2 Kauleethaus 9
9
Pab Cov Ntseeg Uas Txomnyem
1Tsis tas kuv yuav sau ntawv tuaj qhia nej hais txog tej nyiaj uas tau muab xa mus pab cov ntseeg Vajtswv hauv lub xeev Yudas. 2Kuv paub tias nej yeej txaussiab hlo pab, thiab kuv twb khav ntxhias txog nej rau cov neeg hauv lub xeev Makedaunias lawm hais tias, tsaib no nej cov uas nyob hauv lub xeev Akhayas twb npaj tau nyiaj txhij cia lawm. Qhov uas nej kubsiab lug xav pab ntawd ua rau lawv ras lawm ntau heev.
3Kuv txib cov kwvtij no tuaj saib nej, kom tej lus uas peb khav txog nej ntawd thiaj tsis yog tej lus khav qhuav-qhuav xwb, tiamsis nej yeej npaj nyiaj txhij rawsli kuv hais lawm tiag. 4Tiamsis, yog cov neeg Makedaunias nrog kuv tuaj es lawv pom tias nej tseem tsis tau npaj txhij, mas xyov peb thiab nej yuav uacas txajmuag, vim peb tsosiab rau nej heev! 5Yogli ntawd, kuv thiaj xav tias kuv yuavtsum thov cov kwvtij ntawd ua kuv ntej tuaj rau ntawm nej thiab sau cov nyiaj uas nej twb xub coglus tseg lawm, kom thaum kuv tuaj txog ces nej twb npaj txhij lawm. Qhov ntawd yuav ua rau lawv pom tias nej yeej zoosiab hlo muab tsis yog kuv yuam kom nej muab.
6Nej yuavtsum ncontsoov tias tus uas cog tsawg nws yeej yuav tau sau tsawg; tus uas cog ntau nws yeej yuav tau sau ntau. 7Yogli ntawd, nyias yuavtsum muab rawsli nyias twb xub xav tseg lawm, tsis yog yuav khuvxim lossis yuam yus lub siab muab, rauqhov Vajtswv hlub tus uas zoosiab hlo muab. 8Vajtswv yog tus uas muaj peevxwm muab tau ntau tshaj tej uas nej xav tau rau nej, kom nej thiaj yuav muaj txaus siv thiab muaj txaus coj mus pab rau txhua tes haujlwm uas zoo. 9Rawsli Vajtswv Txojlus hais tias:
“Nws muaj nploojsiab dawbpaug pub rau cov neeg pluag;
Nws txoj kev ua zoo yuav nyob mus ibtxhis.” #Nnkauj 112:9
10Vajtswv tus uas pub noobqoob noobloo rau tus uas cog thiab pub zaub pub mov rau nws noj, yeej yuav pub noobqoob noobloo ntau npaug rau nej, thiab Nws yuav ua kom tej qoobloo uas nej cog lojhlob thiab nej yuav tau sau nplua-mias vim nej lub siabdawb siabzoo. #Yaxaya 55:10
11Nws yuav pub txhua yam rau nej kom nej npluanuj kom nej thiaj yuav pab tau lwmtus txhua lub sijhawm. Yuav muaj ntau leej ua Vajtswv tsaug, vim nej tej nyiaj uas nej muab rau peb nqa mus pab lawv. 12Rauqhov tej uas nej ua no tsis yog yuav pab tau cov ntseeg Vajtswv uas txomnyem xwb, tiamsis yuav ua rau muaj kev ua Vajtswv tsaug ntau kawg nkaus li thiab. 13Thaum sawvdaws pom tej nyiaj siabdawb uas nej pab no, yuav ua rau ntau leej qhuas Vajtswv, vim nej muab siab npuab thiab ntseeg Txoj Moo Zoo uas hais txog Khetos, thiab vim nej muaj lub siabdawb siabzoo pab lawv thiab pab txhua leej txhua tus. 14Lawv yuav ncontsoov nej thiab thov Vajtswv pab nej, rauqhov Vajtswv txoj hmoovhlub twb muaj nyob rau hauv nej ntau kawg li lawm. 15Peb ciali ua Vajtswv tsaug rau Nws qhov khoomplig uas peb tsis muaj cuabkav yuav piav tau!
ទើបបានជ្រើសរើសហើយ៖
2 Kauleethaus 9: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.