2 Kauleethaus 8
8
Cov Ntseeg Txoj Kev Pab
1Cov kwvtij, peb xav kom nej paub txog Vajtswv txoj hmoovhlub uas Nws tau muab pub rau cov pawg ntseeg uas nyob rau hauv lub xeev Makedaunias. #Loos 15:20 2Lawv tau raug sim hnyav kawg los ntawm tej kev txomnyem; tiamsis lawv txoj kev zoosiab tseem loj heev, txawm yog lawv txomnyem kawg li los tseem ua rau lawv muaj lub siabdawb siabzoo loj dav kawg li.
3Kuv ua tau timkhawv hais tias, lawv yeej muab kawg lawv lub peevxwm lawm, thiab tseem muab tshaj lawv lub peevxwm lawm thiab. Los ntawm lawv lub siab dawbpaug, 4lawv tseem thov peb kom pub lawv muaj feem pab cov ntseeg Vajtswv uas nyob nram lub xeev Yudas. 5Lawv tseem muab ntau tshaj qhov uas peb xav tias lawv yuav muab tau lawm thiab! Uantej tshajplaws, lawv twb xub muab lawv tuskheej fij rau tus Tswv lawm; tomqab ntawd, lawv thiaj muab lawv tuskheej rau peb, rawsli Vajtswv pomzoo.
6Yogli ntawd, peb thiaj thov Titus tus uas twb pib ua tes haujlwm no lawm, kom rausiab ntso pab nej ua tes haujlwm tshwjxeeb uas yog txoj kev hlub no ntxiv mus kom tiav. 7Nej twb muaj txhua yam nplua-mias lawm: tsis hais kev ntseeg, kev haislus, kev txawjntse, kev kubsiab lug pab lwmtus thiab tej kev hlub uas nej muaj pub rau peb,#8:7: tej kev hlub uas nej muaj pub rau peb; tej phau ntawv qub uas xuas tes sau, muaj tej kev hlub uas peb muaj pub rau nej. peb xav kom nej muaj lub siabdawb siabzoo ua tes haujlwm kev hlub no ib yam nkaus thiab.
8Kuv hais li no tsis yog kuv yuam nej, tiamsis kuv xav muab lwmtus txoj kev hlub piv rau nej txoj seb nej txoj puas yog txoj tseeb tiag. 9Rauqhov nej yeej paub txog Tswv Yexus Khetos txoj hmoovhlub, hais tias txawm yog Nws npluanuj los Nws txaussiab txo Nws tuskheej los ua tus uas pluag pub rau nej, kom los ntawm Nws txoj kev pluag ntawd, nej thiaj dhau tau mus ua neeg npluanuj.
10Hais txog zaj no, mas kuv xav li no: Tsaib no nej tsis yog thawj pab uas pib xwb tiamsis nej tseem yog thawj pab uas ua tes haujlwm thiab. 11Zaumno, nej ciali ua kom tiav! Nej twb npajsiab lawm ces kavtsij kubsiab lug ua kom tiav, thiab ua rawsli nej ua tau. 12Rauqhov yog nej txaussiab hlo muab lawm, Vajtswv yeej txaussiab txais yuav qhov khoomplig rawsli qhov uas nej muaj, tsis yog rawsli qhov uas nej tsis muaj.
13Tsis yog kuv xav txo kom lwmtus lub nra sib, es ho muab lub nra hnyav nog rau nej; tiamsis kuv xav kom sawvdaws lub nra hnyav sibnpaug xwb. 14Nimno nej muaj ntau lawm, tsimnyog nej yuavtsum pab cov uas tsis muaj. Thaum nej tsis muaj, lawv cov uas muaj ntau, ho pab nej. Yog ua li no, mas sawvdaws thiaj yuav tau sibnpaug. 15Rawsli Vajtswv Txojlus tau hais tias, “Tus uas sau tau ntau los nws yeej tsis muaj seem, tus uas sau tau tsawg los nws yeej tsis tuncua.” #Khiav 16:18
Titus Thiab Cov Uas Nrog Nws Ua Haujlwm
16Tiamsis ua Vajtswv tsaug uas Nws ua rau Titus muaj lub siab kublug pab nej ib yam li kuv thiab! 17Titus tuaj pab nej tsis yog vim nws txais peb lolus thov kom nws tuaj xwb, tiamsis nws yeej xyivfab hlo thiab yeej zoosiab hlo tuaj. 18Peb txib ib tug kwvtij nrog Titus tuaj, nws yog ib tug uas tagnrho cov pawg ntseeg puavleej hwm, vim tes haujlwm qhia Txoj Moo Zoo uas nws tau ua. 19Tsis tag li ntawd xwb, cov pawg ntseeg tau xaiv thiab tsa nws los nrog peb taug kev uake mus ua tes haujlwm ntawm kev hlub uas yog ua rau peb tus Tswv tau ntsejmuag thiab ua rau sawvdaws paub tias yeej yog peb xav pab tiag.
20Peb yeej ua tibzoo saib kom tsis txhob muaj leejtwg thuam tau qhov uas peb nqa cov nyiaj siabdawb no. 21Peb lub homphiaj yog xav ua qhov uas ncajncees; tsis yog yuav ua rau Vajtswv pom xwb, tiamsis ua rau neeg pom thiab. #Paj 3:4
22Yogli ntawd, peb yuav txib ib tug kwvtij nrog nkawd mus. Nws yog tus uas peb twb sim ntau zaus los lawm, peb pom tias nws yeej muaj lub siab kublug xav pab. Nimno nws ciasiab rau nej heev, nws tseem hajyam xav pab nej dua qub. 23Hais txog ntawm Titus, nws yog ib tug uas nrog kuv ua haujlwm pab nej. Nyob li ntawm nkawd kwvtij uas nrog nws tuaj, nkawd yog cov uas sawvcev cov pawg ntseeg thiab yog cov uas ua rau Khetos tau ntsejmuag. 24Yogli ntawd, nej yuavtsum ua kom lawv pom nej txoj kev hlub, kom txhua pawg ntseeg thiaj yuav paub meej tias tej lus uas peb khav txog nej ntawd yeej muaj tseeb tiag.
ទើបបានជ្រើសរើសហើយ៖
2 Kauleethaus 8: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.