‘Petus, koj ciali sawv thiab muab tua noj!’
8“Tiamsis kuv hais tias, ‘Tsis tau, tus Tswv! Kuv yeej ibtxwm tsis noj tej uas txoj kevcai hais tias tsis huv lossis txwv tsis pub noj.’ 9Lub suab ntawd rov hais saum ntuj los rau kuv hais tias, ‘Tej uas Vajtswv hais tias huv lawm, koj tsis txhob hais tias tsis huv.’ 10Muaj li ntawd txog peb zaug, ces daim ntaub txawm rov rau saum ntuj lawm.
11“Tamsim ntawd peb tug txivneej uas tau raug txib tuaj pem lub nroog Xixaleyas tuaj, txawm tuaj txog hauv lub tsev uas kuv so.#11:11: kuv so; tej phau ntawv qub uas xuas tes sau, muaj peb so. 12Vaj Ntsujplig hais kom kuv ciali nrog lawv mus tsis txhob xav licas. Ces rau leej kwvtij uas yog cov ntseeg hauv lub nroog Yaupas thiaj nrog kuv mus pem lub nroog Xixaleyas, thiab peb sawvdaws txawm mus rau hauv Kaunelius tsev. 13Kaunelius hais rau peb hais tias, nws pom ib tug timtswv ceebtsheej los sawv hauv nws tsev thiab hais rau nws tias, ‘Koj ciali txib neeg mus nram lub nroog Yaupas thiab mus hu tus txivneej uas muaj npe hu ua Ximoos Petus. 14Nws yuav qhia tej lus uas cawm koj thiab koj tsev neeg kom nej dim nej lub txim.’
15“Thaum kuv pib qhia, Vaj Ntsujplig tus Dawbhuv txawm los rau saum lawv ib yam li thaum chivthawj uas los rau saum peb thiab. 16Thaum ntawd kuv txawm ncodheev txog tej lus uas tus Tswv qhia hais tias, ‘Yauhas muab nej ua kevcai raus los ntawm dej, tiamsis nej yuav tau ua kevcai raus los ntawm Vaj Ntsujplig tus Dawbhuv.’ #Teshl 1:5 17Yog tias Vajtswv twb pub Vaj Ntsujplig tus Dawbhuv rau Lwm Haivneeg ib yam li Nws tau pub rau peb thaum peb los ntseeg tus Tswv Yexus Khetos lawm thiab; es kuv ho yog leejtwg, uas tseem yuav txwv Vajtswv?”
18Thaum lawv hnov li ntawd, lawv tsis yws Petus lawm, lawv ua Vajtswv tsaug hais tias, “Nimno Vajtswv kuj qhib kev rau Lwm Haivneeg los tso lawv tej kev txhaum tseg thiab los txais txojsia.”
Pawg Ntseeg Hauv Ati-aukias
19Ibtxhia ntawm cov ntseeg uas tau khiav uasab uasua vim kev tsimtxom thaum lub sijhawm uas lawv muab Xatefanus tua, lawv tau khiav mus nyob rau puag pem xeev Faunikias, rau tim lub povtxwv Xaipas, thiab lub nroog Ati-aukias, thiab lawv tsuas qhia Txoj Moo Zoo rau cov Yudais nkaus xwb. #Teshl 8:1-4 20Tiamsis ibtxhia ntawm cov ntseeg uas khiav mus ntawd, cov uas nyob hauv lub povtxwv Xaipas thiab Kulenes, tau mus rau lub nroog Ati-aukias thiab qhia Txoj Moo Zoo uas hais txog tus Tswv Yexus rau Lwm Haivneeg#11:20: Lwm Haivneeg; tej phau ntawv qub uas xuas tes sau, muaj neeg Yudais uas hais lus Kilis lossis neeg hais lus Kilis. thiab. 21Tus Tswv lub hwjchim nrog lawv, thiaj ua rau muaj neeg coob-coob los ntseeg thiab tig los cuag tus Tswv.
22Thaum pawg ntseeg uas nyob nram lub nroog Yeluxalees hnov txog zaj no, lawv thiaj txib Npananpas mus rau pem Ati-aukias. 23Thaum nws mus txog ped thiab pom tias Vajtswv tau foom koobhmoov rau lawv, nws zoosiab kawg li, nws thiaj txhawb lawv lub zog kom lawv ncajncees thiab nyob ruaj-khov rau ntawm tus Tswv kawg lawv lub siab lub ntsws. 24Npananpas yog ib tug neeg uas zoo, nws puvnpo Vaj Ntsujplig tus Dawbhuv thiab kev ntseeg, thiaj ua rau nws coj tau coob leej los cuag tus Tswv.
25Tomqab ntawd Npananpas txawm mus nrhiav Xaulaus hauv lub nroog Thaxus. 26Thaum nws nrhiav tau Xaulaus lawm, nws coj Xaulaus los rau hauv lub nroog Ati-aukias. Nkawd nrog pawg ntseeg nyob tau ib xyoos, thiab qhia coob leej. Pawg ntseeg uas nyob hauv lub nroog Ati-aukias yog thawj pawg uas muaj lub npe hu ua cov Ntseeg Yexus.
27Lub sijhawm ntawd muaj ib cov xibhwb cev Vajtswv lus mus ntawm Yeluxalees rau Ati-aukias. 28Ib tug ntawm lawv cov xibhwb cev Vajtswv lus uas hu ua Ankanpus txawm sawvntsug qhia txog tej uas yuav tshwm los yav tomntej los ntawm Vaj Ntsujplig hais tias yuav muaj kev tshaib kev nqhis thoobplaws lub ntiajteb. (Ces lub sijhawm uas Khaudius ua huabtais txawm muaj li ntawd tiag). #Teshl 21:10 29Cov ntseeg sawvdaws pomzoo kom ib leeg muab ib qhov nyiaj rawsli lawv muaj peevxwm muab tau, xa mus pab cov kwvtij ntseeg uas nyob rau hauv lub xeev Yudas. 30Lawv txawm ua li ntawd, thiab lawv muab cov nyiaj ntawd rau Xaulaus thiab Npananpas coj mus rau cov txwjlaug uas saib pawg ntseeg nrad.
ទើបបានជ្រើសរើសហើយ៖
Tes Haujlwm 11: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
