2 Kauleethaus 7
7
1Cov kwvtij uas kuv hlub, vim peb twb muaj cov lus cogtseg no lawm, cia peb ntxuav txhua yam uas ua rau peb sab nqaijtawv thiab sab ntsujplig tsis dawbhuv tawm mus kom tag, thiab cia peb ua lub neej dawbhuv los ntawm qhov uas peb hwm Vajtswv.
Paulus Txoj Kev Zoosiab
2Thov nej qhib nej lub siab rau peb thiab. Peb yeej tsis tau ua txhaum rau leejtwg hlo li; tsis tau ua rau leejtwg puastsuaj, lossis tsis tau dag-ntxias leejtwg. 3Kuv hais li no tsis yog kuv cem nej. Kuv twb qhia rau nej lawm hais tias nej yeej nyob rawv hauv peb lub siab, txawm yuav ciaj los cia peb ciaj uake, txawm yuav tuag los cia peb tuag uake. 4Kuv yeej ciasiab thiab kuv qhuas nej kawg li! Txawm yog peb raug txhua yam teebmeem los kuv yeej tsis poobsiab, kuv tseem zoosiab kawg li.
5Thaum peb mus txog hauv lub xeev Makedaunias lawm, peb yeej tsis tau so kiag li. Teebmeem muaj nyob rau txhua qhov, sabnraud muaj kev tawmtsam, sabhauv muaj kev txhawj-ntshai. #2Klt 2:13 6Tiamsis Vajtswv tus uas txhawb cov neeg qaugzog lub zog, Nws txhawb peb lub zog los ntawm qhov uas Nws txib Titus tuaj saib peb. 7Tsis yog qhov uas Titus tuaj saib peb xwb, tiamsis nws tau tshabxo rau peb hais tias nej txhawb nws lub zog kawg li. Nws qhia rau peb hais tias nej xav pom kuv npaum licas, nej tusiab npaum licas, thiab nej tseem muaj lub siab tivthaiv kuv licas; tej ntawd ua rau kuv zoosiab ntau npaug ntxiv.
8Txawm yog tsab ntawv uas kuv sau tuaj rau nej ntawd ua rau nej tusiab los xij, kuv yeej tsis khuvxim hais tias uacas kuv lam sau li ntawd. Kuv kuj ib nyuag khuvxim thiab, thaum kuv pom tias kuv tsab ntawv ntawd ua rau nej tusiab, tiamsis tsuas yog tusiab ib nyuag ntu xwb. 9Tiamsis nimno kuv zoosiab kawg, tsis yog vim kuv ua rau nej tusiab, tiamsis vim qhov uas nej tusiab ntawd ciali ua rau nej tso nej tej kev txhaum tseg. Rauqhov qhov uas nej tau txais txoj kev tusiab ntawd yeej yog rawsli Vajtswv tus dejsiab lawm, yogli ntawd, peb yeej tsis tau ua rau nej puastsuaj dabtsi hlo li. 10Txoj kev tusiab rawsli Vajtswv dejsiab, ua rau muaj kev hloov dua siab tshiab uas yuav coj mus tau txoj kev cawmdim, qhov ntawd yeej tsis tsimnyog khuvxim kiag li! Tiamsis txoj kev tusiab uas rawsli ntiajteb tus dejsiab, qhov ntawd yuav coj mus tau txoj kev ploj-tuag. 11Nej saib seb txoj kev tusiab raws Vajtswv dejsiab no ua tau dabtsi rau nej: ua rau nej mobsiab thiab ua rau nej kubsiab lug daws nej zaj hais tias nej tsis tau ua txhaum, ua rau nej txawj chimsiab rau tej kev phem, ua rau nej ras, ua rau nej ntshaw, ua rau nej kubsiab, thiab ua rau nej npaj txhij xav pom txoj kev ncajncees. Nyob rau hauv txhua yam no, nej tau ua rau sawvdaws pom tias nej tsis tau ua txhaum ib qho li.
12Yogli ntawd, qhov uas kuv sau tsab ntawv ntawd tuaj rau nej, tsis yog vim hais tus uas tau ua txhaum lossis tus uas lwmtus tau ua txhaum rau nws. Tiamsis kuv sau tuaj qhia nej, timntsej timmuag ntawm Vajtswv, kom nej pom tias nej muab siab npuab peb npaum licas. 13Twb yog vimli ntawd nej thiajli txhawb tau peb zog kawg li.
Tsis yog nej txhawb tau peb zog xwb, peb zoosiab kawg li thaum peb pom tias Titus zoosiab npaum licas, vim nej txhua tus tau ua rau nws tsis txob tsis txhawj li lawm. 14Kuv qhuas txog nej rau nws, rauqhov nej yeej tsis tau ua rau kuv txajmuag kiag li. Peb tau qhia txhua yam tseeb rau nej licas lawm, tej uas peb qhuas txog nej rau Titus, yeej tseeb ib yam li ntawd. 15Thaum Titus pom tias nej mloog nws lus, thiab nej tostxais nws los ntawm txoj kev ntshai uas ua ibce tsheehnyo, ua rau nws hajyam hlub nej heev ntxiv. 16Kuv zoosiab heev, rauqhov kuv yeej tsosiab tau txhua yam rau nej.
ទើបបានជ្រើសរើសហើយ៖
2 Kauleethaus 7: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.