2 Kauleethaus 6
6
1Peb cov uas nrog Vajtswv ua haujlwm, peb thov nquahu rau nej kom tsis txhob nkim Vajtswv txoj hmoovhlub uas nej tau txais lawm. 2Rauqhov Vajtswv hais tias:
“Thaum lub sijhawm uas Kuv txaussiab,
Kuv yeej mloog koj tej lus thov;
thiab hnub uas muaj kev dim txim,
Kuv yeej pab koj.”
Nej ua tibzoo mloog! Tamsim no yog lub sijhawm uas Vajtswv txaussiab, tamsim no yog hnub uas muaj kev dim txim. #Yaxaya 49:8
3Peb tsis xav kom leejtwg thuam tau peb tes haujlwm, peb thiaj tsis muab ib yam dabtsi los cuab leejtwg kev. 4Txhua yam uas peb ua, peb yeej ua kom sawvdaws pom tias peb yog Vajtswv cov tubtxib, los ntawm qhov uas peb ua siabntev tiv teebmeem, kev tuncua, thiab kev txomnyem. 5Peb raug nplawm, raug kaw, thiab raug kev kubntxhov; peb ua haujlwm khwv-khwv, yoo dabntub, nyiaj tshaib yoo nqhis. #Teshl 16:23 6Los ntawm peb lub siab dawbhuv, peb txoj kev paub, kev ua siabntev, thiab kev ua siabdawb siabzoo; uas yeej yog los ntawm Vaj Ntsujplig tus Dawbhuv, thiab los ntawm lub siab hlub tiag-tiag; 7los ntawm peb tej lus tseeb, thiab los ntawm Vajtswv lub hwjchim. Peb muaj txoj kev ncajncees los ua tej cuabyeej uas peb siv tawmtsam yeebncuab thiab tivthaiv peb tuskheej. 8Peb raug hwm thiab raug saib tsis taus; raug txobthuam thiab raug qhuas. Txawm yog peb hais tej lus tseeb xwb los tseem raug liam hais tias peb yog neeg dag; 9peb zooli cov neeg uas tsis muaj leejtwg paub, tiamsis sawvdaws puavleej paub peb; peb zooli cov uas twb tuag lawm, tiamsis nej sim saib seb, peb tseem muaj sia nyob; peb raug tsimtxom, tiamsis tsis tuag. 10Txawm muaj kev tusiab los tseem zoosiab puvnpo; txawm yog pluag los tseem ua rau ntau leej npluanuj; txawm tsis muaj ib yam dabtsi li los txhua yam puavleej tseem yog peb tug.
11Cov kwvtij uas nyob hauv lub nroog Kauleethaus 'e, peb yeej qhib siab qhib ntsws rau nej thiab yeej tsis zais ib qho li. 12Peb tsis tau zais siab rau nej, tsuas yog nej thiaj zais siab rau peb xwb. 13Qhov uas peb ib leeg ua ncaj rau ib leeg ces yogli no, kuv hais li uas nej yog kuv cov menyuam, nej yuavtsum qhib nej lub siab rau peb ib yam li peb twb qhib peb lub siab rau nej lawm thiab. Ciali qhib nej lub siab kom dav!
Ceebtoom Txog Cov Tsis Ntseeg Txoj Kev Haub-Ntxias
14Tsis txhob mus nrog cov uas tsis ntseeg koom kwv ib tug quab, rauqhov kev ncajncees thiab kev tsis ncajncees yuav ua licas nyob tau uake? Kev kaj thiab kev tsaus yuav ua licas koom tau uake? 15Khetos thiab dab ntxwgnyoog#6:15: dab ntxwgnyoog; lossis Npelias. yuav ua licas koom tau ib lub siab? Tus uas ntseeg yuav ua licas koom tau nrog tus uas tsis ntseeg? 16Yuav ua licas muab tau Vajtswv lub Tuamtsev tso sibtxig nrog neeg ntiajteb tej mlom? Rauqhov peb yog Vajtswv tus uas muaj sia nyob lub tuamtsev ntag! Rawsli Vajtswv tau hais tseg hais tias,
“Kuv yuav nrog lawv nyob
thiab nrog lawv taug kev uake;
Kuv yuav yog lawv tus Vajtswv,
thiab lawv yuav yog Kuv haivneeg.” #1Klt 3:16; 6:19; Levi 26:12; Exek 37:27
17Yogli ntawd, tus Tswv thiaj hais tias,
“Nej yuavtsum muab lawv tsotseg,
thiab cais nej tuskheej tawm ntawm lawv mus.
Tsis txhob kov tej uas qias
Kuv thiajli txais yuav nej. #Yaxaya 52:11
18Kuv yuav ua nej txiv,
thiab nej yuav yog Kuv cov tub cov ntxhais.
Tus Tswv uas muaj Hwjchim Loj Kawg Nkaus yog tus hais cov lus no.” #2Xamu 7:14; 1Xwm 17:13; Yaxaya 43:6; Yelemi 31:9
ទើបបានជ្រើសរើសហើយ៖
2 Kauleethaus 6: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.